မဲခေါင်၊ ဩဂုတ် ၁၅
တော်လှန်ရေး ကာလ အတွင်း ကရင်နီပြည်ရှိ ကျောင်းနေအရွယ် ကလေးများ ပညာသင်ကြားခွင့် ရရှိရေး အတွက် ဆောင်ရွက်မယ်လို့ ကရင်နီပြည် ကြားကာလ အုပ်ချုပ်ရေး ကောင်စီ-IEC က ပြောပါတယ်။
ဒီကနေ့ ထုတ်လွှင့်တဲ့ IEC ပညာရေးဌာနရဲ့ လုပ်ဆောင်ချက်များ ပြည်သူသို့ တင်ပြခြင်း အစီအစဉ်မှာ IEC တာဝန်ရှိသူ တစ်ဦးက အခုလို ပြောကြားခဲ့တာ ဖြစ်ပါတယ်။
“တစ်ချိန်ထဲမှာပဲ အုပ်ချုပ်ရေးစနစ်များကို ဖော်ဆောင်ပြီး အရေးတကြီး လိုအပ်နေတဲ့ လူထု ဝန်ဆောင်မှု လုပ်ငန်းတွေထဲက တစ်ခုဖြစ်တဲ့ ပညာရေး ကဏ္ဍကို အားပေးမြှင့်တင်တာကလည်း တော်လှန်ရေး အမြန် ပြီးမြောက် အောင်မြင်ဖို့ရာ အထောက်အပံ့ ဖြစ်စေပါတယ်။ ဒါကြောင့် ကရင်နီပြည် ကြားကာလ အုပ်ချုပ်ရေး ကောင်စီ အနေနဲ့ ယခု တော်လှန်ရေး ကာလမှာ ကရင်နီပြည်ရှိ ကျောင်းနေအရွယ် ကလေးများ ပညာသင်ကြားခွင့် ရရှိရေး အတွက် တတ်စွမ်းသမျှ ကြိုးပမ်း ဆောင်ရွက်သွားမှာ ဖြစ်ပါတယ်” လို့ IEC တာဝန်ရှိသူက ပြောပါတယ်။
IEC အနေနဲ့ ၂၀၂၃-၂၄ ပညာသင်နှစ်နဲ့ ၂၀၂၄-၂၅ ပညာသင်နှစ်တွေမှာ ဆရာ၊ ဆရာမ ၃,၅၀၀ ဦးအတွက် အခြေခံ ထောက်ပံ့ကြေးတွေ ပေးအပ်နိုင်ဖို့ စီစဉ်ဆောင်ရွက် နေတယ်လို့ ဆိုပါတယ်။
အဲ့ဒီလို ပညာသင်ကြားနိုင်ရေး ကရင်နီပြည်တွင်းရှိ မြို့နယ် ပညာရေးဘုတ်အဖွဲ့များ၊ ဆရာ ဆရာများ သမဂ္ဂ၊ ကျောင်းသား သမဂ္ဂ၊ ယာယီ တက္ကသိုလ် ကောင်စီ၊ တိုင်းရင်းသားပညာရေးဌာနတွေအပြင် ကရင်နီပြည်အတွင်း ပညာရေးလုပ်ငန်း ဆောင်ရွက်နေတဲ့ အစုအဖွဲ့တွေနဲ့ ချိတ်ဆက် ပူးပေါင်း ဆောင်ရွက်မယ်လို့ IEC ကပြောပါတယ်။
ကရင်နီပြည်နယ် အတိုင်ပင်ခံကောင်စီ-KSCC ရဲ့ ကြားကာလ အစီအမံပါ ပညာရေးဆိုင်ရာ ပြဌာန်းချက်တွေနဲ့ အညီ ကြားကာလ အတွင်း ပညာရေးလုပ်ငန်းတွေကို ပညာရေး အင်အားစု အသီးသီးနဲ့ ပူးပေါင်း အကောင်အထည်ဖော်မယ်လို့ IEC က ကြေညာပါတယ်။
ဒါအပြင် ကျောင်းသူ ကျောင်းသားတွေနဲ့ ဆရာ ဆရာမတွေ လိုအပ်နေတဲ့ ကျောင်းသုံး ဖတ်စာအုပ်များ၊ ဆရာကိုင် သင်ရိုးစာအုပ်များကို ထောက်ပံ့မှာဖြစ်ပြီး ကျောင်းစီမံခန့်ခွဲမှု လုပ်ငန်း အတွက် လိုအပ်တဲ့ ရံပုံငွေများကိုလည်း ဖြည့်ဆည်းပေးဖို့ ကြိုးပမ်းနေတယ်လို့ IEC ကပြောပါတယ်။
တော်လှန်ရေး စတင်ချိန်ကစလို့ လက်ရှိအချိန်ထိ CDM ပြုလုပ်ပြီး ကျောင်းသူ ကျောင်းသားတွေ ပညာသင်ကြားမှု မပြတ်လပ်ဖို့ အနစ်နာခံ ဆောင်ရွက်နေတဲ့ ဆရာ ဆရာမတွေနဲ့ လက်ရှိ ခက်ခဲနေတဲ့ ကာလမှာ စေတနာ့ ဝန်ထမ်း ဆရာ ဆရာမတွေရဲ့ ကြိုးပမ်းမှု ပူးပေါင်းဆောင်ရွက်မှုတွေကိုလည်း မမေ့မလျော့ အသိအမှတ် ပြုတယ်လို့လည်း IEC ကဆိုပါတယ်။
ကရင်နီပြည် ကြားကာလ စီမံအုပ်ချုပ်ရေး ကောင်စီ အနေနဲ့ အကောင်အထည်ဖော်မယ့် လုပ်ငန်းများ အတွက် ဦးစားပေး ဌာန ၇ ခုကို ဖွဲ့စည်းပြီး စတင် အကောင်အထည်ဖော်နေတာ ဖြစ်ပါတယ်။
CJ-002
#MekongNews
#ကရင်နီပြည်
#IEC
#တော်လှန်ရေး