မဲခေါင်၊ ဧပြီ ၈
မြ၀တီမြို့နယ်မှာ လက်နက်ချအညံ့ခံခဲ့တဲ့ စစ်ကောင်စီတပ်သားတွေကို ပထမအသုတ်အဖြစ် ပြန်ခေါ်ဖို့ မြန်မာ ATR 72-600 လေယာဉ်ဟာ မဲဆောက်လေဆိပ်ကို ဧပြီ ၇ ရက် ညဦးပိုင်း ရောက်ရှိလာပေမယ့် တစ်နာရီကျော် စောင့်ဆိုင်းပြီးဘယ်သူမှ မလာနိုင်လို့ ပြန်ထွက်သွားကြောင်း AEC ASEAN News က ဖော်ပြသွားပါတယ်။
မြ၀တီတိုက်ပွဲမှာ KNU နဲ့ PDF ပူးပေါင်းတပ်တွေထဲ လက်နက်ချအညံ့ခံသွားရာမှာ စစ်ကောင်စီဘက်က အရာရှိ၆၇ ဦး၊ တပ်သား ၄၁၀၊ အမျိုးသမီးစစ်သည် ၅၆ ယောက်နဲ့ မိသားစုဝင်ပေါင်း ၈၁ ယောက်၊ စုစုပေါင်း ၆၁၇ ယောက်ရှိ ရာမှာ ပထမဆုံးအသုတ်အဖြစ် တပ်ရင်းမှူးအပါ ထိပ်တန်းအရာရှိနဲ့မိသားစုဝင် ၂၀ ကို ခေါ်ယူဖို့ ဧပြီ ၇ ရက်ညမှာ မဲဆောက်လေဆိပ်ကို စစ်ကောင်စီ လေယာဉ်ရောက်ရှိလာတာပါ။
တစ်ညလုံး လေဆိပ်တံခါးပိတ်ထားသလို စစ်ကောင်စီ စစ်သားတွေ တစ်ယောက်မှ ရောက်မလာနိုင်လို့ လေယာဉ်ပြန်လှည့်သွားတာလို့ မဲဆောက်မီဒီယာတွေကလည်း ဖော်ပြခဲ့ကြပါတယ်။
ထိုင်းမီဒီယာတွေရဲ့ ဖော်ပြမှုမှာ KNU ဘက်က ပြန်လွှတ်ပေးဖို့ သဘောမတူသေးတဲ့အတွက် ဧပြီ ၇၊၈၊ ၉ သုံးရက်ဆက် မြ၀တီက အညံ့ခံစစ်သားတွေကို ပြန်ခေါ်ဖို့ အစီအစဉ်အားလုံး ပျက်ရဖွယ်ရှိတယ်လို့လည်း ပါရှိပါတယ်။
Ref: AEC ASEAN News
MKF-001