မဲခေါင်၊ အောက်တိုဘာ ၅
ကရင်နီပြည်နယ် အတွင်း တိုက်ပွဲတွေကြောင့် နေရပ်စွန့်ခွာ ထွက်ပြေးနေရတဲ့ စစ်ရှောင် ပြည်သူတွေ လိုအပ်တဲ့ စားနပ်ရိက္ခာ၊ ဆေး၀ါးနဲ့ အခြား ဆက်စပ် ပစ္စည်းတွေကို ရသမျှ နည်းလမ်းနဲ့ ဖြည့်ဆည်းပေးမယ်လို့ ကရင်နီပြည် ကြားကာလ ကောင်စီ- IEC အထွေထွေ အတွင်းရေမှူးက မဲခေါင်သတင်းဌာနကို ပြောပါတယ်။
စစ်ရှောင်တွေ အတွက် လိုအပ်တဲ့ ရိက္ခာ၊ ဆေး၀ါးနဲ့ လူသားချင်း စာနာထောက်ထားမှု ဆိုင်ရာ အကူအညီတွေကို စစ်ကောင်စီဘက်က ပိတ်ပင် တားဆီးထားပြီး စစ်ရှောင် ကူညီသူတွေကိုပါ ပစ်မှတ်ထား ဖမ်းဆီးနေပါတယ်။
ဒီလို အခြေအနေတွေ သာမက အလှူရှင် ရှားပါးပြီး ကုန်စျေးနှုန်း မြင့်တတ်မှု၊ ရာသီ အကူးအပြောင်း တုပ်ကွေး အတွက် ဆေး၀ါး ပြတ်လတ်မှုတွေကို စစ်ရှောင်ပြည်သူတွေ ရင်ဆိုင်နေရတဲ့အပေါ် IEC က ရသမျှ နည်းလမ်းတွေနဲ့ ကူညီပေးသွားမယ်လို့ ပြောဆိုတာ ဖြစ်ပါတယ်။
“ဖြစ်နိုင်တဲ့ နည်းလမ်း၊ ရနိုင်တဲ့ နည်းလမ်းတွေနဲ့ လိုအပ်တဲ့ ဆေး၀ါး၊ အမိုးအကာ၊ ရိက္ခာတွေကို သယ်ယူတာ စုဆောင်းတာ လုပ်ပါမယ်” လို့ IEC အထွေထွေ အတွင်းရေးမှူးက ရှင်းပြပါတယ်။
လက်ရှိ ကရင်နီပြည်နယ်ထဲ ကုန်စည် အများဆုံး စီးဆင်းတဲ့ ဖယ်ခုံနဲ့ တောင်ငူမှာ စစ်ကောင်စီက ဂိတ်တွေချပြီး ဖမ်းဆီး စစ်ဆေးနေမှုကို ဖြတ်ကျော်နိုင်ဖို့ ကြိုးစားနေ ပေမယ့် လုံခြုံရေးအရ အသေးစိတ်ကိုတော့ မဖြေကြားသေးဘူးလို့ သူကဆိုပါတယ်။
စစ်ကောင်စီကတော့ ကရင်နီ ပြည်သူတွေ ရိက္ခာပြတ်ဖို့ ရည်ရွယ်ချက်နဲ့ စားနပ်ရိက္ခာ ဖြတ်တောက်နေတာ မဟုတ်ဘဲ တော်လှန်ရေး အင်အားစုတွေကိုသာ ဖြတ်လေးဖြတ် စစ်ဆင်ရေး ပြုလုပ်နေတာလို့ စစ်တပ်၀ါဒဖြန့် ချန်နယ်တွေကို ရေးသားထားပါတယ်။
လက်ရှိ ကရင်နီ စစ်ရှောင်တွေ အတွက် လိုအပ်တဲ့ ရိက္ခာကို တောလမ်းတွေက တစ်ဆင့် အနည်းငယ်သာ သယ်ယူနေရပြီး ကရင်နီပြည်နယ်ရဲ့ လေးပုံသုံးပုံခန့် စစ်ရှောင်နေရတာကြောင့် လုံလောက်မှုမရှိ ဖြစ်နေတယ်လို့ စစ်ရှောင်တွေကို ကူညီ ထောက်ပံ့နေသူ တစ်ဦးက ပြောပါတယ်။
ဒါ့အပြင် စက်တင်ဘာလလယ်ကစပြီး ဒီးမော့ဆို အနောက်ခြမ်းက စစ်ရှောင် ၃,၀၀၀ ကျော် ရာသီတုပ်ကွေး အပါအ၀င် အမိုးအကာ မလုံလောက်မှုကြောင့် အအေးပတ် ဖျားနာ၊ ချောင်းဆိုးရောဂါတွေ အဖြစ်များနေ ပေမယ့် ကုသဖို့ ဆေး၀ါး လုံး၀ ပြတ်လပ်နေတယ်လို့ သိရပါတယ်။
ကရင်နီပြည်နယ်မှာ စစ်ကောင်စီနဲ့ ကရင်နီ တော်လှန်ရေး အင်အားစုတို့ တိုက်ပွဲတွေ ဆက်တိုက် ပြင်းထန် နေတာကြောင့် မော်ချီးဒေသမှာ ဆန်ကြမ်း တစ်အိတ် ငွေကျပ် ၄ သိန်းကျော်အထိ ပေး၀ယ်နေရတယ်လို့ ဒေသခံတွေက ပြောပါတယ်။
MK-007
#MeKongNews
#ကရင်နီပြည်နယ်
#IEC
#စစ်ဘေးရှောင်