မဲခေါင် ၊ ဇန်နဝါရီ ၁၆

ရှမ်းပြည်နယ်မြောက်ပိုင်း ၁၀၂၇ စစ်ဆင်ရေးကာလ သိန္နီမြို့သိမ်းတိုက်ပွဲအတွင်း အသက်စွန့်ခဲ့တဲ့ ရဲဘော် ၁၂ ဦးကို “ သိန္နီတိုက်ပွဲအာဇာနည်” များအဖြစ် ဂုဏ်ပြုမှတ်တမ်းတင်တယ်လို့ ပြည်သူ့လွတ်မြောက်ရေးတပ်မတော် – PLA က သတင်းထုတ်ပြန်ပါတယ်။

၂၀၂၃ခုနှစ် ၊ အောက်တိုဘာ ၂၇ ရက်နေ့မှာ စတင်ခဲ့တဲ့ ၁၀၂၇ စစ်ဆင်ရေးအတွင်း ပြည်သူ့ လွတ်မြောက်ရေးတပ်မတော်-PLAဟာ သိန္နီမြို့သိမ်းတိုက်ပွဲကို အောင်ပွဲရရှိတဲ့အထိ မဟာမိတ်တပ်ဖွဲ့များနဲ့ လက်တွဲကာ ရွပ်ရွပ်ချွံချွံ ပါဝင်ဆင်နွှဲ တိုက်ပွဲဝင်ခဲ့တယ်လို့ PLAကဆိုပါတယ်။

အဲ့ဒီ သိန္နီမြို့သိမ်းတိုက်ပွဲမှာ သိန္နီမြို့ကို တိုက်ခိုက်သိမ်းပိုက်နိုင်ခဲ့သလို ပြည်သူ့လွတ်မြောက်ရေးတပ်မတော်မှ ရဲဘော်(၁၂) ဦးလည်း အသက်စွန့်ခဲ့(ကျဆုံး)ရပါတယ်။။ အဲ့ဒီ ကျဆုံးအာဇာနည်ရဲဘော်တွေကတော့ ရဲဘော်သခွား ၊ ရဲဘော်ဇနက္က ၊ ရဲဘော်ဂျစ်ဂျစ် ၊ ရဲဘော်သုခ ၊ ရဲဘော်မိုးအောင် ၊ ရဲဘော်ကောင်းကင် ၊ ရဲဘော်သူရ ၊ ရဲဘော်ဝက်သိန်း ၊ ရဲဘော်စိန်လွင် ၊ ရဲဘော်ဝကြီး ၊ ရဲဘော်ကျားလေး နဲ့ ရဲဘော်အောင်ဆန်း တို့ဖြစ်တယ်လို့ PLA ထုတ်ပြန်ချက်အရ သိရပါတယ်။

“တိုက်ပွဲအတွင်း ဂုဏ်ရောင်ပြောင်စွာ ကျဆုံးခဲ့သော အာဇာနည်ရဲဘော်များအား ပြည်သူ့လွတ် မြောက်ရေးတပ်မတော်၏ “ သိန္နီတိုက်ပွဲအာဇာနည်” များအဖြစ် အလေးအနက် မှတ်တမ်းတင်ဂုဏ်ပြုပါသည်။” လို့ PLA က ပြောပါတယ်။

သိန္နီမြို့သိမ်းတိုက်ပွဲ အောင်မြင်မှုဟာ ရဲဘော်များ စွမ်းစွမ်းတမံ အသက်စွန့်ဆောင်ရွက်ခဲ့တဲ့အတွက် ရရှိခဲ့ခြင်းဖြစ်ပြီး နောက်ဆုံးထွက်သက်အထိ ရဲရင့်စွာ တိုက်ပွဲဝင်ခဲ့တဲ့ စံပြအာဇာနည် စိတ်ဓာတ်ကို ဆက်လက်ကိုင်စွဲကာ ပြည်သူ့ဒီမိုကရေစီလက်နက်ကိုင်တော်လှန်ရေးကို ဆုံးခန်းတိုင်ဆင်နွှဲသွားမည်လို့ PLAကပြောပါတယ်။

CJ-002

#MeKongNews

#သိန္နီ

#တိုက်ပွဲ

#PLA

#အာဇာနည်

#ဂုဏ်ပြု

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)