မဲခေါင်၊ အောက်တိုဘာ ၁၁
ရှမ်းပြည်နယ် မြောက်ပိုင်း၊ နမ့်ခမ်းမြို့မှာ အောက်တိုဘာလ ၉ ရက်နေ့က မူကြိုကလေးငယ် ပြန်ပေးဆွဲ သူတွေကို ပစ်ခတ် ဖမ်းဆီးရာ တစ်ဦးသေဆုံးပြီး ၂ ဦး အရှင် ဖမ်းမိတယ်လို့ ဒေသခံတွေနဲ့ TNLA သတင်း ပြန်ကြားရေးဌာနထံက သိရပါတယ်။
အောက်တိုဘာလ ၉ ရက်နေ့၊ မနက် ၉ နာရီခန့်က အမေဖြစ်သူ ကျောင်းသွားပို့စဥ် လမ်းမှာ ကလေးကိုလုပြီး ကားထဲဖမ်းထည့် မောင်းပြေးသွားတာလို့ ဒေသခံ အမျိုးသမီး တစ်ဦးက ပြောပါတယ်။
“ ကျောင်းသွားပို့တဲ့အချိန် လမ်းမှာ လုသွားတာ။ ကားနဲ့တင်ပြီး မောင်းပြေးသွားတာ” လို့ သူကပြောပါတယ်။
ဒီဖြစ်စဥ်ကို ဒေသခံတွေ တိုင်ကြားလို့ ပြန်ပေးဆွဲသွားတဲ့ ကား ၂ စီးကို TNLA က ပိတ်ဆို့ ဖမ်းဆီးရာမှာ အပြန်အလှန် ပစ်ခတ်မှု ဖြစ်ပွားခဲ့ပြီး ပြန်ပေးဆွဲသူ တစ်ဦးသေဆုံးကာ ၂ ဦး အရှင်ဖမ်းမိပြီး ကလေးငယ်ကို ကယ်တင်နိုင်ခဲ့တယ်လို့ PSLF/TNLA က ထုတ်ပြန်ထားပါတယ်။
ဖမ်းမိသူတွေဆီက Glock ပစ္စတိုသေနတ် ၂ လက်၊ Crown ကား ၂ စီး၊ ဖုန်း ၃ လုံး၊ မြန်မာငွေ သိန်း ၂၀ ကျပ်၊ တရုတ်ငွေ ၂၄၀ ယွမ်၊ မြန်မာနိုင်ငံသား မှတ်ပုံတင် ၃ ခုနဲ့ တရုတ်နိုင်ငံ ဝင်ခွင့်ဗီဇာကတ် ၂ ခု သိမ်းဆည်း ရရှိထားတယ်လို့ ထုတ်ပြန်ချက်မှာ ဖော်ပြထားပါတယ်။
ရှမ်းမြောက်က နယ်စပ်မြို့တွေမှာ ပြန်ပေးဆွဲတဲ့ အဖွဲ့တွေ အများအပြား ရှိနေပြီး ဖုန်းဆက် ခြိမ်းခြောက် ငွေတောင်းတာ၊ ပြန်ပေးဆွဲ တာတွေ မကြာခဏ ဖြစ်နေတယ်လို့ ခြိမ်းခြောက် ငွေညှစ် ခံခဲ့ရသူ တစ်ဦးက ပြောပါတယ်။
“ တောက လူတွေ မဟုတ်ဘူး။ အခုက မြို့က ကလေးတွေပဲ။ အဖွဲ့ဖွဲ့ ပြီး ပြန်ပေးဆွဲနေတာ။ တရုတ်ကလေးတွေ များတယ်။ သူတို့မှာ ခေါင်းဆောင်ရှိတယ်” လို့ သူက ပြောပါတယ်။
ပြန်ပေးဆွဲနေတဲ့ အုပ်စုတွေဟာ အသက် ၁၅ နှစ်ကနေ ၃၀ ကြား အရွယ်တွေဖြစ်ပြီး ၅ ဦးခန့် စုဖွဲ့ထားကာ သေနတ်တွေ ကိုင်ဆောင် ပြန်ပေးဆွဲလေ့ ရှိတယ်လို့ ဆိုပါတယ်။
ပြီးခဲ့တဲ့ စက်တင်ဘာလကနေ လက်ရှိအချိန်အထိ မုံးကိုး၊ ပန်ဆိုင်း၊ ၁၀၅ မိုင်၊ မူဆယ်၊ နမ့်ခမ်း ဒေသတွေမှာ လုပ်ငန်းရှင်တွေ အပါအဝင် ပြန်ပေးဆွဲ ခံရသူ ၁၀ ဦး ကျော်ရှိပြီး မြန်မာငွေ ကျပ်သိန်းတစ်သောင်းခွဲ အထိ ပေးကာ ရွေးယူခဲ့ရသူတွေ ရှိခဲ့တယ်လို့ ဒေသခံတွေက ပြောပါတယ်။
CJ-008
#MeKongNews
#နမ့်ခမ်းမြို့
#TNLA
#ပစ္စတိုသေနတ်
