မဲခေါင်၊ သြဂုတ် ၁၄
ကယား(ကရင်နီပြည်)မှာ အခြေခံစားသောက်ကုန်တွေ ဈေးနှုန်းထပ်တက်လာတာကြောင့် ထောက်ပို့တွေအတွက် အခက်အခဲ ဖြစ်နေတယ်လို့ ဒေသတွင်း သတင်းအရင်းအမြစ်တွေဆီက သိရပါတယ်။
ဇူလိုင်လ ၃၁ ရက်နေ့က စစ်ကောင်စီရဲ့ ဆင်ဖြူတော်မွေးနေ့ အထိန်းအမှတ်အဖြစ် ၂၀,၀၀၀ ကျပ်တန် ထုတ်ဝေပြီးတဲ့နောက်မှာ အခုလို ဈေးတက်လာတာလို့ ထောက်ပို့ အဖွဲ့တစ်ခုရဲ့ တာဝန်ရှိသူတစ်ဦးက ပြောပါတယ်။
“၂၀,၀၀၀ တန် ထုတ်တာက စတာပဲ။ တိတိကျကျ ပြောရရင်တော့ ပြီးခဲ့တဲ့ တစ်ပတ်လောက်က စတာပေါ့။ ကုန်ဈေးနှုန်းတက်တော့ ထောက်ပံ့ရတာ ပိုခက်ခဲလာတယ်။ ဥပမာ အရင်က ပစ္စည်းတစ်ခုကို ၁၀,၀၀၀ ဆိုရင် အခု ၂၀,၀၀၀ ကျော်သွားပြီ။ ထောက်ပံ့ရတဲ့ ပစ္စည်း အရေအတွက် လျော့သွားတာပေါ့” လို့ သူက ပြောပါတယ်။
ဩဂုတ်လ ဒုတိယအပတ်အတွင်း ထောက်ပို့အဖွဲ့တွေ အဓိက ဈေးဝယ်ကျတဲ့ လွိုင်ကော်မြို့ထဲမှာ စားအုန်းဆီ တစ်ပိဿာကို အရင်က ၈,၀၀၀ ကျပ်ကနေ ၁၀,၀၀၀ ကျော်အထိ မြင့်တက်လာပြီး ဆန်ကလည်း ၁၀၀,၀၀၀ (ကျပ်) ဝန်းကျင်ကနေ ၁၅၀,၀၀၀ ကျပ် နီးပါးအထိ မြင့်တက်လာတယ်လို့ ဆိုပါတယ်။
ဒါ့အပြင် ဓါတ်ဆီဈေးကလည်း ၂,၄၀၀ ကျပ် ဝန်းကျင်ကနေ ၂,၈၀၀ – ၃,၀၀၀ ကျပ်အထိ မြင့်တက်လာတာကြောင့် ထောက်ပို့အဖွဲ့တွေအတွက် သွားရေးလာရေးကအစ ခက်ခဲလာတယ်လို့လည်း သိရပါတယ်။
“ဒီနောက်ပိုင်း စစ်ဘေးရှောင်စခန်းတွေ သွားရင် လမ်းကြောင်းက သေချာဆွဲရတယ်။ လမ်းကြောင်းတစ်ခုနဲ့ နေရာ ၅ ခုလောက် ရောက်အောင်ပေါ့။ ခါတိုင်းလို တစ်နေရာစီ သွားနေရင် ရတဲ့ Fund (ရန်ပုံငွေ)နဲ့က ဘယ်လိုမှ မကာမိဘူး။ ရသလောက် ချင့်ချိန်ပြီး ဝယ်နေရတော့ စစ်ရှောင်တွေနား အပြည့် မရောက်နိုင်တော့ဘူး” လို့ ပြောပါတယ်။
၂၀၂၁ ခုနှစ် စစ်အာဏာသိမ်းပြီး နောက်ပိုင်းကတည်းကစပြီး ဒီနေ့ဒီချိန်အထိ ကုန်ဈေးနှုန်းတွေ တရိပ်ရိပ် မြင့်တက်လာပေမယ့် လုပ်ခလစာဟာ တိုးလာတာမျိုး မရှိတာကြောင့် အခြေခံလူတန်းစားတွေဟာ စားဝတ်နေရေး ပိုခက်ခဲလာတယ်လို့ ဆိုပါတယ်။
CJ-007
#MeKongNews
#ကရင်နီ
#ထောက်ပို့
#ကုန်ဈေးနှုန်း
#စစ်ကောင်စီ