မဲခေါင်၊ သြဂုတ် ၂၉
ရှမ်းပြည်နယ် တောင်ပိုင်း၊ ပင်လောင်းမြို့၊ မြို့မစျေးမှာ မူးယစ်ဆေးကြောင်နေသူ တစ်ဦးက ဓားနဲ့ခုတ်လို့ မိခင်ဖြစ်သူ ကျောပိုးထားတဲ့ အသက် ၂ နှစ် အရွယ်သာ ရှိသေးတဲ့ ကလေးငယ် တစ်ဦး သေဆုံးခဲ့တယ်လို့ ဒေသခံတွေက ပြောပါတယ်။
ဒီကနေ့ မနက် ၉ နာရီခန့်မှာ မိဘနဲ့အတူ ပင်လောင်းစျေးကို လိုက်လာတဲ့ ကလေးငယ်ကို ဆေးကြောင်သူ တစ်ဦးက အကြောင်းအရင်း မရှိဘဲ ကလေးရဲ့ ဦးခေါင်းကို ဓားနဲ့ ခုတ်လိုက်တာလို့ ဆိုပါတယ်။
“ကလေးက သူ့မေမေ ကျောပေါ်ပိုးထားတာကို ယာဘဆေးကြောင်တဲ့သူ တစ်ယောက်က ကလေး ဦးခေါင်းကို ဓားနဲ့ခုတ်လိုက်တာ။ ဖြစ်ဖြစ်ချင်း ကလေးကို ဆေးရုံ ပို့သေးတယ်။ ဒါပေမယ့် ကလေးငယ် အသက်ကို မကယ်တင်နိုင်ခဲ့ဘူးဗျာ။ ဒီဖြစ်ရပ်က မူးယစ်ဆေးဝါး ပြဿနာက ဘယ်လောက်ကြီးနေပြီလဲ ဆိုတာ မီးမောင်းထိုးပြနေတယ်ဗျာ” လို့ ဖြစ်စဉ်ကို မြင်တွေ့ခဲ့တဲ့ ပင်လောင်းမြို့ခံ တစ်ဦးက ပြောပါတယ်။
ဓားနဲ့ အခုတ်ခံရတဲ့ ကလေးငယ်ဟာ ပင်လောင်းမြို့နယ်၊ ပင်သာကျေးရွာအုပ်စု၊ တဖျူဆျာရွာမှာ နေထိုင်သူတွေ ဖြစ်တဘ်လို့ သိရပါတယ်။
“ ဓားနဲ့ခုတ်သွားတဲ့ သူက ယာဘဆေး တအားသုံးစွဲလို့ ဆေးကြောင်ပြီး ကလေးရဲ့ ဦးခေါင်းကို ဓားနဲ့ ခုတ်သွားတာ။ ကလေးမိဘတွေတော့ ရင်ကျိုးရပြီပေါ့ဗျာ” လို့ နောက်ထပ် ပင်လောင်းမြို့ခံ တစ်ဦးက ပြောပါတယ်။
ကလေးကို ဓားနဲ့ခုတ်သူကိုတော့ ဒေသခံတွေ ဝိုင်းဝန်းဖမ်းဆီးပြီး ပင်လောင်းမြို့မ ရဲစခန်းကို ပို့ဆောင်ခားတယ်လို့ သိရပါတယ်။
CJ-002
#MeKongNews
#ပင်လောင်းမြို့မစျေး
#မူးယစ်ဆေး
#ပင်သာကျေးရွာအုပ်စု