မဲခေါင်၊ ဇူလိုင် ၁၂
ကရင်နီပြည်နယ်ထဲကို စစ်ကောင်စီ တပ်မ ၄ ခု ဖြစ်တဲ့ တပ်မ (၄၄)၊ တပ်မ (၅၅)၊ တပ်မ (၆၆)၊ တပ်မ (၇၇) အပြင် ဘီးလူးစစ်ကြောင်းခေါ် တပ်မ (၉၉) တို့က အင်အားတွေ စုပေါင်းပြီး နေပြည်တော် ကာကွယ်ရေး အတွက် ထိုးစစ်ဆင်ဖို့ ပြင်ဆင်နေတယ်လို့ တော်လှန်ရေး သတင်းရင်းမြစ်က ပြောပါတယ်။
လက်ရှိ ကရင်နီပြည်နယ်ထဲမှာ နယ်မြေ အထိုင် တပ်မ အပါအဝင် တပ်မ ၅ ခုနဲ့ တခြား တပ်ရင်း ၅ ရင်း ရောက်ရှိနေပြီး မယ်စဲ့ တိုက်ပွဲ အတွင်း BGF က စစ်ကောင်စီကို သေနတ်ပြောင်း ပြန်လှည့်ပြီးနောက် တပ်အင်အား သိသိသာသာ တိုးလာတယ်လို့ ဆိုပါတယ်။
“ နေပြည်တော်နဲ့ ကျနော်တို့နဲ့က ပြောရရင် မဝေးဘူးဗျ။ ကျနော်တို့ စခန်းသိမ်းတာ များလေလေ သူတို့ စိုးရိမ်မှု ရှိလေလေပါ။ ကျနော်တို့လည်း တိုက်ခိုက်သိမ်းယူမူတွေကို နေပြည်တော်ထိ တားဂတ်(ပစ်မှတ်) ထားတယ် ဆိုတာကိုလည်း တရားဝင် ကြေငြာထားတော့ သူတို့ပိုပြီး ဒီဘက်ကို စစ်အင်အား တိုးချဲ့တာပါ။ ဒီလို တိုးချဲ့မှာကိုလည်း ကြိုတင် တွက်ဆထားပြီးသားပါ” လို့ တော်လှန်ရေး သတင်းရင်းမြစ်က ပြောပါတယ်။
ကရင်နီပြည် အခြေစိုက် ကာကွယ်ရေးတပ်တွေ နေပြည်တော်ကို သိမ်းပိုက်ဖို့ ပြင်ဆင်နေတဲ့အပေါ် စစ်ကောင်စီတပ်ဘက်က တန်ပြန် ထိုးစစ်ဆင်တာတွေ ပြုလုပ်လာနေတယ်လို့ သိရပါတယ်။
“ ကျနော်တို့နဲ့ ရင်ဆိုင်ရတာတွေလောက်ပေါ့နော်၊ တပ်မ (၆၆) လက်အောက်ခံတပ်နဲ့ များတယ်။ ဒီဘက်မှာ ပေါ့နော်။ မြို့ပေါ်မှာတော့ ၅၅ နဲ့ ၇၇ က လက်အောက်ခံတပ်ရှိမယ်။ ၄၄ ကတော့ ရှမ်းဘက်ကြောမှာ ရှိမယ်။ တပ်မ ၉၉ လက်အောက်ခံ တပ်ရင်း ဘီးလူးစစ်ကြောင်းနဲ့တော့ ကျနော်တို့ မရင်ဆိုင်ဖူးသေးဘူး။ သူတို့က စစ်ကိုင်းမှာတော်တော် ရက်စက်စွာ ပြုလုပ်ခဲ့တာတွေလည်း ကြားသိရပါတယ်” လို့ တော်လှန်ရေး ရဲဘော် တစ်ဦးက ရှင်းပြပါတယ်။
အခုလို အခြေအနေမှာ ရန်သူကို အထင်မသေးဘဲ အစစအရာရာ သတိ ဝိရိယထားပြီး အကောင်းဆုံး လုပ်ဆောင်သွားမယ်လို့ တော်လှန်ရေး ရဲဘော်တွေက ပြောပါတယ်။
လက်ရှိ ကရင်နီပြည်နယ် ဒေသအများစုမှာ တိုက်ပွဲတွေ ဖြစ်ပွားနေတဲ့ အတွက် ပြည်သူတွေ အနေနဲ့ အသိ သတိရှိကြဖို့နဲ့ ဗုံးခိုကျင်းတွေ တူးထားကြဖို့ ရဲဘော်တွေက တိုက်တွန်းထားပါတယ်။
CJ-004
#MekongNews
#နေပြည်တော်
#တပ်မ
#BGF
