မဲခေါင်၊ သြဂုတ် ၁
မတရား ဖမ်းဆီးခံထားရတဲ့ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် နဲ့ သမ္မတ ဉီးဝင်းမြင့် တို့အပေါ် အမိန့်ချမှတ်ထားတဲ့ ပြစ်ဒဏ် တစ်ချို့ကို လွတ်ငြိမ်းခွင့်ပေးကြောင်း ဒီကနေ့ ဩဂုတ် ၁ ရက်နေ့မှာ စစ်ကောင်စီက ကြေညာပါတယ်။
ဒေါ်အောင်ဆန်းစုကြည် ဖမ်းဆီး တရားစွဲ ထောင်ချခဲ့တဲ့ အမှု ၁၉ မှု အနက် ၅ မှုကို ပြစ်ဒဏ် လျှော့ပေါ့ပေးခဲ့ပြီး၊ ဉီးဝင်းမြင့် အပေါ် တရားစွဲ ချမှတ်ထားတဲ့ အမှု ၈ မှု အနက် ၂ မှုကို ပြစ်ဒဏ်လျှော့ပေါ့ ပေးခဲ့တာ ဖြစ်ပါတယ်။
နိုင်ငံ့ခေါင်းဆောင် ဒေါ်အောင်ဆန်းစုကြည် အပေါ် ပြစ်ဒဏ် လျှော့ပေါ့ခဲ့တဲ့ အမှု ၅ မှုဟာ နိုင်ငံတော် အကြည်ညို ပျက်စီးစေမှု ပုဒ်မ ၅၀၅-(ခ) အပါအဝင် သဘာဝ ဘေးအန္တရာယ် စီမံခန့်ခွဲမှု ပုဒ်မ (၂၅၊) ဆက်သွယ်ရေး ပဒေ ပုဒ်မ (၆၇)၊ ပို့ကုန်သွင်းကုန် ဥပဒေ ပုဒ်မ(၈) တို့နဲ့ စွပ်စွဲ ပြစ်ဒဏ်ချထားတဲ့ အမှု ၅ မှု ဖြစ်ပါတယ်။
ဒီကနေ့ ပြစ်ဒဏ် တစ်ချို့ လွတ်ငြိမ်းခွင့်ပေးခဲ့တာဟာ အကျဉ်းထောင်မှ ပြန်လွှတ်ပေးခြင်း မဟုတ်ဘဲ ပြစ်ဒဏ်အမိန့် ချထားတဲ့ အမှုများအပေါ် လျှော့ပေါ့ပေးခဲ့တာဖြစ်ပြီး၊ ကျန်ရှိနေတဲ့ အမှုများအတွက် ပြစ်ဒဏ် ဆက်လက် ကျခံရမယ်လို့ အကျဉ်းထောင်နဲ့ နီးစပ်သူ တစ်ဉီးက ပြောပါတယ်။
လက်ရှိ ဒေါ်အောင်ဆန်းစုကြည် နဲ့ ဦး၀င်းမြင် အပေါ် စစ်ကောင်စီက စီရင်ချက် မချမှတ်ရသေးတဲ့ တရားစွဲဆိုထားဆဲ အမှုများစွာ ရှိနေပြီး ထောင်ဒဏ် နှစ်များစွာ ချမှတ်ဣိုင်သေးတယ်လို့ တရားရုံးနဲ့ နီးစပ်သူ တစ်ဦးက ပြောပါတယ်။
စစ်ကောင်စီရဲ့ ယနေ့ လွတ်ငြိမ်းခွင့်မှာ သေဒဏ်ချမှတ်ခံသူ တစ်ချို့ကို တစ်သက်တစ်ကျွန်းသို့ လျှော့ပေါ့ ပေးခဲ့ပါတယ်။
နိုင်ငံတစ်ဝန်း အကျဉ်းထောင်၊ အကျဉ်းစခန်းများရှိ အကျဉ်းသား အကျဥ်းသူ ၇,၇၄၉ ဉီးကို နောက်တစ်ကြိမ် ပြစ်မှု ထပ်မံ ကျူးလွန်ပါက အဆိုပါ ပြစ်ဒဏ်နဲ့အတူ ယခု ကျခံဖို့ ကျန်ရှိတဲ့ ပြစ်ဒဏ်တွေကို ဆက်လက် ကျခံပါမယ် ဆိုတဲ့ ခံဝန်နဲ့ လွတ်ငြိမ်းခွင့် ပေးခဲ့တာဖြစ်ပြီး နိုင်ငံရေး အကျဉ်းသား အနည်းငယ်သာ ပါဝင်တယ်လို့ သိရပါတယ်။
#MekongNews
#ဒေါ်အောင်ဆန်းစုကြည်
#သမ္မတဦးဝင်းမြင့်
# ပြစ်ဒဏ်_လွတ်ငြိမ်း