မဲခေါင်၊ စက်တင်ဘာ ၂
ကရင်နီပြည်နယ်၊ ဖရူဆိုမြို့နယ်နဲ့ ဘောလခဲမြို့နယ်ကြားမှာ စစ်ကောင်စီနဲ့ တော်လှန်ရေးတပ်တွေ တိုက်ပွဲ ပြင်းထန်နေလို့ စစ်တပ် ရိက္ခာယာဥ်တန်း ဖရူဆိုမြို့ထဲမှာ သောင်တင်နေတယ်လို့ ဒီးမော့ဆို PDF တွဲဖက် ပြန်ကြားရေးမှူး ခွန်းဖရန့်စစ် က မဲခေါင်သတင်းဌာနကို ဒီကနေ့ ပြောပါတယ်။
ဖရူဆို-ဘောလခဲကြား၊ ထားလဲကျေးရွာ အနီးတစ်၀ိုက် စစ်ကောင်စီ အင်အား ၃၀၀ ထက်မနည်း အသုံးပြု ထိုးစစ်ဆင်နေပြီး မယ်စဲ့နဲ့ ရှားတောဘက် ပို့ဆောင်မဲ့ ရိက္ခာယာဥ် ၃၀ ကျော် လုံခြုံဖို့ ကြိုးစားနေပေမဲ့ တော်လှန်ရေးတပ်ဖွဲ့တွေရဲ့ တိုက်ခိုက်မှုကြောင့် ယာဥ်တန်း ရှေ့မဆက်နိုင် ဖြစ်နေတယ်လို့ ဆိုပါတယ်။
“လက်ရှိ တိုက်ပွဲက ဖရူဆိုနဲ့ ဘောလခဲကြားမှာ ပြင်းထန်ပြီး စစ်ကောင်စီနဲ့ ရိက္ခာယာဥ်တန်းတွေက လက်ရှိ ဖရူဆိုမြို့ထဲမှာ ရှိပါသေးတယ်။ တိုက်ပွဲဖြစ်တဲ့ နေရာမှာဆို အင်အား ၃၀၀ အထက်ပဲ စကစ က။ ပြည်သူတွေတော့ မရှိပါဘူး” လို့ ကိုခွန်းဖရန့်စစ် ကရှင်းပြပါတယ်။
အဆိုပါ စစ်ကား ၃၀ ကျော်ဟာ လွိုင်ကော်ကနေ မယ်စဲ့နဲ့ ရှားတောဘက် ဦးတည်နေတဲ့ စစ်ယာဥ်တန်းထဲက ဖြစ်ပြီး လက်ရှိ ဖရူဆိုမြို့ထဲမှာ ရပ်တန့်ထားကာ စစ်ကားတွေကို မိုးကာအုပ်ထားလို့ ဘာတွေ တင်ဆောင်လာတယ် ဆိုတာ တိတိကျကျ မသိနိုင်ဘူးလို့ ဆိုပါတယ်။
အရင်က လွိုင်ကော်က လာတဲ့ စစ်တပ် ထောက်ပို့ယာဥ်တွေဟာ မယ်စဲ့၊ ရှားတော ဘက်ကို အများဆုံး တစ်ရက်သာ သွားရပေမဲ့ တော်လှန်ရေး အင်အားစုတွေက နယ်မြေ စိုးမိုးလာပြီးနောက် တိုက်ပွဲနဲ့ စစ်ရေး အခြေအနေပေါ် မူတည်ပြီး ရက်အတန်ကြာ ပိတ်မိလေ့ရှိတယ်လို့ သိရပါတယ်။
ကရင်နီ စစ်ရေး သတင်းရင်းမြစ် တစ်ဦး ကတော့ “ဟိုလို ပိတ်မိတယ် ဆိုတာထက် နယ်မြေ အခြေအနေကို ကြည့်တဲ့ သဘောပါပဲ။ တိုက်ပွဲတွေကြား သူတို့ (စစ်ကောင်စီယာဥ်တန်း) လည်း ဖြတ်ဖို့ မရဲဘူးလေနော်။ တိုက်ပွဲမှာတော့ လောလောဆယ် သိရသလောက်ကတော့ ကျွန်တော်တို့ဘက်ကလည်း ထိခိုက် ကျဆုံးမှုရှိတယ်။ ဒါပေမဲ့ စကစ ဘက်က ထိခိုက် သေဆုံးမှု ပိုများတယ်။ ထိုးစစ်နဲ့ ခံစစ်က ခံစစ် ပိုသာတယ်လေ” လို့ သူက ရှင်းပြပါတယ်။
လက်ရှိ ကရင်နီ တော်လှန်ရေးတပ်ဖွဲ့တွေရဲ့ တိုက်ခိုက်မှုကြောင့် စစ်ယာဥ်တန် အနည်းငယ် ရှေ့ဆက်နိုင်ဖို့ လက်နက်ကြီးနဲ့ ပစ်ကူယူနေရသလို လေကြောင်း တိုက်ခိုက်မှုတွေလည်း ရှိတယ်လို့ သူကဆိုပါတယ်။
အဆိုပါ တိုက်ပွဲ အခြေအနေ၊ ၂ ဖက် ထိခိုက် ကျဆုံးမှုတွေနဲ့ ပတ်သက်ပြီး အသေးစိတ် သိရှိနိုင်ဖို့ ဘောလခဲ PDF နဲ့ ဖရူဆို PDF တို့ကို မဲခေါင်သတင်းဌာန အနေနဲ့ ဆက်သွယ် မေးမြန်းနေပေမဲ့ လတ်တလော ဖုန်းလိုင်းတွေ ပြတ်တောက်နေပါတယ်။
ဖရူဆို-ဘောလခဲကြား တိုက်ပွဲ အတွင်း စစ်ကြောင်းမှူး ကာဗြေလယ် စက်တင်ဘာ ၂၇ ရက်က ကျဆုံးခဲ့တယ်လို့ ကရင်နီ အမျိုးသားများ ကာကွယ်ရေးတပ်ဖွဲ့-KNDF တပ်ရင်း (၅) က ထုတ်ပြန်ထားပါတယ်။
MK-007
#MekongNews
#ဖရူဆို-ဘောလခဲ
#ရိက္ခာယာဥ်တန်း
#KNDF