မဲခေါင်၊ ဇူလိုင် ၁၂
ရှမ်းပြည်နယ် တောင်ပိုင်း၊ ကလောမြို့နယ်မှာ သစ်တောမြေနဲ့ လယ်ယာမြေတွေပေါ်မှာ ဆောက်လုပ်ထားတဲ့ အဆောက်အအုံတွေကို ဖျက်သိမ်းဖို့ စစ်ကောင်စီက စာရင်းကောက်ယူနေတယ်လို့ ဒေသတွင်း သတင်းရင်းမြစ်တွေက မဲခေါင်သတင်းဌာနကို ဒီကနေ့ ပြောပါတယ်။
ဌာနဆိုင်ရာတွေနဲ့ ပွဲစားတွေပေါင်းပြီး သစ်တော်မြေတွေ ရောင်းစားမှုနဲ့ နာမည်ကျော်တဲ့ ကလောမြို့နယ်မှာ အခုလို ဖျက်သိမ်းဖို့ ပြီးခဲ့တဲ့ ဇွန်လ အတွင်းက စတင်ပြီး စစ်ကောင်စီ စာရင်း ကောက်ယူနေတာလို့ ဆိုပါတယ်။
“ရပ်ကွက်၊ ကျေးရွာအုပ်စု အလိုက် စာရင်းကောက်နေတာပါ။ တကယ်ဖျက်မယ်ဆိုရင်တော့ သစ်တော ကျူးကျော် အိမ်ရာချီ ဖျက်ရမယ်။ ခေတ်အဆက်ဆက် သစ်တောမြေတွေကို သစ်တောနဲ့ မြေစာရင်းဌာနနဲ့ ပေါင်းရိုက်ခဲ့တာ NLD ခေတ်ကလည်း ရှင်းလို့ မရခဲ့ဘူး” လို့ ဒေသခံ တစ်ဦးက ဆိုပါတယ်။
ခေတ်အဆက်ဆက် သစ်တောမြေ အများအပြားကို စစ်တပ် အသိုင်းအဝိုင်းက ဦးဆောင် ကျူးကျော်ခဲ့တာ ဖြစ်ပြီး လက်ရှိ စစ်ဗိုလ်ချုပ်တွေ အမည်ပေါက် ဂရံ ထုတ်ယူထားတဲ့ သစ်တောမြေ အများအပြား ရှိနေလို့ စစ်ကောင်စီ အနေနဲ့ ဘယ်လို ဖြေရှင်းမလဲဆိုတာ စောင့်ကြည့်ရမယ်လို့ ကလော အခြေစိုက် ဝါရင့် အိမ်ခြံမြေ အကျိုးဆောင် တစ်ဦးက ပြောပါတယ်။
“တကယ်လုပ်ရင် သစ်တော ကင်းလွတ်ဆိုပြီး ဂျင်းမိထားတဲ့ ရန်ကုန်ကလူတွေ အထိနာမယ်။ သစ်တော ကင်းလွတ်တို့ ရွာမြေတို့ ဆိုတာတွေ သေချာစစ်ဆေး ဝယ်ကြပါ။ သစ်တောကင်းလွတ်ဆိုပြီး တရားဝင် သတ်မှတ်ထားတာ မရှိသေးပါဘူး။ ရွာမြေနဲ့ ယာမြေ အဝယ်မမှားပါနဲ့” လို့ သူက သတိပေးပါတယ်။
ရာသီဥတု ကောင်းမွန်တဲ့ နွေဦးမြို့တော်အဖြစ် တင်စားခံရတဲ့ ကလောမြို့နယ်မှာ ယခင် ကြံ့ခိုင်ရေး အစိုးရ ကာလ သစ်တောမြေ ဧက ထောင်သောင်းချီပြီးတော့ အစုအဖွဲ့ပိုင် သစ်တော စိုက်ခင်း အဖြစ် လုပ်ကိုင်ခွင့် ပေးခဲ့ရာက အဲဒီ သစ်တောမြေတွေပေါ်မှာ အိမ်ဆောက်တာ၊ ပြန်လည် ရောင်းချတာတွေ တွင်ကျယ်လာပြီး NLD အစိုးရ လက်ထက်က တရားစွဲဆိုမှုတွေ ရှိခဲ့ပေမယ့် ဖြေရှင်းနိုင်ခဲ့တာ မရှိဘူးလို့ မြို့ခံတွေက ပြောပါတယ်။
အခုလို အခြေအနေတွေကြောင့် ရပ်ဝေးက မြေဝယ်ယူသူတွေ အနေနဲ့ အစုအဖွဲ့ပိုင် သစ်တောမြေဟာ လွှဲပြောင်း ရောင်းချခွင့်နဲ့ အိမ်ဆောက်ခွင့် မရှိတာကို သိရှိဖို့ လိုအပ်ပြီး ယာမြေတွေကို ခွဲစိတ်ရောင်းချ နေတာကလည်း ပိုင်ဆိုင်မှု မခိုင်မာတာ သိရှိဖို့ လိုအပ်တယ်လို့ မြို့ခံတစ်ချို့က သတိပေးပါတယ်။
ကလောမြို့နယ် အောင်ပန်းမြို့ အနီးမှာ ကြံ့ခိုင်ရေး အစိုးရလက်ထက်က စစ်ခေါင်းဆောင် မင်းအောင်လှိုင် ရယူထားတဲ့ သစ်တောမြေ ဧက ရာချီရှိနေပြီး လက်ရှိ ဂရံ ထုတ်ထားတယ်လို့ သတင်းထွက်ပေါ်နေပေမယ့် ဘယ်သူ့နာမည်နဲ့ ဂရံ ထုတ်ယူထားတယ် ဆိုတာကိုတော့ မသိရှိရသေးဘူးလို့ အောင်ပန်းမြို့ခံ တစ်ဦးက ပြောပါတယ်။
မန္တလေးမြို့နဲ့ ပတ်ဝန်းကျင် ဒေသမှာတော့ စစ်ကောင်စီက ကျူးကျော်နဲ့ လယ်ယာမြေပေါ် တရားမဝင် အိမ်ဆောက်ထားတယ်ဆိုတဲ့ အကြောင်းပြချက်နဲ့ နေအိမ် ထောင်နဲ့ချီ ဖျက်ဆီးခဲ့ပြီး ဖြစ်ပါတယ်။
#MekongNews
#ကလောမြို့
#သစ်တောမြေ
#မင်းအောင်လှိုင်
