မဲခေါင်၊ ဩဂုတ် ၆
ရှမ်းပြည်နယ် တောင်ပိုင်း၊ ဓနုကိုယ်ပိုင် အုပ်ချုပ်ခွင့်ရဒေသ၊ ရွာငံမြို့နယ်၊ ပင်းတယမြို့နယ် အပါအဝင် အဲဒီမြို့နယ်တွေနဲ့ ထိစပ်တဲ့ ဒေသတွေမှာ ဇူလိုင်လ ၂၉ရက်ကနေ ဩဂုတ်လ ၆ ရက်နေ့အထိ စစ်ကောင်စီတပ်ရဲ့ ဖမ်းဆီးခြင်းခံရတဲ့ အရပ်သားပေါင်း ၂၀ ကျော်အထိ ရှိပြီလို့ ဒေသတွင်း သတင်းအရင်းအမြစ်တွေက ပြောပါတယ်။
ဇူလိုင်လ ၂၉ ရက်နေ့ ဓနုပြည်သူ့ လွတ်မြောက်ရေးတပ်ဦး – DPLF ဖွဲ့စည်းပြီးတဲ့ နောက်ပိုင်းကစပြီး တစ်ပတ်ကျောက်အတွင်း ဆက်စပ သံသယရှိမှုတွေနဲ့ အခုလို ဖမ်းဆီးခံရတာလို့ ဒေသခံတွေက ဆိုပါတယ်။
“ဘာမှမဆိုင်ဘူး။ နိင်ငံရေးနဲ့လည်း မပတ်သက်ဘူး။ ဖမ်းချင်လို့ကို ဖမ်းတာ။ ဖြဲခြောက်တာပေါ့” လို့ ပင်းတယမြို့၊ ရွာသစ်ရပ်ကွက်မှာ နေထိုင်သူ တစ်ဦးက ပြောပါတယ်။
ပင်းတယမြို့နယ်ထဲမှာ ဩဂုတ် ၅ ရက်နေ့က ဇော်ဂျီကျေးရွာနေ ဦးအောင်မိုး၊ ဩဂုတ်လ ၄ ရက်နေ့က ညောင်ဝိုင်းကျေးရွာနေ ဦးကျော်သိန်းနဲ့ ကိုဟန်ဝင်းသူ၊ ဇူလိုင်လ ၂၉ ရက်နေ့က ရွာသစ် ရပ်ကွက်နေ ဦးမျိုးသန့် အပါအဝင် မိသားစု ၇ ဦးနဲ့ ဈေးတန်းရပ်ကွက်က ကိုနောင်နောင် စုစုပေါင်း ၁၁ ဦးကို စစ်ကောင်စီတပ်တွေက ဖမ်းဆီးသွားခဲ့ပါတယ်။
ဇူလိုင်လ ၂၉ ရက်နေ့မှာပဲ ရွာငံမြို့နယ်ထဲက ပဲရင်းတောင်နဲ့ လွှစင်ကျေးရွာတို့မှာ ကိုသန်းစိုး၊ ကိုဝင်းသိန်းတို့အပြင် နောက်ထပ် အရပ်သား ၂ ဦး စုစုပေါင်း ၄ ဦးကို စစ်ကောင်စီတပ်တွေက ဖမ်းဆီးခဲ့ပါသေးတယ်။
ဒါ့အပြင် ဩဂုတ်လ ၁ ရက်နေ့ကလည်း ပင်းတယ – ရပ်စောက် အစပ်၊ ရပ်စောက်မြို့နယ်၊ ကောင်းဘို့ကျေးရွာမှာ အမျိုးသမီး တစ်ဦး ဖမ်းဆီးခံခဲ့ရပြီး ကွင်းဆက်အနေနဲ့ ဩဂုတ် ၂ ရက်မှာပဲ သူရဲ့ မိသားစုဝင် ၄ ဦး စုစုပေါင်း ၅ ဦး ထပ်ပြီး ဖမ်းဆီးခံလိုက်ရတယ်လို့ ဆိုပါတယ်။
အခု ဖမ်းဆီးခံရတဲ့ အရပ်သား ၂၀ ဦးကို ဘယ်မှာ ချုပ်နှောင်ထားတယ်ဆို မသိရသေးသလို အဆက်အသွယ်လည်း မရသေးတာကြောင့် မိသားစုဝင်တွေက စိုးရိမ် ပူပန်နေကြပါတယ်။
ဓနုဒေသနဲ့ ထိစပ်နေတဲ့ သာစည် – ရွာငံ အစပ်၊ သာစည်မြို့နယ်၊ ကုန်းဘော်ကျေးရွာမှာလည်း ဦးဝင်းမောင် ဒေါ်မဦးတို့ ဇနီးမောင်နှံ ၂ ဦးကို မနေ့ (ဩဂုတ် ၅)ရက်နေ့က ပျူစောထီးတစ်ဦးဟာ ဓါးပြတိုက်ခဲ့ပြီး သူတို့ ၂ ဦးလုံးကို ဓါးနဲ့ ခုတ်သတ်ခဲ့တယ်လို့ ဒေသတွင်း သတင်းအရင်းအမြစ်တွေက ပြောပါတယ်။
CJ – 007
#MeKongNews
#DPLF
#စစ်တပ်
