မဲခေါင်၊ နို၀င်ဘာ ၁
ရှမ်းပြည်နယ် မြောက်ပိုင်းက တိုက်ပွဲတွေ အတွင်း အိုးအိမ်စွန့်ခွာ စစ်ဘေးရှောင်နေရသူ လူဦးရေ ၂၀,၀၀၀ ကျော်အထိ တိုးလာပြီး စားနပ်ရိက္ခာတွေ အရေးပေါ် လိုအပ်နေတယ်လို့ အကူအညီ ပေးနေသူတွေက ဒီကနေ့ ပြောပါတယ်။
၁၀၂၇ စစ်ဆင်ရေး အတွင်း ချင်းရွှေဟော်၊ လားရှိုး၊ သိန္နီ၊ နောင်ချို၊ ကျောက်မဲ၊ ကွတ်ခိုင်၊ မုံးကိုး စတဲ့ ဒေသတွေက လူ ၂၀,၀၀၀ ကျော်ဟာ ဘုန်းကြီးကျောင်းတွေနဲ့ လုံခြုံရာ နေရာတွေမှာ အိုးအိမ်စွန့်ခွာ စစ်ရှောင်နေရတယ်လို့ ဆိုပါတယ်။
လက်ရှိ တိုက်ပွဲတွေဟာ အရှေ့မြောက်တိုင်း စစ်ဌာနချုပ် (ရမခ) တည်ရှိရာ လားရှိုးမြို့ပေါ်အထိ ကျယ်ပြန့်လာပြီး လားရှိုးမြို့နယ်ရှိ ဘုန်းကြီးကျောင်း ၉ မှာ စစ်ရှောင် ၅၆၂၆ ဦးအထိ ရှိနေတယ်လို့ အကူအညီ ပေးနေသူတွေက ပြောပါတယ်။
လူဦးရေ အများဆုံး ခိုလှုံနေတဲ့ လားရှိုးမြို့ပေါ်ရှိ မန်ဆူဘုန်းကြီးကျောင်းမှာတော့ နေရာထိုင်ခင်းနဲ့ အခြေခံ စားသောက်ကုန်တွေ လိုအပ်နေတယ်လို့ စစ်ရှောင်စခန်း တာဝန်ခံ အရှင်စဝ်ခူးကောလိနဒက မိန့်ပါတယ်။
“ဒီမှာတော့ အဖွဲ့အစည်းတွေ ကူညီတာ မရှိသေးပါဘူး။ လူပုဂ္ဂိုလ်တွေပဲ လာလှူနေကြတာပါ။
စစ်ရှောင်တွေ ကတော့ ရွာ ၁၀ ရွာကျော်လောက် ရှိတယ်။ ဒီမှာတော့ ဖျားနာသူတွေ များနေတယ်” လို့ ဆရာတော်က မိန့်ကြားပါတယ်။
လက်ရှိ လားရှိုးမြို့နယ် ဟိုနမ့်ဘုန်းကြီးကျောင်းမှာ လူ ၂၅၀ ဦး၊ ဟိုပိတ်ဘုန်းကြီးကျောင်းမှာ ၂၀၀ ဦး၊ မိုင်းတင်ဘုန်းကြီးကျောင်းမှာ ၁၀၀ ဦး၊ ကုန်းဆာဘုန်းကြီးကျောင်းမှာ ၄၅၀ ဦး၊ မန်ဆူဘုန်းကြီးကျောင်းမှာ ၃၀၀၀ ဦး၊ မန်အိုင်အထက်ရွာ ဘုန်းကြီးကျောင်းမှာ ၁၆၀ ဦး၊ တာပုံဘုန်းကြီးကျောင်းမှာ ၅၀၀ ဦး၊ ပန်နားဘုန်းကြီး ကျောင်းမှာ ၆၆၆ ဦး၊ မိုင်းကြပ်ဘုန်းကြီးကျောင်းမှာ ၃၀၀ ဦး၊ စုစုပေါင်း လူ ၅၆၂၆ ဦး ရောက်ရှိ ခိုလှုံနေပါတယ်။
ဒါ့အပြင် MNDAA ပူးပေါင်းတပ်တွေ မြို့အဝင်အထွက်ကို ထိန်းချုပ်ထားတဲ့ သိန္နီမြို့နယ်မှာ ကျောင်းခမ်းရွာ ဘုန်းကြီးကျောင်းနဲ့ ဟိုမိန်းရွာ ဘုန်းကြီးကျောင်းမှာ လူ ၅,၀၀၀ ကျော် ခိုလှုံနေရပါတယ်။
ရှမ်းလူငယ်အဖွဲ့အစည်းရဲ့ ထုတ်ပြန်ချက်မှာတော့ ကျောင်းခမ်းရွာ ဘုန်းတော်ကြီးကျောင်းရှေ့ လှုပ်ရှားနေတဲ့ စစ်ကောင်စီတပ် ခမရ (၆၉) က စစ်ရှောင်စခန်းထဲက လက်နက်ကြီး ထိမှန် ဒဏ်ရာရသူ ၂ ဦးကို ဆေးကုသခွင့် မပေးလို့ စစ်ရှောင် ၂ ဦး သေဆုံးခဲ့ရတယ်လို့ ဖော်ပြပါတယ်။
MNDAA က သိမ်းပိုက်ထားတဲ့ ချင်းရွှေဟော်မြို့က ဒေသခံ ၁၀,၀၀၀ ကျော်ဟာ “၀” ကိုယ်ပိုင်အုပ်ချုပ်ခွင့်ရ နမ့်တစ်မြို့ဘက် ထွက်ပြေး တိမ်းရှောင် ခိုလှုံနေရတယ်လို့ ဒေသခံတွေက ပြောပါတယ်။
ဒါအပြင် နောင်ချိုမြို့နယ် သပြေတိုး၊ မြေစာကုန်းနဲ့ သဖန်းကိုင်း ဘုန်းကြီးကျောင်းတွေမှာ စစ်ရှောင် ၁,၀၀၀ ကျော်ရှိနေပြီး ကျောက်မဲမြို့နယ် ကောင်းခမ်း၊ နောင်ပိန် ဘုန်းကြီးကျောင်းမှာ စစ်ရှောင် ၄၅၀ ကျော်ရှိနေကာ ကွတ်ခိုင်မြို့နယ် မုံးစီးဒေသ နမ့်မော၊ နမ့်ဝမ်း၊ နမ့်ဆာကျေးရွာ ဘုန်းကြီးကျောင်းတွင် စစ်ရှောင် ၅၀၀ ဦးကျော် ရှိနေတယ်လို့ ဒေသတွင်း ကူညီနေသူတွေက ဆိုပါတယ်။
ဒီကနေ့မှာတော့ တိုက်ပွဲ ဖြစ်ပွားနေတဲ့ မိုးကိုးမြို့နယ်က ဒေသခံ ၅၀၀ ကျော်နဲ့ မန်တုံမြို့နယ်၊ မိုင်းဘော်နဲ့ ဟိုနားကျေးရွာတွေက ဒေသခံ ၁,၀၀၀ ခန့်ဟာ တောတောင်တွေထဲ ပိတ်မိနေတယ်လို့ သိရပါတယ်။
တိုက်ပွဲတွေ အတွင်း စစ်ကောင်စီတပ် ပစ်ခတ်တဲ့ လက်နက်ကြီးတွေကြောင့် ချင်းရွှေဟော်မြို့၊ ကွတ်ခိုင်မြို့နယ်၊ လားရှိုးမြို့နဲ့ နမ့်ခမ်းမြို့နယ်တို့မှာ အသက် ၇ နှစ်အရွယ် ကလေးငယ် အပါအဝင် ဒေသခံ ၁၂ ဦး သေဆုံးခဲ့သလို ၂၀ ဦး ထက်မနည်း ထိခိုက်ဒဏ်ရာရရှိခဲ့တယ်လို့ ဒေသတွင်း အကူအညီပေးရေး အဖွဲ့အစည်းတွေ ပြုစုထားတဲ့ စာရင်အရ သိရပါတယ်။
မြောက်ပိုင်းညီနောင် မဟာမိတ် ၃ ဖွဲ့ဖြစ်တဲ့ MNDAA၊ TNLA နဲ့ AAတို့ဟာ အောက်တိုဘာလ ၂၇ ရက်နေ့မှာ ၁၀၂၇ စစ်ဆင်ရေးနဲ့ စစ်ကောင်စီကို စစ်ကြေညာပြီး ရှမ်းမြောက် မြို့နယ်အနှံ့က တပ်စခန်းပေါင်း ၈၀ ကျော်ကို သိမ်းပိုက်နိုင်ခဲ့သလို ချင်းရွှေဟော်မြို့နဲ့ မူဆယ်ခရိုင်၊ ဖောင်းဆိုင်မြို့ကို သိမ်းပိုက်နိုင်ခဲ့ပါတယ်။
CJ-014
#MeKongNews
#ရှမ်းမြောက်
#စစ်ဘေးရှောင်
#မြောက်ပိုင်း_မဟာမိတ်
