မဲခေါင်၊ ဖေဖော်ဝါရီ ၂၈
ရှမ်းပြည်မြောက်ပိုင်း လားရှိုးမြို့မှာ ခု ရက်ပိုင်းအတွင်း လိုင်စင်မရှိတဲ့ ကားနဲ့ ဆိုင်ကယ် တွေစာရင်းကို စာရင်းကောက်နေတယ်လို့ ဒေသခံတွေ က ပြောပါတယ်။
“ လားရှိုးမှာ လိုင်စင် မရတဲ့ ကားနဲ့ ဆိုင်ကယ် စာရင်း လိုက်ကောက်တယ်။ ကားပိုင်ရှင်နာမည်၊ အဖေနာမည်၊ ကားအမျိုးအစား၊ မော်ဒယ် တွေ လိုက်ကောက်တယ်” လို့ ဒေသခံ အမျိုးသား တစ်ဦးက ပြောပါတယ်။
ရှမ်း/မြောက် လိုင်စင်လုပ် ပေးမယ်လို့တော့ သတင်းထွက်နေပြီး ရှမ်း/မြောက် လိုင်စင်ဖြစ်ပေမယ့် တနိုင်ငံလုံးလည်း သွားလာလို့ ရနိုင်မှာ ဖြစ်ကြောင်း ရာအိမ်မှူး တစ်ဦးက ပြောပြတယ်လို့သူက ပြောပါတယ်။
“ အခု တလော လားရှိုးမှာ လိုင်စင်မဲ့ ကားရော ဆိုင်ကယ်ရော စာရင်းလိုက်ကောက်နေတာ ဟုတ်တယ်။ တပတ်လောက်ရှိပြီ။ မကြာခင် ရှောင်တခင် စစ်ဆေးရေးလုပ်မယ်လို့ ကြားတယ်။ အဲချိန်ကျရင် စာရင်း ပေးမထားတဲ့ လိုင်စင်မဲ့ ကား နဲ့ ဆိုင်ကယ်တွေကို လမ်းမပေါ် စစ်ဆေးလို့ တွေ့ရင် သိမ်းမယ်လို့ကြားတယ်” လို့ ဒေသခံ အမျိုးသမီး တစ်ဦးက ပြောပါတယ်။
လိုင်စင်လုပ်ပေးဖို့ ဆိုတဲ့ သတင်း ထွက်နေသလို အဲဒီ လိုင်စင်မဲ့ ကားနဲ့ ဆိုင်ကယ်တွေကို သီးသန့် ကတ် လုပ်ပေးမယ်လို့လည်း ကြားရကြောင်း၊ စာရင်းကို တပ်ဘက်က လိုက်ကောက်တာဖြစ်ပြီး လားရှိုး ပြင်ပ ယာဉ်တွေ ကို စိစစ်နိုင်ရန် လုံခြုံရေးအရ စိုးရိမ်လို့ကောက်တာလည်း ဖြစ်နိုင်ကြောင်း သူက ပြောပါတယ်။
ဒေသခံ အချို့ကတော့ နံပါတ်တူ၊ ဆိုင်ကယ်အမျိုးစားတူတာတွေ အများကြီးရှိတာေကြာင့် လိုင်စင်မဲ့ တွေက ပြဿနာဖြစ်ရင် နံပါတ်တူတွေ ဒုက္ခရောက်နိုင်တယ်လို့ ပြောနေကြပါတယ်။
ဒေသခံအချို့ကလည်း မကြာခဏ ဗုံး ဖောက်ခွဲ တာမျိုး ဖြစ်တာကြောင့် စာရင်းကောက်တာလည်း ဖြစ်နိုင်တယ်လို့ ဆိုပါတယ်။
လားရှိုးမြို့ဟာ စစ်ကောင်စီရဲ့ အရှေ့မြောက်တိုင်း စစ်ဌာနချုပ်ရှိရာမြို့ဖြစ်ပြီး ရှမ်း/မြောက် ရဲ့ အဓိက ကျတဲ့ မြို့တစ်မြို့လည်း ဖြစ်ပါတယ်။
CJ-008