မဲခေါင်၊ ဩဂုတ် ၈
ရှမ်းပြည်နယ် တောင်ပိုင်း၊ ဆီဆိုင်မြို့နယ်မှာ စစ်ကောင်စီ လက်အောက်ခံ PNO ပြည်သူ့စစ်က လက်နက်ငယ် အချက်ပေါင်းများစွာ ပစ်ဖောက်တာကြောင့် ပြည်သူတွေ ထိတ်လန့်ခဲ့ရတယ်လို့ ဒေသခံတွေက ပြောပါတယ်။
စစ်ကောင်စီ လက်အောက်ခံ PNO ပြည်သူ့စစ် ၁၀ ဦးကျော်ဟာ ဩဂုတ်လ ၆ ရက်နေ့ ညမှာ ဆီဆိုင်မြို့နယ်၊ တောင်ရှေ့ကျေးရွာအုပ်စု၊ တောင်းတပ်ရွာနဲ့ ထီလုံးဟီရွာကြားကို ကား ၃ စီးနဲ့ ရောက်လာပြီး သေနတ် ပစ်ဖောက်တာ ဖြစ်တယ်လို့ ဒေသခံတွေက ပြောပါတယ်။
“ညကြီးမိုးချုပ် ရောက်လာပြီး သေနတ် ပစ်ဖောက်ကြတော့ ဘာဖြစ်တာလဲ ဆိုပြီး ကြောက်လန့်ကြတာပေါ့။ တိုက်ပွဲ ဖြစ်တာလား အချင်းချင်း ပစ်ကြတာလား မသိရတော့ ရွာသားတွေက ကြောက်ပြီး တိတ်ဆိတ်ကုန်တယ်” လို့ ဒေသခံ တစ်ဦးက ပြောပါတယ်။
PNO တပ်ဖွဲ့ဟာ တောင်းတပ်ရွာနဲ့ ထီလုံးဟီရွာကြားက တစ်နေရာမှာ သေနတ် အချက်ရေ ၃၀ ကျော် ဆက်တိုက် ပစ်ခတ်တာ ဖြစ်တယ်လို့ ဒေသခံတွေက ပြောပါတယ်။
“တစ်ခါတစ်လေ သူတို့လူတွေကို ဖမ်းတာ ဘာညာဆို တစ်ချက် နှစ်ချက် ခြောက်လှန့် ပစ်ခတ်တာမျိုးတော့ ကြားဖူးပေမယ့်။ အခုလို အချက် ၃၀ ကျော်လောက်အထိ အော်တို ဆွဲပစ်တာက မကြားဖူးတော့ ရွာသားတွေက ကြောက်တာပေါ့။ ပစ်ပြီးတော့ ရွာထဲကို ဝင်လာတာလည်း မရှိဘူး။ ကား ၃ စီးနဲ့ ရွာကိုဖြတ်သွားပြီ ဆီဆိုင်ဘက် ပြန်ဆင်းသွားတာပဲ တွေ့လိုက်ရတယ်” လို့ နောက်ထပ် ဒေသခံ တစ်ဦးက ပြောပါတယ်။
အဲ့ဒီလို သေနတ် ပစ်ဖောက်တဲ့ PNO ပြည်သူ့စစ်အဖွဲ့မှာ PNO အုပ်ချုပ်ရေး ယန္တရားအဖွဲ့မှ ကျေးရွာ အုပ်စုမှူးတွေ ပါဝင်တယ်လို့ ဒေသခံတွေက ပြောဆိုပါတယ်။
PNO ပြည်သူ့စစ်ဟာ ရှေ့တန်းတက်နေတဲ့ PNO စစ်သားတွေ အတွက် တစ်အိမ် ၄၀၀၀ ကျပ်နဲ့ ဆန် ၂ ပြည် ပေးရမယ်ဆိုပြီး ဆီဆိုင်မြို့နယ် အနောက်ဘက်ခြမ်းမှာ အခွန် ထပ်မံ ကောက်ခံနေတာကြောင့် ဆီဆိုင်မြို့နယ် အရှေ့ဘက်ခြမ်းကို လုံခြုံရေး အကြောင်းပြ ငွေကောက်ခံဖို့ သေနတ်ပစ်ဖောက် ခြိမ်းခြောက်တာ ဖြစ်နိုင်တယ်လို့ ဒေသခံတွေက သုံးသပ်ပါတယ်။
အခုလို့ PNO အဖွဲ့ဝင်တွေ ကျေးရွာတွေ အနီးအနားမှာ သေနတ်ပစ်ဖောက် ခြိမ်းခြောက်တာနဲ့ ပတ်သက်ပြီး PNO ပြည်သူ့စစ် တာဝန်ရှိသူတွေကို ဆက်သွယ် မေးမြန်းပေမယ့် ဖုန်းလက်ခံ ဖြေတာ မရှိပါဘူး။
PNOပြည်သူ့စစ်ဟာ စစ်ကောင်စီနဲ့အတူ ကရင်နီပြည်နယ်ထဲအထိ ကရင်နီ တော်လှန်ရေးတပ်ပေါင်းစုကို တိုက်ခိုက်တာအပြင် ပအိုဝ်းဒေသ အတွင်းရှိ CDM တွေ အာဏာရှင် ဆန့်ကျင်ရေး ဆန္ဒပြခဲ့သူတွေကို ဖမ်းဆီးပြီး စစ်ကောင်စီထံ အပ်နှံတာတွေကြောင့် နာမည်ဆိုးနဲ့ ကျော်ကြားနေတဲ့အဖွဲ့ ဖြစ်ပါတယ်။
CJ-002
#MeKongNews
#ဆီဆိုင်မြို့နယ်
#PNO_ပြည်သူ့စစ်
#CDM
