မဲခေါင်၊ ဇူလိုင် ၂၆
ချင်းပြည်နယ်၊ ကန်ပက်လက်မြို့နယ် အတွင်း စစ်ကြောင်းထိုး ဝင်ရောက်လာတဲ့ ရန်သူ့တပ်ကို CNA၊ CDF၊ PDF မဟာမိတ် ပူးပေါင်းတပ်တွေ စောင့်ကြို တိုက်ခိုက်ရာ စစ်သား ၂၀ သေဆုံးခဲ့တယ်လို့ NUG ကာကွယ်ရေးဝန်ကြီး ဌာန၊ PDF စစ်ရုံးချုပ်က သတင်းထုတ်ပြန်ပါတယ်။
စစ်ကောင်စီ တပ်မ (၈၈)၊ ခလရ (၃၀၄) ပူးပေါင်းအင်အား ၁၀၀ ဝန်းကျင်ပါ စစ်ကြောင်းကို တိုက်ခိုက်ခဲ့တာလို့ ပြည်သူ့ကာကွယ်ရေး တပ်မတော်-PDF စစ်ရုံးချုပ်က ဒီကနေ့ ဇူလိုင်၂၆ ရက်နေ့မှာ ထုတ်ပြန်ပါတယ်။
ဇူလိုင် ၂၄ ရက်၊ မနက် ၈ နာရီကျော်မှာ ကန်ပက်လက်မြို့နယ်၊ မောချောင်းနဲ့ လှိုင်ဒုတ်ကြား ပြည်သူ့ကာကွယ်ရေး တပ်မတော်-PDF၊ အမှတ် (၁) စစ်ဒေသ၊ မင်းဘူးခရိုင် တပ်ရင်း (၆)နဲ့ CDF ကန်ပက်လက် ခေါနုတပ်ခွဲ ပူးပေါင်း မဟာမိတ်တပ်တွေ စောင့်ကြို တိုက်ခိုက်ခဲ့တာ ဖြစ်တယ်လို့ သိရပါတယ်။
တိုက်ပွဲဖြစ်ပွားချိန် ၂၅ မိနစ်အတွင်း စစ်သား ၁၀ ဦးသေဆုံးပြီး မဟာမိတ် ပူးပေါင်း တပ်သား ၄ ဦး ထိခိုက်ဒဏ်ရာ ရခဲ့တယ်လို့ ဆိုပါတယ်။
အလားတူ ညနေ ၅ နာရီ ဝန်းကျင်မှာ ခမရ (၃၀၁)၊ (၃၁၇) ပူးပေါင်းတပ် အင်အား ၁၅၀ ပါ စစ်ကြောင်းကို လဲပုံးလမ်းခွဲ အနီးမှာ PDF၊ အမှတ် (၁) စစ်ဒေသ၊ မင်းဘူးခရိုင် တပ်ရင်း (၃) နဲ့ CNA/CDF ကန်ပက်လက် မဟာမိတ် ပူးပေါင်းတပ်တွေ ထပ်မံ ပစ်ခတ်ခဲ့တယ်လို့ ထုတ်ပြန်ချက်မှာ ပါရှိပါတယ်။
ဒီပစ်ခတ်မှုအတွင်း ရန်သူ့တပ်သား ၁၀ ဦး သေဆုံးပြီး အများအပြား ဒဏ်ရာရရှိကာ မဟာမိတ် ပူးပေါင်းတပ်သား ၅ ဦး ထိခိုက်ဒဏ်ရာ ရခဲ့တယ်လို့ ဖော်ပြပါတယ်။
လက်ရှိ စစ်ကောင်စီတပ်ဟာ မကွေးတိုင်း အနောက်ခြမ်းနဲ့ ချင်းပြည်နယ်ကို ထိန်းချုပ်ဖို့ တပ်အင်အား အများအပြား၊ လက်နက်ကြီး၊ လေကြောင်းပစ်ကူတွေနဲ့ ထိုးစစ်ဆင်နေပေမယ့် ပြည်သူ့ကာကွယ်ရေး တပ်မတော်နဲ့ မဟာမိတ်တပ်တွေ လက်တွဲညီညီ ရင်ဆိုင် တိုက်ခိုက်နေတယ်လို့ ထုတ်ပြန်ချက်မှာ ဖော်ပြထားပါတယ်။
MK-005
#MekongNews
#ကန်ပက်လက်
#တပ်မ(၈၈)၊
#NUG