မဲခေါင်၊ ဧပြီ ၁၉
ရှမ်း-ကရင်နီနယ်စပ်၊ ပင်လောင်းနဲ့ ဖယ်ခုံ မြို့နယ်တိုက်ပွဲတွေမှာ စစ်ကောင်စီက လေကြောင်းတိုက်ခိုက်မှုတွေ နေ့စဉ်ဆက်တိုက်လုပ်ဆောင်လာတယ်လို့ ပါဝင်တိုက်ခိုက်နေတဲ့ ပြည်သူ့ကာကွယ်ရေး တပ်ဖွဲ့တွေထံကနေ သိရပါတယ်။
ပြီးခဲ့တဲ့ ဖေဖော်ဝါရီလ နှောင်းပိုင်တည်းကတည်းက ဒီနေ့ထိတိုက်ပွဲတွေဖြစ်ပွားနေတဲ့ ပင်လောင်းနဲ့ဖယ်ခုံမြို့နယ်တွေမှာ တိုက်ပွဲတွေလည်း ဆက်တိုက်ဖြစ်နေပြီး အထိနာတဲ့ စစ်ကောင်စီတပ်က လေကြောင်းတိုက်ခိုက်မှုတွေ တောက်လျှောက်လုပ်လာတယ်လို့ ပါဝင်တိုက်ခိုက်နေတဲ့ ပြည်သူ့ကာကွယ်ရေး ရဲဘော်တစ်ဦးက ပြောပါတယ်။
“ တိုက်ပွဲတွေကတော့ ဆက်ဖြစ်နေဆဲပဲ။ နေ့တိုင်းကိုဖြစ်နေတာ။ နားလိုက်ပြန်ပစ်လိုက်ပဲ။ ဒီရက်ပိုင်း ဒီကောင်တွေ မြေပြင်က သိပ်မပစ်တော့ဘူး။ လာပစ်လဲ သူတို့သေတာများတာကိုး။ PNO တပ်လည်းပါတယ်။ ဒီတော့ လေကြောင်းကနေလာလာပစ်နေတာ။ ညဘက်တွေဆိုလာပြီ။ပုံမှန်ကိုလာပစ်တာ။ လေကြောင်းပဲ အားကိုးစရာရှိတော့ ဒါနဲ့ပဲလာတိုက်ရဲတော့တာ” လို့ သူကပြောပါတယ်။
တောင်စလုံးနဲ့ မြောက်သလုံးကျေးရွာတွေဘက်မှာ တိုက်ပွဲတွေဆက်တိုက်ဆိုသလိုဖြစ်နေတာကြောင့် ပြည်သူတွေလည်းနေရပ်မပြန်နိုင်သေးပဲ စစ်ရှောင်စခန်းတွေ၊ ဆွေမျိုးတွေ ရှိတဲ့ ကျေးရွာတွေမှာနေထိုင်နေကြရတယ်လို့ ဒေသခံတစ်ဦးက ပြောပါတယ်။
ရှမ်း-ကရင်နီနယ်စပ်ကတစ်ဆင့် ကင်နီပြည်နယ်ထဲကို စစ်ကြောင်းထိုးဖို့ကြိုးစားနေတဲ့ စစ်ကောင်စီနဲ့ PNOတပ်တွေကို တော်လှန်ရေး အင်အားစုတွေကို တိုက်ခိုက်နေကြတာဖြစ်ပြီး စစ်ကောင်စီက အင်အားတောက်လျှောက် ဖြည့်ကာ စစ်ကြောင်းထိုးနေလို့ တိုက်ပွဲတွေ ဆက်လက်ပြင်းထန်လာမယ်လို့ ပါဝင်တိုက်ခိုက်နေတဲ့ ရဲဘော်တစ်ဦးက ပြောပါတယ်။
MK-007