မဲခေါင်၊ ဇွန် ၂၆
ရှမ်း-ကရင်နီ နယ်စပ်နဲ့ ကရင်နီပြည်နယ်တွင်းမှာ မိုးရာသီ လမ်းပန်း ဆက်သွယ်ရေး ခက်ခဲမှုနဲ့ တိုက်ပွဲ တွေကြောင့် ဆန်နဲ့ စားသောက်ကုန် ဈေးနှုန်းတွေ အားလုံး အဆမတန် မြင့်တက်နေပြီး ဝယ်ယူရ ခက်ခဲနေတယ်လို့ ဒေသခံတွေနဲ့ စစ်ရှောင်ကူညီသူတွေက မဲခေါင်သတင်းဌာနကို ပြောပါတယ်။
ရှမ်း-ကရင်နီနယ်စပ်က ဖယ်ခုံ၊ မိုးဗြဲဒေသတွေမှာ အခုရက်ပိုင်း တိုက်ပွဲတွေ ဆက်တိုက် ဖြစ်နေပြီး ကရင်နီပြည်နယ်ကို စစ်တပ်က လမ်းပန်း ဆက်သွယ်ရေး ဖြတ်တောက်ထားတာတွေကြောင့် ဆန်နဲ့ စားသောက်ကုန် ဈေးနှုန်းတွေ ပိုပြီး မြင့်တက်လာတယ်လို့ စစ်ရှောင် ကူညီသူတွေက ဆိုပါတယ်။
အဆိုပါဒေသတွေမှာ ဒေသတွင်း ဆန်ဖြစ်တဲ့ ရွှေအပ် ဆန်တစ်အိတ် ၈၀,၀၀၀ ကျော်ဖြစ်နေပြီး အာလူး တစ်ပိဿာ ၄,၀၀၀ ကျပ်၊ ကြက်ဥ ၃ လုံး တစ်ထောင်ကျပ်အထိ ပေးရတဲ့အပြင် လိုသလောက် ဝယ်မရဘူးလို့ သိရပါတယ်။
“ရွှေအပ်ဆန်က ကျွန်တော် ဒီဘက်စရောက်တုန်းက စဝယ်တာတော့ ၂၈,၅၀၀၊ နည်းနည်းကောင်းတာက ၃၂,၀၀၀ အဲ့ဒါက ပထမ စလှူတုန်းက။ ၂၁၂၁ ကုန်လောက်ကျတော့ ၃ သောင်းခွဲ၊ အဲ့နောက်ပိုင်း တဖြည်းဖြည်းနဲ့ ခုဈေးဖြစ်သွားတာပဲ။ အဲ့ဒါတောင် လိုသလောက် ဝယ်လို့ မရဘူး” လို့ ဒီးမော့ဆိုမြို့နယ်မှာ စစ်ရှောင် ကူညီနေတဲ့ အမျိုးသား တစ်ဦးက ဆိုပါတယ်။
ကရင်နီပြည်နယ်ဟာ တောင်ကုန်းတောင်တန်း ပေါများပြီး သွားလာရေး ခက်ခဲတာအပြင် နေရာအနှံ့မှာ စစ်ရေး ပဋိပက္ခတွေကြောင့် အသုံးပြုလို့ မရတဲ့ လမ်းတွေ ပိုများလာရာ မိုးတွင်း ရောက်လာတာနဲ့အမျှ ဆန်၊ ဆီ၊ ဆား၊ ဆေး ရိက္ခာဝင်တဲ့ လမ်းတွေ ပိုရှားပါးလာတယ်လို့ သူကဆိုပါတယ်။
ဒါ့အပြင် လယ်ယာစိုက်ပျိုးရေး အများဆုံးလုပ်တဲ့ မိုးဗြဲဒေသနဲ့ ဒီးမော့ဆိုမြို့နယ်က ဒေသခံတွေဟာ အာဏာသိမ်းပြီး နောက်ပိုင်း ပေါ်ပေါက်လာတဲ့ စစ်ရေး ပဋိပက္ခတွေကြောင့် နေရပ်စွန့်ခွာ စစ်ဘေးရှောင် နေရလို့ အခုလို ဆန်ဈေးနှုန်းတွေ မြင့်တက်လာတာလို့လည်း စစ်ရှောင်ကူညီသူတွေက သုံးသပ်ကြပါတယ်။
တိုက်ပွဲဖြစ်ပွားခြင်း မရှိဘဲ စစ်ရှောင်တွေ လာရောက်မှီခို နေထိုင်တဲ့ လွိုင်ကော်မြို့ပေါ်မှာလည်း ကြက်သွန်နီ၊ အာလူး တစ်ပိဿာ ကျပ် ၃,၀၀၀ ဝန်းကျင်ရှိနေပြီး ခရမ်းချဉ်သီး တစ်ပိဿာ ၂,၀၀၀ ကျပ် ဒေသဆန်ဖြစ်တဲ့ ရွှေအပ်၊ တရုတ်မွေး၊ ရွှေရင်အေးဈေးတွေက အရင်လ ၇၈,၀၀၀ ကျပ်ကနေ မနေ့က ၈၂,၀၀၀ ကျပ်၊ ဗမာဆန် ၇၂,၀၀၀ ကျပ်နဲ့ ရွှေသီဟ ၉၂,၀၀၀ ကျပ်အထိ ရှိလာတယ်လို့ မြို့ခံတစ်ဦးက ပြောပြပါတယ်။
“ဒေသဆန်တွေက လတိုင်းနည်းနည်းချင်း တက်လာတာ။ အများစု စစ်ရှောင်တွေက ဆန်ပျော့စားကြတော့ ဗမာဆန် မစားနိုင်သူတွေရှိတယ်။ WFP က ဝေတဲ့ဆန်က မာလို့မစားနိုင်ဘူးဆိုပြီး ဆိုင်မှာ ပြန်ရောင်းတာ ၆ သောင်းရတယ်။ အဲ့ငွေနဲ့ သူတို့စားနိုင်တဲ့ဆန် ပြန်ဝယ်စားကြရတယ်” လို့ လွိုင်ကော်မြို့ခံ တစ်ဦးက ဆိုပါတယ်။
အာဏာသိမ်း စစ်ကောင်စီဟာ ကရင်နီပြည်နယ်က ဒီးမော့ဆို၊ ဖရူဆို၊ ဘောလခဲနဲ့ ရှားတောမြို့နယ်တွေကို စစ်အုပ်ချုပ်ရေး ကြေညာပြီး ဖြတ်လေးဖြတ်စနစ် ကျင့်သုံးကာ တော်လှန်ရေးအဖွဲ့တွေကိုရော ပြည်သူတွေကိုပါ ရိက္ခာလမ်းကြောင်းတွေ ဖြတ်တောက်ထားတယ်လို့ ကရင်နီ စစ်ရေး သတင်းရင်းမြစ်တွေက ဆိုကြပါတယ်။
လူဦးရေ ၃ သိန်း ဝန်းကျင်သာရှိတဲ့ ကရင်နီပြည်နယ်တွင်းမှာ စစ်ဘေးရှောင် ဦးရေ ၂ သိန်းဝန်းကျင် ရှိနေပြီး အဆိုပါ စစ်ရှောင်တွေအတွက် စားနပ်ရိက္ခာအပါအဝင် လူသားချင်း စာနာမှုဆိုင်ရာ အကူအညီတွေ ထိထိရောက်ရောက် ကူညီဖို့ အပ်နေတယ်လို့လည်း စစ်ရှောင်ကူညီသူတွေက ပြောပါတယ်။
MK-009
#MekongNews
#ကရင်နီပြည်
#ကုန်ဈေးနှုန်း
#စစ်ဘေးရှောင်