မဲခေါင်၊ စက်တင်ဘာ ၁၂
မြန်မာ-ထိုင်း နယ်စပ်၊ ထိုင်းနိုင်ငံ၊ မယ်ဟောင်ဆွန်မြို့နယ်၊ စစ်ဘေးရှောင် စခန်းတွေမှာ ခိုလှုံနေတဲ့ ကရင်နီပြည်နယ်၊ မယ်စဲ့မြို့နယ်က စစ်ဘေးရှောင်တွေ နေရပ်ပြန်လာပြီးနောက် အကူအညီတွေ လိုအပ် နေတယ်လို့ အကူအညီပေးနေတဲ့ အဖွဲ့အစည်း တာဝန်ရှိသူတွေက ပြောပါတယ်။
အဲဒီ စစ်ဘေးရှောင်တွေဟာ စက်တင်ဘာလ အစပိုင်းကစပြီး တစ်သုတ်ပြီးတစ်သုတ် ပြန်လာတာဖြစ်ကာ လတ်တလော နေအိမ်တွေမှာ မနေထိုင်သေးဘဲ မယ်စဲ့မြို့နယ်က စစ်ဘေးရှောင် စခန်းတွေမှာ နေထိုင်နေတာကြောင့် အကူအညီ လိုအပ်နေတာလို့ အကူအညီ ပေးနေသူ တစ်ဦးက ပြောပါတယ်။
“ပြန်လာတာက သူတို့ ဆန္ဒလည်းပါတယ်။ ထိုင်းအာဏာပိုင်တွေက ဖိအားပေးတာလည်း ပါတာပေါ့။ ဟိုမှာ နေတော့ သူတို့က ထင်သလောက် အကူအညီ မရဘူး။ စားဝတ်နေရေးလည်း အဆင်မပြေဘူးပေါ့။ လောလောဆယ် ကိုယ့်အိမ်ကိုယ် ပြန်နေဖို့ ကျတော့လည်း တိုက်ပွဲက တစ်ချက်တစ်ချက် ထပစ်နေတော့ စခန်းတွေမှာပဲ ရှိသေးတယ်။ လိုတာတော့ အစစအရာရာ လိုတာပေါ့။ လောလောဆယ် အရေးပေါ် လိုတာကတော့ ရိက္ခာပါ” လို့ သူကပြောပါတယ်။
လတ်တလော စစ်ဘေးရှောင် စခန်းတွေမှာ ထိုင်းနယ်စပ်က ပြန်၀င်လာတဲ့ လူ ၆၀၀ ကျော်ရှိပြီး စားနပ်ရိက္ခာ အပြင် နေရာထိုင်ခင်း၊ အဝတ်အထည်၊ ဆေးနဲ့ ဆက်စပ် ပစ္စည်းတွေ လိုအပ်နေတယ်လို့ ဆိုပါတယ်။
လက်ရှိ မယ်စဲ့မြို့နယ်က စစ်ဘေးရှောင် စခန်းတွေ အတွက် ရိက္ခာကို ထိုင်းဘက်က အဓိက တင်သွင်းနေရပြီး ထိုင်းအာဏာပိုင်တွေရဲ့ ကန့်သတ်မှုကြောင့် မှောင်ခိုလမ်းကြောင်းကနေ ပို့ဆောင်နေရလို့ အခက်အခဲတွေ ရှိတယ်လို့ သိရပါတယ်။
“ပြည်တွင်း လမ်းကြောင်းက တိုက်ပွဲ ဖြစ်နေတော့ ဘယ်လိုမှ သယ်လို့ မရဘူး။ မယ်စဲ့မြို့ထဲမှာလည်း လူတွေက တစ်ယောက်မှ မရှိ၊ ဆိုင်တွေလည်း ပိတ်ထားရတော့ ထိုင်းဘက်ကို အဓိက အားကိုးနေရတာပေါ့။ သူတို့လည်း ကန့်သတ်တာတွေ ရှိတော့ တခါတလေ ပိုက်ဆံလေးဘာလေး ပေးရတာပေါ့။ နည်းနည်းပါးပါး ဆိုရင်တော့ မှောင်ခို သယ်ရတာပေါ့” ကူညီ ဆောင်ရွက်ပေးနေသူ တစ်ဦးက ရှင်းပြပါတယ်။
ပြီးခဲ့တဲ့ ဇွန်လ ၁၃ ရက်နေ့က မယ်စဲ့မြို့မရဲစခန်းကို ကရင်နီ တော်လှန်ရေး အင်အားစုတွေ သိမ်းယူပြီးနောက် တိုက်ပွဲတွေ ပြင်းထန်လာတာကြောင့် မယ်စဲ့၊ ဖားဆောင်း၊ ဘောလခဲ စတဲ့ မြို့နယ်တွေက ဒေသခံတွေ ထိုင်းနိုင်ငံ နယ်စပ်မြို့တွေနဲ့ ရှမ်းပြည်နယ် တောင်ပိုင်းက မြို့နယ်တွေမှာ ခိုလှုံနေရပြီး လူဦးရေ စုစုပေါင်း ၁၀,၀၀၀ ကျော် ရှိတယ်လို့ စုံစမ်း သိရှိရပါတယ်။
CJ-007
#MeKongNews
#မယ်စဲ့
#စစ်ဘေးရှောင်
#ထိုင်းနိုင်ငံ
