မဲခေါင် ၊ ဇန်နဝါရီ ၁၈
ရှမ်းပြည်နယ်မြောက်ပိုင်း မူဆယ်မြို့ ၁၀၅ မိုင်ကုန်သွယ်ရေးဇုန်မှာ ရခိုင်တပ်တော် – AA က စစ်ဘေးရှောင်ပြည်သူများကို ဆန်စတဲ့ စားနပ်ရိက္ခာအကူအညီတွေကို ပေးအပ်ခဲ့တယ်လို့ AA က သတင်းထုတ်ပြန်ပါတယ်။
ဇန်နဝါရီ ၁၆ ရက်နေ့မှာ ရခိုင်တပ်တော် AA ဟာ စစ်ဘေးရှောင်ပြည်သူများကို မူဆယ် ၁၀၅ မိုင် ကုန်သွယ်ဇုန်အတွင်း နေ့လည် ၁ နာရီကနေ ညနေ ၆ နာရီအထိ လူသားချင်းစာနာမှု အကူအညီတွေ ပေးအပ်ခဲ့တာဖြစ်ပါတယ်။
စစ်ပွဲများကြောင့် ပြည်သူများအနေနဲ့ လူမှုစီးပွားဒုက္ခအဝဝ နဲ့ အခက်အခဲမျိုးစုံကြုံတွေ့ရတာ မှန်ပေမယ့် ဒီအခက်အခဲတွေကို အားလုံးစုပေါင်းရင်ဆိုင်ကြပြီး ပိုမိုကောင်းမွန်တဲ့ အနာဂတ်ကို ရောက်ရှိအောင် အားလုံးစုစည်းရင်ဆိုင်သွားကြဖို့ကိုလည်း AA က တိုက်တွန်းပြောဆိုထားပါတယ်။
“စစ်ဘေးဒဏ်နှင့်အတူ စားဝတ်နေရေးအခက်အခဲကြုံတွေ့နေရသော ပြည်သူများနှင့် မိမိတို့သည် တသွေးတည်း၊ တသားတည်း အချိန်မရွေးရှိနေပါသည်။ မိမိတို့သည် မည်သည့်နေရာ၊ မည့်သည့်ဒေသသို့ရောက်ရှိပါစေ လူမျိုးမရွေး၊ ဘာသာမရွေး ခွဲခြားစိတ်မရှိဘဲ အတူရပ်တည်နေပါသည်” လို့ AA ကပြောပါတယ်။
ဒါ့အပြင် စစ်ဘေးရှောင်ပြည်သူများကိုလည်း ညီနောင်မဟာမိတ် ၃ ဖွဲ့အနေနဲ့အပြင် တစ်ဖွဲ့ချင်းအနေနဲ့ပါ တတ်နိုင်သမျှ အကောင်းဆုံးပံ့ပိုးကူညီသွားမယ်လို့ ရခိုင်တပ်တော် AA က ထုတ်ပြန်ချက်မှာ ပြောဆိုထားပါတယ်။
CJ-002
#MeKongNews
#ရှမ်းမြောက်
#ရခိုင်
#AA
#ကူညီ