မဲခေါင်၊ ဖေဖော်ဝါရီ ၈

ကရင်နီပြည်၊ လွိုင်ကော်အကျဥ်းထောင်မှ လွတ်ရက်စေ့ အကျဥ်းသား ၆၅ ယောက်ကို စစ်ကောင်စီက ဖေဖော်ဝါရီ ၅ ရက်မှာ ပြန်လွှတ်ပေးခဲ့ပြီး နိုင်ငံရေးအကျဥ်းသား ၁၂ ဦးပါဝင်တယ်လို့ ကရင်နီနိုင်ငံရေးအကျဥ်းသားများ အစည်းအရုံး(KPPA) က ဒီနေ့ ဖေဖော်ဝါရီ ၈ မှာ ထုတ်ပြန်အသိပေးပါတယ်။

နိုင်ငံရေးအကျဥ်းသားတွေဟာ ဇန်နဝါရီ ၄ ရက် လွတ်ငြိမ်းခွင့်နဲ့ ပြန်လည်လွတ်မြောက်ရမည် ဖြစ်သော်လည်း မလွတ်ဘဲ ဖေဖော်ဝါရီ ၅ ရက်မှ စစ်ကောင်စီက ပြန်လည်လွတ်ပေးခြင်းဖြစ်တယ်လို့ ကရင်နီနိုင်ငံရေးအကျဥ်းသားများ အစည်းအရုံးက ဆိုပါတယ်။

ပြစ်ဒဏ်ကျခံရာမှ လွတ်မြောက်ပြီဖြစ်တဲ့ ရာဇဝတ်မှုအကျဥ်းသား ၁၄ ဦးကို ချက်ချင်းလွှတ်ပေးရန်၊ လွတ်မြောက်သင့်ပြီဖြစ်တဲ့ နိုင်ငံရေးအကျဥ်းသား၊ အကျဥ်းသူများကို ချက်ချင်းလွှတ်ပေးရန်၊ စစ်ရေးတင်းမာနေတဲ့ အခြေအနေမှာ လွတ်မြောက်အကျဥ်းသားတွေကို နေရပ်ပြန်ရေး စီစဥ်ပေးရန်တို့ကို KPPA နဲ့ မြန်မာနိုင်ငံလုံးဆိုင်ရာ နိုင်ငံရေးအကျဥ်းသားများ ကွန်ယက် (PPNM) တို့က ဖေဖော်ဝါရီ ၃ ရက်မှာ ထုတ်ပြန်တောင်းဆိုခဲ့ပါတယ်။

မဖြစ်မေန လွတ်ရက်စေ့ အကျဥ်းသားများကို လွတ်ပေးလိုက်တာကို ကြိုဆိုပေမယ့် လွိုင်ကော်ထောင်တွင်းမှာ ကျန်ရှိနေတဲ့ အကျဥ်းသားများဟာ အစားအသောက်နဲ့ ကျန်းမာရေးစောင့်ရှောက်မှု မလုံလောက်တဲ့ အခြေအနေနဲ့ ကြုံတွေ့နေရတယ်လို့ ဆိုပါတယ်။

လွိုင်ကော်အကျဉ်းထောင်တွင်းက အကျဉ်းသားများအားလုံးကို ဆန်ကြမ်းနဲ့ ငါးပိသာ နေ့စဉ်ရက်ဆက်ကျွေးနေပြီး နှစ်လနီးပါး အကျဉ်းသားများကို အခန်းထဲ ပိတ်လှောင်ထားလို့ ကိုယ်လက်အင်္ဂါများ ချိနဲ့ခြင်းများ ဖြစ်နေတယ်လို့ ဆိုပါတယ်။

မတရားဖမ်းဆီးထားထိန်းသိမ်းထားတဲ့ နိုင်ငံရေးအကျဉ်းသားများအပါအဝင် အခြားအကျဉ်းသားများကို လုံလောက်သောအစားအသောက်နဲ့ ကျန်းမာရေးစောင့်ရှောက်မှုများကို အထူးအလေးထား လုပ်ဆောင်ပေးဖို့ တောင်းဆိုကြောင်း KPPA နဲ့ PPNM တို့က ထုတ်ပြန်ထားပါတယ်။

#MeKongNews

#လွိုင်ကော်

#အကျဥ်းထောင်

#လွတ်ရက်စေ့

#ပြန်လွတ်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)