မဲခေါင်၊ ဧပြီ ၂၂
ရှမ်းပြည်တောင်ပိုင်း၊ ပအိုဝ်းကိုယ်ပိုင် အုပ်ချုပ်ခွင့်ရဒေသ၊ ဆီဆိုင်မြို့နယ်၊ နားခိုက်ကျေးရွာမှာ ပအိုဝ်းပြည်သူ့စစ် (PNA) က လူနေအိမ် ၈ လုံးကို မီးရှို့ ဖျက်ဆီးခဲ့တယ်လို့ ဒေသတွင်း သတင်းအရင်းအမြစ်တွေက ပြောပါတယ်။
မနေ့ (ဧပြီ ၂၁)နေ့လည် ၁၂ နာရီခန့်မှာ လူနေအိမ် ၇ လုံးကို စတင်မီးရှို့ ဖျက်ဆီးခဲ့ပြီး ဒီနေ့ (ဧပြီ ၂၂) မနက် ၆ နာရီခန့်မှာတော့ နောက်ထပ် နေအိမ် တစ်လုံးကို ထပ်ပြီးလုပ်ဆောင်ခဲ့တယ်လို့ ဆိုပါတယ်။
ဖျက်ဆီးခံရတဲ့အထဲမှာ အရပ်သားနေအိမ် ၃ လုံး၊ ပအိုဝ်းအမျိုးသား လွတ်မြောက်ရေး တပ်မတော် (PNLA)ရဲ့ ဒုတိယ ဥက္ကဌ ၂ နဲ့ တပ်ဖွဲ့ဝင်တွေရဲ့ နေအိမ် ၅ လုံး ပါဝင်ပြီး အားလုံးနီးပါး မီးလောင်ပြာကျ ဖျက်ဆီးခဲ့တယ်လို့ နီးစပ်သူတွေဆီက သိရပါတယ်။
PNLA စစ်ဘက်ဆိုင်ရာ ပြောရေးဆိုခွင့်ရှိသူ ခွန်ရိန်းယံက “တော်လှန်ရေးကို ဦးဆောင်နေတယ်ဆိုပြီး လုပ်တာပေါ့လေ။ တကယ်က သားသမီးနဲ့ မိဘက အရွယ်ရောက်လာရင် သူ့ရွေးချယ်ခွင့်နဲ့သူလေ။ သားသမီး ဒီလိုလုပ်တာ မိဘကြောင့်ဆိုပြီး စွပ်စွဲလို့မှ မရတာ။ ဒီလိုကြောင့် တော်လှန်ရေးကို မထိခိုက်စေပါဘူး။ ပိုပြီးတော့တောင်မှ တော်လှန်စိတ် ပိုပြင်းထန်လာမှာပါ”လို့ ပြောပါတယ်။
မီးရှို့ဖျက်ဆီးခံရတဲ့ လူနေအိမ် စုစုပေါင်းဟာ ခေတ်ကာလတန်ဖိုးအရ ကျပ်သိန်းပေါင်း သိန်း ၃၅,၀၀၀ ခန့် တန်ဖိုးရှိပြီး အတွင်းပရိဘောဂနဲ့ အဖိုးတန် ပစ္စည်းတွေကိုလည်း PNA က အဓမ္မ သိမ်းဆည်းသွားတယ်လို့ ရွာခံတွေဆီက သိရပါတယ်။
အိမ်နီးချင်း တစ်ဦးက “ကုန်စုံဆိုင် ၂ ဆိုင် ဆိုရင် တော်လှန်ရေးနဲ့ ဘာမဆိုင်ဘူး။ သူတို့ သက်သက်လုပ်တာ။ အိမ်တစ်လုံးကို သိန်းသောင်းဂဏန်း ကျော်တယ်။ ဒီမနက်လည်း ဘာမဆိုင်ပဲ အိမ်နောက်တစ်လုံး ထပ်ရှို့ လိုက်ပြီ။ ရွာသားတွေကို တော်လှန်ရေး မပါရဲအောင် လုပ်နေကြတာပါ” လို့ ပြောပါတယ်။
မီးရှို့ဖျက်ဆီးရာမှာ PNA အုပ်ချုပ်ရေးမှူး ခေါင်းဆောင် ဦးထွန်းနောင်နဲ့ PNA အထူးကွန်မန်ဒိုတပ်ရင်းက ဦးဆောင် ကျူးလွန်ခဲ့တာဖြစ်ပြီး နောက်နောင်များမှာလည်း တော်လှန်ရေးနဲ့ ပတ်သက်တဲ့ မိသားစုဝင်တွေရဲ့ နေအိမ်တွေကို အခုလို မီးရှို့သွားမယ်လို့ ခြိမ်းခြောက်ခဲ့ကြောင်း ရွာခံတွေဆီက သိရပါတယ်။
MK-014
