မဲခေါင်၊ ဩဂုတ် ၃၁
ကရင်နီပြည်နယ်၊ ဒီးမော့ဆိုမြို့နယ်မှာ ဒေသခံ ပြည်သူတွေနဲ့ စစ်ဘေးရှောင်တွေ နေထိုင်တဲ့ စခန်းတွေကို စစ်တပ်က ဒီနေ့ ဩဂုတ်လ ၃၁ ရက် မနက်ပိုင်းမှာ လေကြောင်းက ဗုံးကြဲ တိုက်ခိုက်ခဲ့တယ်လို့ KNDF ဗဟို သတင်းနဲ့ပြန်ကြားရေးက ထုတ်ပြန်ပါတယ်။
ဒီကနေ့ မနက် ၆ နာရီဝန်းကျင်မှာ ဒီးမော့ဆိုမြို့နယ် အရှေ့ဘက်ခြမ်းရှိ စစ်ရှောင်စခန်းကို ဗုံးကြဲခဲ့တာကြောင့် စာသင်ကျောင်း အနီးမှာရှိတဲ့ အရပ်သား တစ်ဦး သေဆုံးပြီး ၂ ဦး ဒဏ်ရာရခဲ့တယ်လို့ KNDF က ဆိုပါတယ်။
“လေယာဉ် ၂ စီးနဲ့ လာပတ်ပြီးမှ ဗုံးကြဲသွားတာ။ စစ်ဘေးရှောင် အမျိုးသား တစ်ဦး ဗုံးထိပြီး ဆုံးသွားတယ်။ စာသင်ကျောင်းလည်း ထိခိုက်ပျက်စီးသွားတယ်လို့ ပြောတယ်။ အခု ဗုံးကြဲခံရတဲ့နေရာက တိုက်ပွဲဖြစ်တဲ့ နေရာနဲ့လည်း ဝေးတယ်။ တိုက်ပွဲနဲ့လည်း မဆိုင်ဘူး။ စစ်ဘေးရှောင် ပြည်သူတွေကို တမင်သက်သက် ဗုံးကြဲ တိုက်ခိုက်သွားတာမျိုးလို့ ပြောလို့ရတယ်” စစ်ဘေးရှောင် ပြည်သူတွေကို ကူညီနေသူ တစ်ဦးက ပြောပါတယ်။
အဆိုပါ တိုက်ခိုက်မှု အတွင်း တိုက်လေယာဉ် ၂ စီးက ဗုံး ၉ လုံး ကြဲချခဲ့တာဖြစ်ပြီး ကျရောက် ပေါက်ကွဲတဲ့ နေရာတဝိုက်က စာသင်ကျောင်းနဲ့ စစ်ရှောင်တဲတချို့ ထိခိုက်ပျက်စီး ခဲ့တယ်လို့ သိရပါတယ်။
ဒါ့အပြင် ဒီကနေ့ မနက် ၄ နာရီကျော်ကလည်း ဒီးမော့ဆိုမြို့နယ် အနောက်ဘက်ခြမ်းကို စစ်ကောင်စီက တိုက်လေယာဉ်နဲ့ ၃ ကြိမ် ဗုံးကြဲတိုက်ခိုက် ခဲ့ပါသေးတယ်။
ဒီတိုက်ခိုက်မှုမှာတော့ လူထိခိုက်မှု မရှိဘဲ နေအိမ် အဆောက်အအုံ တချို့ ထိခိုက်ပျက်စီး ခဲ့တယ်လို့ သိရပါတယ်။
ဒီမနက် စစ်ကောင်စီ ကြဲချတဲ့ ဗုံးတစ်လုံးဟာ ပေါက်ကွဲမှု မရှိတာကို တွေ့ရှိရတယ်လို့ စစ်ဘေးရှောင်တွေကို ကူညီနေတဲ့ ကမ်းလက် ပရဟိတအဖွဲ့က ထုတ်ပြန်ထားပါတယ်။
စစ်ကောင်စီ ဗုံးကြဲ တိုက်ခိုက်တဲ့ အဲ့ဒီနေရာတွေဟာ ပြည်သူတွေ နေထိုင်တဲ့ ကျေးရွာတွေနဲ့ အရပ်သား စစ်ရှောင်တွေ နေထိုင်တဲ့ နေရာတွေ ဖြစ်တာကြောင့် စစ်တပ်က အရပ်သားတွေကို ရန်သူသဖွယ် ပစ်မှတ်ထား တိုက်ခိုက်တာဟာ စစ်ရာဇဝတ်မှုတွေကို ပေါ်ပေါ်ထင်ထင် ကျူးလွန်နေတာလို့ KNDF ရဲ့ ထုတ်ပြန်ချက်မှာ ဖော်ပြထားပါတယ်။
လက်ရှိ ကရင်နီပြည်နယ်၊ ဒီးမော့ဆို၊ ဖရူဆို၊ ဖားဆောင်း၊ မယ်စဲ့ စတဲ့ မြို့နယ်တွေမှာ စစ်တပ်နဲ့ တော်လှန်ရေး အင်အားစုတွေ တိုက်ပွဲ ပြင်းထန်နေပြီး ဆက်သွယ်ရေး ဖြတ်တောက် ခံထားရတာကြောင့် အခြေအနေ အသေးစိတ် သိရဖို့ မဲခေါင်သတင်းဌာန အနေနဲ့ ဆက်သွယ် စုံစမ်းနေဆဲ ဖြစ်ပါတယ်။
စစ်ကောင်စီဟာ မြေပြင်တိုက်ပွဲမှာ အကျအဆုံးများနေလို့ လူထုကို ရန်သူလို့ သတ်မှတ်ပြီး ဗုံးကြဲ တိုက်ခိုက်တာ၊ နေအိမ် မီးရှို့တာတွေ လုပ်နေတာကြောင့် စစ်ဘေးရှောင် ပြည်သူများအနေနဲ့ လေယာဉ်သံ ကြားပါက အကာအကွယ် ယူထားဖို့ အရေးကြီးတယ်လို့ စစ်ဘေးရှောင် ပြည်သူတွေကို ကူညီနေသူ တစ်ဦးက ပြောပါတယ်။
စစ်အာဏာသိမ်းချိန်ကစပြီး ကရင်နီပြည်နယ်ကို စစ်တပ်က လေကြောင်းကနေ ၅၇၂ ကြိမ်ထက်မနည်း ဗုံးကြဲခဲ့တယ်လို့ တိုးတက်သော ကရင်နီပြည်သူ့အင်အားစု-PKPF က အခုနှစ် ဩဂုတ်လ ၁ ရက်မှာ ထုတ်ပြန်ထားပါတယ်။
CJ-002 MK-009
#MeKongNews
#ဒီးမော့ဆိုမြို့နယ်
#ဗုံးကြဲ
#စစ်ဘေးရှောင်