မဲခေါင်၊ အောက်တိုဘာ ၁၆
ရှမ်းပြည်နယ် မြောက်ပိုင်း၊ လားရှိုးမြို့မှာ မနေ့က နံပါတ်ပြား မတပ်ထားတဲ့ ဆိုင်ကယ် ၁၅၀ ကျော်ကို ဖမ်းဆီးကာ စစ်ကားများနဲ့ စစ်တပ်ထဲ သယ်ဆောင်သွားတယ်လို့ ဒေသခံတွေက ပြောပါတယ်။
လားရှိုးမြို့ မန်ဆူပလာဇာရှေ့၊ ခရိုင်ရဲရုံးနဲ့ အကောက်ခွန်ရုံးရှေ့မှာ ယာဉ်ထိန်းရဲက ဆိုင်ကယ်တွေကို လက်နက် အပြည့်အစုံ ကိုင်ဆောင်ထားတဲ့ ပြည်သူ့စစ်၊ ရဲ၊ စစ်သား အများအပြား ခြံရံ စစ်ဆေးကာ ၂ ဦးထက် ပိုစီးနင်းတာနဲ့ ဦးထုတ် မဆောင်းသူတွေကို ဒဏ်ငွေ ၃ သောင်း ရိုက်ပြီး နံပါတ်ပြား မတပ်ထားတဲ့ ဆိုင်ကယ်တွေကို စစ်တပ်ထဲပို့ပြီး သိမ်းဆည်းလိုက်တာလို့ ရဲအရာရှိ တစ်ဦးက အတည်ပြုပါတယ်။
“မနေ့က ဆိုင်ကယ်တွေ စစ်ဆေးမယ်ဆိုပြီး ယာဉ်ထိန်းရဲက ရပ်ကွက်ထဲ မိုက်နဲ့ လှည့်အော်တယ်။ ပြီးတော့ သူတို့ အသုံးချနေကြဖြစ်တဲ့ မြဝတီ သတင်းထောက် တစ်ယောက်ရယ်၊ ပြန်/ဆက်က သတင်းထောက် တစ်ယောက်ရဲ့ Facebook ကိုယ်ပိုင် အကောင့်တွေမှာပဲ တင်ပြီး ဖမ်းမယ်ဆီးမယ် ဆိုတာကို ပြည်သူကို ချပြခဲ့ပါတယ်” လို့ မြို့ခံ တစ်ဦးက ပြောပါတယ်။
ခရိုင်ရဲရုံးအနီး ဖမ်းဆီးစစ်ဆေးမှုမှာ အဝေးသင် လာတက်တဲ့ တက္ကသိုလ် ကျောင်းသား၊ ကျောင်းသူ များရဲ့ ဆိုင်ကယ်များ အဖမ်းခံခဲ့ရပြီး တချို့ စစ်တပ် သိမ်းယူသွားခဲ့တဲ့ အထဲ ပါဝင်တယ်လို့ စုံစမ်းသိရှိရပါတယ်။
“ ကျွန်တော်တို့က လားရှိုးက မဟုတ်ပါဘူး။ တခြားမြို့ကနေ တက္ကသိုလ် လာတက်တာပါ။ စာမေးပွဲ လာဖြေတာပါ။ သူတို့ ဆိုင်ကယ်တွေ စစ်မယ် ဆိုတာလည်း ကျွန်တော် မသိဘူး၊ ကြားလည်း မကြားဘူး၊ အခုလို အပြီး သိမ်းခံရတာကတော့ အတော်လေး နှမြောဖို့ ကောင်းပါတယ်။ ကျောင်းသွားတက်ရင် သွားဖို့ လာဖို့ အဆင်ပြေအောင် အိမ်က မိဘတွေက မရှိမဲ့၊ ရှိမဲ့လေးတွေနဲ့ ဝယ်ပေးလိုက်တာဗျာ့။ အလကားရလာတာ မဟုတ်ဘူး။ အဲ့ဒါကို အချောင် လိုချင်တဲ့ စစ်တပ်က သိမ်းသွားတယ် ဆိုတာတော့ အတော်လေး မိုက်ရိုင်းလွန်းတယ်” လို့ ဆိုင်ကယ် အသိမ်းခံလိုက်ရတဲ့ ပထမနှစ် တက္ကသိုလ် ကျောင်းသား တစ်ဦးက ပြောပါတယ်။
လက်ရှိ စစ်တပ်ထဲ သယ်ဆောင် သိမ်းဆည်းသွားတဲ့ ဆိုင်ကယ် အစီး ၁၅၀ ကျော်နဲ့ ပတ်သက်ပြီး မြို့အာဏာပိုင်တွေက ပွင့်လင်းမြင်သာစွာ ချပြဖို့ လိုအပ်တယ်လို့ မြို့ခံတွေက ပြောပါတယ်။
CJ-010
#MekongNews
#လားရှိုးမြို့
#ဆိုင်ကယ်_နံပတ်ပြား
#ယာဥ်ထိန်းရဲ