မဲခေါင်၊ ဇူလိုင် ၁၀
ရှမ်းပြည်နယ် မြောက်ပိုင်း၊ ကွတ်ခိုင်မြို့နယ်၊ နမ့်ဖတ်ကာ အခြေစိုက် ခမရ (၁၂၃) တပ်က ဇူလိုင်လ ၉ ရက်နေ့၊ ညနေ ၆ နာရီခွဲ ကျော်ခန့်မှာ လက်နက်ကြီးနဲ့ ပစ်ခတ်ရာ အူရာဘွမ်ကောင်းလိမ်ကျေးရွာအုပ်စု၊ နားဖိုင်ရွာထဲ ကျရောက် ပေါက်ကွဲလို့ အမျိုးသမီးငယ် တစ်ဦး ထိမှန် ဒဏ်ရာရရှိသွားတယ်လို့ ဒေသခံတွေက ပြောပါတယ်။
မနေ့ည ၆ နာရီခွဲကျော်ခန့်မှာ စစ်တပ်က ပစ်ခတ်တဲ့ လက်နက်ကြီး ၄ လုံး ရွာထဲနဲ့ ရွာပြင်မှာ ကျရောက် ပေါက်ကွဲတာလို့ ဆိုပါတယ်။
“ နမ့်ဖတ်ကာ (၁၂၃) တပ်ကနေ ပစ်လိုက်တဲ့ လက်နက်ကြီးကျည် နားဖိုင်ရွာက ဦးလဒိန်အောင် ရဲ့ အိမ်မှာ လာကျတယ်။ သူ့သမီး ထိခိုက် ဒဏ်ရာရသွားတယ်။ ခိုမုန်း ကနေ ၃ မိုင်လောက်ဝေးတယ်။ အရှေ့ဘက်ပေါ့” လို့ ဒေသခံ တစ်ဦးက ပြောပါတယ်။၊
အဲဒီ ရွာအတွင်း နေအိမ်ထဲမှာ ရှိနေတဲ့ မဘောက်ဆန် ရဲ့ ခန္ဓာကိုယ် အနှံ့ ကျည်စတွေ ထိသွားပြီး ညီမ ဖြစ်သူလည်း ထိတယ်လို့ သူက ပြောပါတယ်။
“ နမ့်ဖတ်ကာ (၁၂၃) တပ်ကနေ ပစ်လိုက်တဲ့ လက်နက်ကြီးကျည် နမ့်ဖတ်ကာ နားဖိုင်ရွာရှိ စာသင်ကျောင်း အနီးမှာလည်း အိမ်တစ်လုံး ထိသွားတယ်။ ကလေး တစ်ယောက်ရှိတဲ့ အမျိုးသမီးကိုလည်း နဖူး၊ လက်နဲ့ ခြေထောက်တွေမှာ ထိသွားတယ်။ ဒဏ်ရာတော့ အရမ်းမပြင်းဘူး” လို့ ဒေသခံ အမျိုးသမီးက ပြောပါတယ်။
ထိခိုက်ဒဏ်ရာရတဲ့ လူနာကို လူမှုကူညီရေးအသင်းရဲ့ အကူအညီနဲ့ ဒီနေ့မှ ဆေးခန်းကို ပို့ဆောင်နိုင်ခဲ့ကာ လက်ရှိ ဆေးကုသမှု ခံယူနေတယ်လို့ ဆိုပါတယ်။
ကွတ်ခိုင်မြို့နယ်မှာ စစ်ကောင်စီတပ်က လက်နက်ကြီး မကြာခဏ ပစ်ခတ်မှုကြောင့် အနီးနားရှိ ရွာတွေမှာ ကျရောက် ပေါက်ကွဲကာ ထိခိုက် ဒဏ်ရာရသူတွေအပြင် နေအိမ်တွေ ထိခိုက်ပျက်စီးတာလည်း ရှိတယ်လို့ ဒေသခံတွေက ပြောပါတယ်။
ကွတ်ခိုင်မြို့နယ်အတွင်းမှာ စစ်ကောင်စီတပ်၊ ပြည်သူ့စစ်များနဲ့ မြောက်ပိုင်းညီနောင်တွေဖြစ်တဲ့ ကိုးကန့် MNDAAm ၊ TNLA ၊ KIA နဲ့ PDF တို့ လှုပ်ရှားနေပါတယ်။
Photo-Crd
CJ-008
#MekongNews
#နမ့်ဖတ်ကာ
#ခမရ(၁၂၃)
#လက်နက်ကြီး
