မဲခေါင်၊ ဖေဖော်ဝါရီ ၅
ကချင်လွတ်လပ်ရေးတပ်မတော်(KIA) ရဲ့ လက်နက်ကိုင်တော်လှန်ရေး ၆၃ နှစ်ပြည့် တော်လှန်ရေး အထိမ်းအမှတ်နေ့မှာ စစ်ကောင်စီ အနေနဲ့ စစ်အင်အား ရရှိဖို့ လူမျိုးနဲ့ဒေသကို အခြေပြုပြီး ပြည်သူ့စစ် အတင်းအဓမ္မ ဖွဲ့စည်းကာ အချင်းချင်းကြားထဲ ပြဿနာဖြစ်အောင် လုပ်ဆောင်နေတယ်လို့ KIO ဥက္ကဌ ဗိုလ်ချုပ်ကြီး အင်ဘန်လ က ၆၃နှစ်မြောက် ကချင်တော်လှန်ရေးနေ့မိန့်ခွန်းမှာ ထည့်သွင်း သတိပေးပါတယ်။
“ စစ်ကောင်စီအနေနဲ့ စစ်အင်အားရဖို့ ပြည်သူ့စစ်တပ်ဖွဲ့တွေကို လူမျိုးအလိုက်၊ နေရာဒေသခအလိုက် အတင်းအဓမ္မ ဖွင့်လှစ်လာတာကို တွေ့ရတယ်။ ဒါတွေဟာ အချင်းချင်းကြား ပြဿနာဖြစ်အောင် ဖန်တီးတာဖြစ်တာကြောင့် ဘယ်သူမှ မပါဝင်ကြဖို့ သတိပေးပါတယ်” လို့ ပြောကြားထားပါတယ်။
လက်ရှိမှာ တော်လှန်ရေးအဖွဲ့တွေ ပူးပေါင်းပြီး စစ်ကောင်စီကို တွန်းလှန်နိုင်တော့မှာဖြစ်ပြီး နိုင်ငံကို အဆင်ပြေချောမွေ့စာ ဆက်လက်တည်ဆောက်နိုင်ဖို့ တိုင်းရင်းသားလူမျိုး တစ်မျိုး နဲ့တစ်မျိုးကြား ညှိနှိုင်းဖြေရှင်းစရာများစွာ ရှိနေသေးတာကိုလည်း သတိထားဖို့လိုပြီး အဆင်ပြေချောမွေ့စွာ ဖြေရှင်းနိုင်မှသာ ပြည်ထောင်စုကို အောင်မြင်စွာ တည်ဆောက်နိုင်မှာဖြစ်တယ်လို့ ဆိုပါတယ်။
“ အဖွဲ့ တစ်ဖွဲ့နဲ့ တစ်ဖွဲ့ကြား အထူးသဖြင့် လက်နက်ကိုင် အဖွဲ့ တစ်ဖွဲ့နဲ့ တစ်ဖွဲ့ကြား တော်လှန်ရေးကာလမှာ အားထား အားပြု စရာ နဲ့ နိုင်ငံရေးပန်းတိုင် ပေါ်မူတည်ပြီးလည်း နေရာဒေသ ထပ်နေပြီး အချင်းချင်း ခလုတ် (စိတ်ကသိကအောက်ဖြစ်စရာ) ဖြစ်တာမျိုးလည်း ရှိနေတယ်။ ကချင်လွတ်လပ်ရေးတပ်မတော်က အဲဒီလို ပြဿနာတွေကို ဖြေရှင်းညှိနှိုင်းချိန်မှာ အတူတကွ ယှဉ်တွဲနေထိုင်တဲ့ မဟာမိတ်၊ မိတ်ဆွေ အဖြစ် တည်မြဲအောင်၊ သမိုင်းကို အခြေခံထားပြီး ဖြေရှင်းသွားမှာဖြစ်ပါတယ်” လို့ မိန့်ခွန်းမှာ ပြောဆိုထားပါတယ်။
ကချင်လွတ်မြောက်ရေးတပ်မတော် အနေနဲ့ ရည်မှန်းချက်တူညီတဲ့ အဖွဲ့တွေ၊ မြန်မာနိုင်ငံ အပြောင်းအလဲကို နှစ်သက်လိုလားတဲ့ မဟာမိတ်အဖွဲ့တွေနဲ့ လက်တွဲပြီး စစ်ကောင်စီကို စစ်ရေး၊ နိုင်ငံရေး၊ စီးပွားရေး၊ သံတမန်ရေး နည်းလမ်းမျိုးစုံနဲ့ တိုက်ပွဲဝင်နေရာ မိမိနဲ့ နီးကပ်နေတဲ့ အိမ်နီးချင်းနိုင်ငံတွေရဲ့ အကျိုးနဲ့ စိုးရိမ်မှုကိုလည်း ထည့်သွင်းစဉ်းစား ပေးနေတယ်လို့ မိန့်ခွန်းမှာ ပါရှိပါတယ်။
ရှေ့တန်းစစ်မြေပြင်မှာ လက်တွေ့ တိုက်ပွဲ ဝင်နေတဲ့ ရဲဘော်တွေနဲ့ မဟာမိတ် တပ်ဖွဲ့တွေ၊ နိုင်ငံ့အတွက် သိက္ခာရှိရှိ၊ ရဲစွမ်းသတ္တိရှိရှိ အသက်ပေးလှူသွားတဲ့ အာဇာနည်ရဲဘော်တွေ၊ ခန္ဓာကိုယ် အစိတ်အပိုင်းတွေကို ပေးဆပ်လိုက်ရတဲ့အထိ ကြိုးပမ်းခဲ့ကြတဲ့ စိတ်တူကိုယ်တူ ရဲဘော်တွေ အားလုံးကို သတိရ ဂုဏ်ပြုတယ်လို့လည်း ဆိုပါတယ်။
တော်လှန်ရေးလုပ်ငန်းမှာ အကြောင်းအမျိုးမျိုးနဲ့ ကူညီ ပံ့ပိုးအားပေးနေတဲ့ ပြည်တွင်း၊ ပြည်ပ အသိမိတ်ဆွေ၊ အဖွဲ့အစည်းတွေ အားလုံးကို ကျေးဇူးတင်ရှိကြောင်း၊ မည်သည့်နိုင်ငံရေးမုန်တိုင်းနဲ့ တွေ့ကြုံရပါစေ လမ်းမမှားပဲ နိုင်ငံရေး ပန်းတိုင်ရောက်တဲ့အထိ ဦးစီး ဦးဆောင်သွားမှာဖြစ်ကြောင်း၊ ပြည်သူတွေအနေနဲ့ ယုံကြည်စွာ တော်လှန်ရေးအောင်မြင်တဲ့နေ့ အထိ ဆက်ပြီး ကြိုးပမ်းကြဖို့ တိုက်တွန်းထားပါတယ်။
ကချင်လွတ်လပ်ရေးတပ်မတော် (KIA ) ကို လွန်ခဲ့တဲ့ ၁၉၆၁ ခုနှစ် ဖေဖော်ဝါရီလ ၅ ရက်နေ့တွေ စတင်ဖွဲ့စည်းခဲ့ပြီး အဖိနှိပ်ခံဘဝမှ လွတ်မြောက်ရန် လက်နက်ကိုင်တော်လှန်နေတာဖြစ်ပါတယ်။
CJ-008
#MeKongNews
#စစ်ကောင်စီ
#လူမျိုးရေး
#ပြည်သူ့စစ်
#KIO
