ကျိုင်းတုံအခြေစိုက် အဆရ(၄)တပ်မှူး တာဝါတိုင်ဆီဖိုး တဝက်ကို ကိုယ်ကျိုးအတွက်အသုံးပြုနေ
မဲခေါင်၊ ဇန်နဝါရီ ၂၇
နိုင်ငံတော်ဘဏ္ဍာငွေထဲက ထုတ်ပေးတဲ့ ဆက်သွယ်ရေးတာဝါတိုင်အတွက် ဆီဖိုးတွေကို ရှမ်းပြည်အရှေ့ပိုင်း၊ ကျိုင်းတုံမြို့အခြေစိုက် အမှတ်(၄) အဆင့်မြင့်ဆက်သွယ်ရေးတပ်မှူးက ကိုယ်ကျိုးအတွက် ထုတ်ယူအသုံးပြုနေတဲ့အပြင် လက်အောက်ကိုလည်း လင်မယားနှစ်ယောက်လုံးက ဖိနှိပ်နေတယ်လို့ တပ်တွင်းသတင်းအမြစ်ဆီက သိရပါတယ်။
အဆရ(၄) တပ်မှူး ဒုမှူးကြီးခင်မောင်ထွေးဟာ ဆက်သွယ်ရေးတာဝါတိုင်တွေအတွက် နိုင်ငံတော်ဘဏ္ဍာက သတ်မှတ်ပေးတဲ့ တစ်လကျပ် ၁၀ သိန်းကိုလုပ်ငန်းအသုံးပြုရေးအတွက်အပြည့်အဝမပေးပဲ ကျပ်ငါးသိန်းသာချပေးပြီး ကျပ်ငါးသိန်းကို ကိုယ်ကျိုးအတွက်အသုံးပြုနေတယ်လို့ပြောပါတယ်။
“ သုံးလို့ပိုလာတဲ့ဆီကိုလည်း ပြန်အပ်ခိုင်းတယ်၊ ပြီးတော့ တပ်မှူးထက် သူ့မိန်းမကို ပိုကြောက်ရတယ်၊ သူနဲ့အဆင်မပြေရင် မြောင်းထဲရောက်တာပဲ” လို့ တပ်တွင်းသတင်းအရင်းအမြစ်ကပြောပါတယ်။
မြေပြင်မှာ တာဝါတိုင်တာဝန်ထမ်းဆောင်သူတွေဟာ မီးစက်ကို အကြွေးနဲ့ဝယ်ရသလို စက်ချို့ယွင်းတာမျိုးဖြစ်ရင်လည်း ကိုယ့်အစီအစဉ်နဲ့ကိုယ်ပြင်ရတာ၊ ဘက်ထရီတွေကိုလည်း ကိုယ်ငွေနဲ့ကိုယ် ဝယ်အသုံးပြုရတယ်လို့ပြောပါတယ်။
“ အကြွေးတွေပုံပြီးဖိနှိပ်ခံရတဲ့ ဒဏ်မခံနိုင်တဲ့ နည်းပညာကျောင်းဆင်းတွေ၊ တကကစရ(တပ်ကြပ်ကြီးစာရေး)တွေ ထွက်ပြေးတာမနည်းတော့ဘူး၊ အဲဒိတပ်ပြေးလစာငွေတွေလည်း စာရင်းလိမ်ပြီး ထုတ်စားနေတယ်” လို့ပြောပါတယ်။
အဆရ(၄) ကွပ်ကဲမှုအောက်မှာ စက်သုံးဆီနဲ့စက်မောင်းရတဲ့ MEC( Gota )ဖုန်း စင်တာတွေအပါအဝင် ဆက်သွယ်ရေးတာဝါတိုင်၁၀၀ ကျော်ရှိနေတယ်လို့ သိရပါတယ်။
အဆရ(၄)ဟာ ကျိုင်းတုံက တြိဂံဒေသတိုင်းစစ်ဌာချုပ်ကွပ်ကဲမှုအောက်မှာရှိနေတာဖြစ်ပြီး တပ်မှူးဒုမှူးကြီးခင်မောင်ထွေးဟာ စစ်တက္ကသိုလ်အပတ်စဉ်(၄)ဆင်းလို့ သိရပါတယ်။
MK-012
#MeKongNews
