မဲခေါင် ဇန်နစါရီ ၁၉
ရှမ်းပြည်နယ်မြောက်ပိုင်း၊ လားရှိုးမြို့ပေါ်မှာ ခိုလှုံဆဲ သိန္နီမြို့နယ်မှ စစ်ဘေးရှောင်တွေ စစ်ကောင်စီရဲ့ အထောက်အပံ့ မရတဲ့အတွက် စားနပ်ရိက္ခာတွေနဲ့အဝတ်အထည်၊ စောင်၊ အနွေးထည် တွေလိုအပ်နေတယ်လို့ သိရပါတယ်။
“နိုင်ငံတော်(စစ်ကောင်စီ)က လာလှူတာ အကျုံးမဝင်ဘူးဆိုပြီး မရဘူး၊ မန်ဆူနဲ့ကန်မိုင်းကျောင်း နှစ်ကျောင်းနဲ့ခရစ်ယန်ကျောင်းနှစ်ကျောင်းပဲရတယ်၊ ကျန်ကျောင်းတွေ မရဘူး၊ ဒီမှာတော့ တတ်နိုင်သမျှ စောင့်ရှောက်ပေးနေပေမယ့်၊ ဟင်းနဲ့အနွေးထည် အိပ်ယာစောင်တွေလိုအပ်နေတယ်၊ သူတို့လဲ ပြန်ချင်ကြပေမဲ့ မပြန်နိုင်သေးဘူး ဖြစ်နေကြတယ်” လို့ ကူညီစောင့်ရှောက်ပေးနေတဲ့ ဆရာတော်တစ်ပါးက မိန့်ကြားပါတယ်။
စစ်ကောင်စီ အထောက်အပံံ့ မရတဲ့ကျောင်း မှာ ခိုလှုံနေတဲ့စစ်ဘေးရှောင်တွေဟာ သိန္နီမြို့က ဖြစ်ပါတယ်။ စစ်ဘေးရှောင်တွေကို မန်ဆူနဲ့ ကန်မိုင်းကျောင်းတွေမှာသာစုခိုင်းတာဖြစ်လို့ အဲဒီကျောင်တွေကို မသွားရောက်ကြတဲ့ စစ်ဘေးရှောင်တွေကို အကျုံးမဝင်ဘူး သတ်မှတ်တာကြောင့် အထောက်အပံ့ မရတာလို့ ဆရာတော်က ရှင်းပြပါတယ်။
“သူတို့က မသွားချင်ကြဘူးလေ ကိုယ့်အစုနဲ့ကိုယ်နေချင်ကြတော့ မသွားကြဘူးပေ့ါ၊ ပရဟိတနဲ့ အချို့တွေ လာလှူကြပါတယ်၊ သူတို့အိမ်ပြန်ချင်တာကို ကိုယ့်အိမ်ကိုယ်ပြန်တာ ပြန်ကြပါလို့ တိုက်တွန်းထားတယ်” လို့ ဆရာတော်က မိန့်ကြားပါတယ်။
သိန္နီမြို့၊ ရေပူစမ်းက စစ်ဘေးရှောင်တစ်ဦးဖြစ်တဲ့ ဒေသခံတစ်ဦးက “ကျွန်မတို့ ပြီးခဲ့တဲ့ နိုဝင်ဘာ ၂၃ ကတဲက ပြေးလာကြတာ၊ ဒီမှာပထမတော့ ထမင်းဘူးတွေ ၊ အမျိုးသမီးသုံးတွေ လာကူကြပါတယ်၊ နောက်ပိုင်းတော့ နဲသွားတယ်၊ နိုင်ငံတော်က လာလှူပေမယ့် အကျုံးမဝင်လို့ မရဘူးလို့ သိရတယ်၊ ဒီမှာပဲ ကိုယ့်အစုနဲ့ကိုယ်နေချင်ကြတာလေ၊ လာခါစက ခုလောက်မအေးသေးတော့ အနွေးထည်တွေဘယ်ပါပါ့မလဲ၊ အဝတ် ၂ထည် ၃ ထည်ပေါ့၊ ခုတော့ အနွေးထည်တွေလိုအပ်တယ်၊ ချမ်းတော့ နေပူဆာလှုံတယ်၊ ညပိုင်းကိုတော့ ထင်း၊ သစ်ရွက်တွေကောက်ပြီး မီးလှုံကြရတယ်၊ စောင်အပါးလေးတွေတော့ရပေမယ့် မလုံလောက်ဘူးလေ၊ အိမ်ပြန်ဖို့ လမ်းတွေပိတ်ထားဆဲမို့ ကွင်းလမ်းတွေကသွားစုံစမ်းကြရတယ်၊ အိမ်ပြန်ချင်ပေမယ့် အခြေအနေတွေ နားထောင်ရင်း ဒီမှာ ကျောင်းဝေယျာဝစ္စလုပ်၊ ကလေးတွေကလည်း မြို့ထဲခေါက်ဆွဲဆိုင်တွေမှာ ပန်းကန်ဆေး၊ လက်သမားအလုပ်တွေလုပ်ရင်း နေနေရတယ်” လို့ သူက ပြောပါတယ်။
ပြီးခဲ့တဲ့ ဇန်နဝါရီ ၁၁ ရက် က လားရှိုးကို စစ်ကောင်စီဥက္ကဌလာရောက်ပြီး စစ်ဘေးရှောင်တွေအတွက် ကျပ်သိန်း ၅၀၀၀ လှူသွားခဲ့တာ နိုင်ငံပိုင် သတင်းတွေမှာဖော်ပြပါရှိထားပါတယ်။
သိန္နီက စစ်ဘေးရှောင်တွေ မန်ဆူကျောင်းမှာ ၈၀၀ ဦး၊ ကန်မိုင်း ၄၂၀ ဦး၊ရိပ်သာ ၁၃၀ ဦး၊ မန်ကောင်း ၄၅ ဦး၊ ကျောက်ဂူ ၃၀ ဦးနဲ့ တောရ ၂၀ ဦး အားလုံး ၁၄၄၅ ဦး ကျန်ရှိနေကြောင်း သိရှိရပါတယ်။
CJ-012
#စစ်ကောင်စီ
#စစ်ဘေးရှောင်
#လားရှိုး
#သိန္နီ
#လိုအပ်