မဲခေါင်၊ ဇူလိုင် ၁၁
ရှမ်းပြည်နယ် တောင်ပိုင်း၊ ဆီဆိုင်မြို့တောက်ဘက်၊ မြို့အဝင် အထွက်မှာရှိတဲ့ စစ်ကောင်စီ စစ်ဆေးရေး ဂိတ်ဟာ တန်ဖိုးမြင့်ကားတွေနဲ့ ဒေသခံတွေရဲ့ ကုန်တင်ကားတွေကို ငွေ ၁၀ သိန်းကျပ်နဲ့အထက် တောင်းနေတာကြောင့် သွားလာမှု မပြုလုပ်ရဲတော့တဲ့ အထိ ကြောက်လန့်နေရတယ်လို့ ဒေသခံ ကားသမားတွေက ပြောပါတယ်။
အဲဒီ စစ်ကောင်စီဂိတ်ဟာ တန်ဖိုးမြင့်ကားတွေနဲ့ ဒေသခံတွေ အများဆုံး အသုံးပြုတဲ့ ကင်တာ ကုန်တင်ကား၊ သဲကျောက် တင်ကားတွေကို ပစ်မှတ်ထား စစ်ဆေးတာ ဖြစ်တယ်လို့ ကားသမားတွေက ဆိုပါတယ်။
အဲ့ဒီလို စစ်ဆေးရာမှာ လိုင်စင်မဲ့ ကားတွေကို အဓိက စစ်ဆေးတာဖြစ်ပြီး မော်ဒယ်မြင့်ပြီး ဈေးကြီးတဲ့ အမျိုးအစားတွေဖြစ်တဲ့ Vgo၊ Revo စတဲ့ ကားတွေကို စစ်ကောင်စီဂိတ်က ငွေ ၁၀ သိန်း အနည်းဆုံး တောင်းလေ့ရှိကာ ငွေမပေးနိုင်ရင် ကားသိမ်းတယ်လို့ စုံစမ်း သိရှိရပါတယ်။
ဒါ့အပြင် ဒေသခံတွေ အသုံးအများဆုံးဖြစ်တဲ့ Canter ကုန်တင်ကားတွေ၊ FUSO ကားတွေကို အဓိက စစ်ဆေးကာ ငွေကျပ်သိန်းဆယ်နဲ့ချီ တောင်းတာ ဖြစ်ပါတယ်။
“ဖိုးဝှီးကားတွေ အမြင့်ကားတွေဆို သိန်းလေးငါးဆယ်ထိ တောင်းတယ်။ မပေးနိုင်ရင် ကားဖမ်းထားတယ်။ ကျွန်တော်တို့ရွာက ကားတစ်စီးဆို ရပ်ရွာရဲ့ သာရေးနဲ့ ဆရာ ဆရာမတွေကို အကြိုအပို့လုပ်ဖို့ ဝယ်ထားတဲ့ အများပိုင်ကားပါဆိုပြီး စာတင်ပြီး ပြန်လိုက်နှုတ်ရတယ်။ ဒါတောင်မှ သိန်း ၄၀ လောက်ပေးရတယ်” လို့ ဆီဆိုင်မြို့နယ် ဒေသခံ တစ်ဦးက ပြောပါတယ်။
တန်ဖိုးကြီးကားတွေ မဟုတ်တဲ့ ဟွန်ဒါဖစ် စတဲ့ ကားအသေးတွေကိုတော့ စစ်ကောင်စီတွေက လိုင်စင်ရှိရှိ မရှိရှိ တစ်စီးကို တစ်သောင်းခွဲ နှစ်သောင်း တောင်းတယ်လို့လည်း ကားသမားတွေက ပြောပါတယ်။
“Canter ကားတွေဆို ဒေသခံတွေ အများဆုံး သုံးတာလေ။ အများစုကလည်း လိုင်စင်မဲ့တွေဆိုတော့ ဂိတ်တွေက မတရားတောင်းတယ်။ တစ်စီးကို လိုင်စင်မဟုတ်လို့ ဖောင်းကြွနံပါတ် မဟုတ်လို့ဆိုပြီး ၁၀ သိန်း တောင်းတာတွေ လုပ်တယ်။ ဒါကြောင့် အခုဆိုရင် အဲ့ဂိတ်တွေကို ဒေသခံ ကားသမားတွေက မဖြတ်ရဲတော့ဘူး။ ဈေးနေ့တောင်မှ အဲ့လမ်းမကြီးပေါ်ကနေ မသွားရဲကြတော့ဘူး” လို့ ဆီဆိုင်မြို့နယ် ဒေသခံ ကားသမား တစ်ဦးက ပြောပါတယ်။
ငွေကြေးတောင်းတာ မပေးရင် စစ်ကောင်စီတပ်ဖွဲ့ဝင်တွေ ခြိမ်းခြောက် ဆဲဆိုတာတွေ ပြုလုပ်တယ်လို့လည်း သူကပြောပါတယ်။ စစ်ကောင်စီတပ်ဖွဲ့တွေ အဲ့ဒီလို ငွေအတောင်းကြမ်းတာဟာ ၂၀၂၂ ခုနှစ် ကတည်းကစပြီး စလုပ်လာတာ ဖြစ်ပါတယ်။
“ဂိတ်ဖွင့်ခါစက တစ်စီးကို ငါးထောင် တစ်သောင်းကျပ် တောင်းစားတယ်။ အခု လိုင်စင်မဲ့ကားတွေကို ဖမ်းတာတွေနဲ့ ဖောင်းကြွနံပါတ်ပြား လဲခိုင်းတဲ့ ကိစ္စတွေ ပေါ်လာပြီးနောက်မှ သိန်း ၁၀ နဲ့ချီ တောင်းတာဗျ” လို့ နောက်ထပ် ကားသမား တစ်ဦးက ပြောပါတယ်။
အဲ့ဒီ ဆီဆိုင်မြို့တောင်ဘက် အဝင် အထွက် မှာရှိတဲ့ စစ်ကောင်စီ တပ်နဲ့ရဲ ပူးပေါင်းဂိတ်မှာ လိုင်စင်မဲ့ ကားတွေကို အဆမတန် ငွေတောင်းကြမ်းနေတာကြောင့် ကုန်စည်ပစ္စည်းသ ယ်ဆောင်တဲ့ ကားတွေ ဂိတ်ကို မဖြတ်ရဲကြတော့တဲ့အတွက် ဒေသတွင်း ကုန်စည်စီးဆင်းမှုကိုပါ အခက်အခဲ ဖြစ်စေတဲ့အပြင် ကျေးရွာတွေမှာ ကုန်ဈေးနှုန်းတွေ တက်လာနေတယ်လို့ ဒေသခံတွေက ပြောပါတယ်။
အခုလို ဂိတ်ဖွင့်ပြီး တောင်းစားနေတာဟာ ဆီဆိုင်မြို့ အခြေစိုက် ခမရ (၄၂၃) ၊ (၄၂၄) တပ်ရင်းတွေဖြစ်ပြီး အဲ့ဒီတပ်တွေဟာ ဆီဆိုင်မြို့နယ်မှာ စစ်တပ်က သိမ်းထားတဲ့ မြေ ဧက ၂၀၀၀ ကျော်မှာ ပြောင်းမျိုးစေ့ တစ်ထုပ် တစ်သိန်း ဆက်ကြေးကောက်ကာ လူထုကို စိုက်ပျိုးခိုင်းတဲ့ တပ်တွေ ဖြစ်ပါတယ်။
CJ-002
#MekongNews
#ဆီဆိုင်မြို့
#စစ်ကောင်စီဂိတ်
#လိုင်စင်မဲ့ကား
