မဲခေါင်၊ မတ် ၁၆
ရှမ်းပြည်တောင်ပိုင်း၊ ဆီဆိုင်မြို့နယ်၊ ထမ်းယံရွာရှိဘုန်းတော်ကြီးကျောင်း စစ်ကောင်စီက ဗုံးကြဲတိုက်ခိုက်လို့ ကျောင်းဆောင်တွေ ပျက်စီးသွားသလို ကိုရင် ၂ ပါးလဲ ထိခိုက်ဒဏ်ရာရတယ်လို့ မြေပြင်သတင်းတွေအရ သိရပါတယ်။
ဆီဆိုင်မြို့ရဲ အရှေ့မြောက်ဘက် မိုင် ၃၀ လောက်အကွာမှာ ရှိတဲ့ ထမ်းယံ ရွာကို ယနေ့မတ်လ ၁၅ ရက် နေ့လည် ၁ နာရီခန့်မှာ စစ်ကောင်စီက လေယာဉ်နဲ့ဗုံးကြဲသွားတာ လို့သိရပါတယ်။
အဲဒီ ထမ်းယံရွာမှာ PNLA တွေ တပ်စွဲထားတာမရှိသလို အနီးအနားကိုလည်း လုံခြုံရေးစစ်ကြောင်းတွေ လှည့်လည်တာမရှိဘူးလို့ သိရပါတယ်။
စစ်ကောင်စီရဲ့ဗုံးကြဲတဲ့ဒဏ်ကြောင့် ကျောင်းဆောင်တွေပျက်စီးရသလို ကိုရင် ၂ ပါးလဲ မှန်စတွေ ကြောင့်ဒဏ်ရာတွေရခဲ့ပြီး အနီးနားက အိမ်တွေလည်း ပျက်စီးမှုရှိခဲ့တယ်လို့ သိရပါတယ်။
စစ်ကောင်စီဟာ ဆီဆိုင်မြို့နယ်အတွင်းမှာ လက်နက်ကြီးတွေနဲ့ ဆိုက်ခေါင်၊ ကျူးယံ၊ ထမ်ယမ်းစေတီကုန်း၊ ဆီဆိုင်မွေတော်ဘုရားကုန်းစတဲ့ သာသနာ့နယ်မြေတွေမှာ တပ်စွဲအထိုင်ချပြီး ဘာသာတရားကိုင်းရှိုင်းတဲ့ ပအိုဝ်းလူမျိုးတွေ အထွဋ်အမြတ်ထားတဲ့ ဘာသာရေးအဆောက်အဦတွေကို အကြောင်းမဲ့တိုက်ခိုက်နေတာဟာ သာသနာတော်ကို ဖျက်ဆီးနေတာအပြင် စစ်ရာဇဝတ်မှုကို ကျူးလွန်နေတာလို့ PNLA က ထုတ်ပြန်ကြေညာ ထားပါတယ်။
MK-012
