မဲခေါင်၊ အောက်တိုဘာ ၁၁
ကချင်ပြည်နယ်၊ လိုင်ဇာမြို့ အနီးရှိ မုန်လိုင်ခတ် စစ်ဘေးရှောင် စခန်းကို စစ်ကောင်စီ ဗုံးကြဲ တိုက်ခိုက်တာဟာ “အစုလိုက် အပြုံလိုက် သေကြေပျက်စီးစေရန် တင်ကူးကြံရွယ်ချက်” နဲ့ စစ်ရာဇဝတ်မှု ကျူးလွန်တာဖြစ်လို့ ပြင်းပြင်းထန်ထန် ကန့်ကွက် ရှုတ်ချတယ်လို့ ပအိုဝ်းအမျိုးသား ဖက်ဒရယ်ကောင်စီ-PNFC က ဒီကနေ့ ထုတ်ပြန်လိုက်ပါတယ်။
အောက်တိုဘာလ ၉ ရက်နေ့ ညသန်းခေါင်မှာ မုန်လိုင်ခတ် စစ်ရှောင်စခန်းကို စစ်ကောင်စီ လက်နက်ကြီးများနဲ့ ပစ်ခတ်ပြီး ဗုံးကြဲ တိုက်ခိုက်တာကြောင့် ကလေးသူငယ်တွေ အပါအဝင် စစ်ရှောင် ပြည်သူ ၃၀ ဦး အစုလိုက် အပြုံလိုက် သေဆုံးခဲ့ရပြီး လူ ၆၀ ကျော် ပြင်းထန်စွာ ထိခိုက်ဒဏ်ရာ ရရှိခဲ့ပါတယ်။
အခုလို ဗုံးကြဲ တိုက်ခိုက်တာဟာ အတုအယောင် ငြိမ်းချမ်းရေးကို ဗန်းပြကာ အတုအယောင် ပြည်ထောင်စုကို စစ်အာဏာရှင်စနစ်နဲ့ ထူထောင်ဖို့ ကြိုးပမ်းနေတဲ့ စစ်အုပ်စုနဲ့ စစ်အာဏာရှင်စနစ်ကို တစမကျန် ဖြိုဖျက်ရုံမှတပါး အခြား နည်းလမ်း မရှိတော့တာကို ပြသနေတယ်လို့ PNFC က ပြောပါတယ်။
“ ကလေးသူငယ် အပါအဝင် စစ်ရှောင် စခန်းကို ရက်ရက်စက်စက် သတ်ဖြတ်သွားတာ ဖြစ်ပါတယ်။ ဒီစစ်အုပ်စုဟာ လူထုရဲ့ ရန်သူ ဖြစ်ပါတယ်။ ပြည်သူလူထုကို ရန်သူလို့ သတ်မှတ်ပြီး နှိပ်စက် သတ်ဖြတ်နေတဲ့ စစ်အုပ်စုဟာ ဒီစစ်အုပ်စုနဲ့ စစ်အာဏာရှင်စနစ်ကို တစမကျန် ဖြိုဖျက်ရုံမှတပါး အခြားနည်း မရှိပါဘူး” လို့ PNFC ဥက္ကဌ ခွန်မြင့်ထွန်းက မှတ်ချက်ပြု ပြောပါတယ်။
NCA နှစ်ပတ်လည် အခမ်းအနား ကျင်းပမယ့် အချိန် နီးကပ်လာစဥ် NCA အစပြုခဲ့ရာ လိုင်ဇာဒေသမှာ စစ်ရာဇဝတ်မှု ထပ်မံ ကျူးလွန်တာဟာ စစ်ကောင်စီရဲ့ သရုပ်အမှန်ကို ထင်ရှားပေါ်လွင်စေတယ်လို့ PNFC က ဆိုပါတယ်။
၂၀၂၂ ခုနှစ်၊ အောက်တိုဘာလ ၂၃ ရက်နေ့က ကချင်ပြည်နယ်၊ အနန့်ပါ ပွဲခင်းအတွင်း စစ်ကောင်စီ ဗုံးကြဲပြီး အစုလိုက် အပြုံလိုက် သတ်ဖြတ်ခဲ့တာ တစ်နှစ်ပြည့်တော့မယ့် အချိန်မှာ အခုလို အစုလိုက် အပြုံလိုက် ထပ်မံ သတ်ဖြတ်ခဲ့တာ ဖြစ်ပါတယ်။
နမ့်နိန်းဒေသရှိ ပအိုဝ်းပြည်သူများ၊ ပဇီကြီးနဲ့ လက်ယက်ကုန်းမှ ကလေးသူငယ်များနဲ့ စစ်ကိုင်းပြည်သူများ အပါအဝင် တစ်ပြည်လုံးမှာ အစုလိုက် အပြုံလိုက် သတ်ဖြတ်မှုများစွာ ကျူးလွန်ခဲ့တဲ့ စစ်ကောင်စီဟာ မုန်လိုင်ခက် အပြင် အခြားဒေသတွေမှာ စစ်ရာဇဝတ်မှုများစွာ ထပ်မံ ကျူးလွန်ဦးမှာ ဖြစ်တယ်လို့ PNFC က သုံးသပ်ပါတယ်။
ဒါကြောင့် ပြည်သူကို ရန်သူလို့ သတ်မှတ်ထားတဲ့ စစ်တပ်ကို ပြည်သူလူထုက လူထုရဲ့ ရန်သူအဖြစ် ပြန်လည် သတ်မှတ် ဆန့်ကျင် တော်လှန်နေတာ ဖြစ်တယ်လို့ PNFC ရဲ့ ထုတ်ပြန်ချက်မှာ ဖော်ပြထားပါတယ်။
“ လူထု ရန်သူဖြစ်တဲ့ စစ်တပ်ဟာ တိုင်းပြည်ရဲ့ တရားဝင် တပ်မတော် တစ်ရပ်လည်း မဟုတ်တော့ပါဘူး” လို့ PNFC ဥက္ကဌ ခွန်မြင့်ထွန်း ကပြောပါတယ်။
ဒါကြောင့် စစ်အုပ်စုကို အရေးယူ အပြစ်ပေးနိုင်ဖို့ အပါအဝင် စစ်အာဏာရှင်စနစ် ဖျက်သိမ်းရေးနဲ့ ဖက်ဒရယ် ပြည်ထောင်စု တည်ဆောက်ရေးမှာ ကချင်ပြည်သူများ အပါအဝင် တောင်တန်း၊ မြေပြန့် ဒေသအသီးသီးရှိ တိုင်းရင်းသား ပြည်သူ တစ်ရပ်လုံးနဲ့ အတူ ပအိုဝ်းပြည်သူများက အစဉ်တစိုက် ပူးပေါင်း တော်လှန်သွားမယ်လို့ ပအိုဝ်းအမျိုးသား ဖက်ဒရယ် ကောင်စီက ထုတ်ပြန်ကြေညာထားပါတယ်။
CJ-002
#MekongNews
#မုန်လိုင်ခတ်_စစ်ရှောင်စခန်း
#PNFC
#ဗုံးကြဲ