မဲခေါင်၊ အောက်တိုဘာ ၉
ပဲခူးမြို့မှာ နှစ်ပေါင်း ၁၀၀ နီးပါးအတွင်း အဆိုးရွားဆုံးရေကြီးမှုနဲ့ ကြုံတွေနေရပြီး ရပ်ကွက်တချို့မှာ မြို့နေပြည်သူတွေ ပိတ်မိနေတယ်လို့ မြို့ခံတွေထံကနေ အောက်တိုဘာလ ၉ရက်မှာ သိရပါတယ်။
ရေကြီးလေ့မရှိတဲ့ အပိုင်းတွေဖြစ်တဲ့ မှော်ကန်၊ ဆိုရှယ်လစ်၊ ပုဏ္ဏားစု အပိုင်းတွေနဲ့ ပဲခူးဆေးရုံကြီးရှိတဲ့ ပြည်တော်သာရပ်ကွက်တွေမှာပါ ရေကြီးနေပြီး ကြိုတင်ပြင်ဆင်ချိန် နည်းခဲ့တဲ့အတွက် နေအိမ်မှာ ပိတ်မိတာ၊ စားစရာမရှိတာတွေကြုံနေရတယ်လို့ ပဲခူးမြို့မှာ ရေဘေးကူညီနေသူတစ်ဦးက မဲခေါင်ကို ပြောပါတယ်။
“ဒီဘက်ကမ်း (ပဲခူးမြစ်အရှေ့ဘက်ခြမ်း)က ရပ်ကွက်တွေက ရေကြီးလေ့မရှိဘူး။ အဲဒီတော့ ရေကြီးတာနဲ့ ပတ်သက်ပြီး သိပ်ပြင်ဆင်ထားတာမျိုး မရှိဘူးလေ။ ဟိုဘက်ကမ်း (ပဲခူးမြစ်အနောက်ဘက်ခြမ်း)မှာကတော့ ၂နှစ်တစ်ခါ၊ ၃နှစ်တစ်ခါ ကြီးလေ့ရှိတော့ ပြင်ပြင်ဆင်ဆင်ရှိတယ်။ မှော်ကန်တို့၊ ပုဏ္ဏားစုတို့ဘက်မှာဆို သက်ကြီးရွယ်အိုတွေ အိမ်ပေါ်မှာ ပိတ်မိနေတာတွေရှိတယ်။ ကယ်ဆယ်ရေးလည်း အားနည်းတယ်” လို့ သူက ပြောပါတယ်။
ဒီလိုရေကြီးတာဟာ နှစ်ပေါင်းများစွာအတွင်း အဆိုးဆုံးဖြစ်ပြီး သူ့ဘဝတစ်လျှောက် တခါမျှ မကြုံဖူးဘူးလို့ အသက် ၉၀ နီးပါး အရွယ်ရှိတဲ့ ပဲခူးမြို့ခံ အဘွားတစ်ဦးက ပြောပါတယ်။
“အရင်ကဆို ဇိုင်းတောင်၊ ဇိုင်းမြောက်တို့ ရွှေသာလျောင်းတို့ဘက်ပဲ ကြီးတာ။ အခုက မှော်ကန်တို့၊ ဆိုရှယ်လစ်တို့ပါကြီးတာ။ တသက်နဲ့တကိုယ်တခါမှ မကြုံဖူးဘူး” လို့ သူက ပြောပါတယ်။
ပဲခူးမြို့မှာရှိတဲ့ ဇိုင်းဂနိုင်းတောင်ပိုင်း၊ ဇိုင်းဂနိုင်းမြောက်ပိုင်း၊ ကလျာဏီ စတဲ့ ရပ်ကွက်တွေမှာ ၃နှစ်တစ်ကြိမ်နီးပါး ရေကြီးနစ်မြုပ်မှုကို ကြုံတွေ့ရလေ့ရှိပြီး ဒီနှစ်မှာတော့ တစ်နှစ်အတွင်း ၂ကြိမ်ကြီးတာကို ကြုံရတယ်လို့ ကလျာဏီရပ်ကွက်နေ ပြည်သူတစ်ဦးက ပြောပါတယ်။ ပထမအကြိမ် ရေကြီးမှုဟာ ဩဂုတ်လအတွင်းမှာ ဖြစ်ခဲ့တာပါ။
ရပ်ကွက်အများစု ရေကြီးနစ်မြုပ်နေတာကြောင့် ဖုန်းဆက်သွယ်ရေးစခန်းတွေလည်း ရေနစ်သွားတာကြောင့် MPT လိုင်းတွေ လုံးဝပြတ်တောက်နေသလို တခြားဖုန်းလိုင်းတွေလည်း လိုင်းမကောင်းဘူးလို့ မြို့ခံတွေထံက သိရပါတယ်။
ပဲခူးမြို့ရေကြီးတာဟာ ပဲခူးမြစ်အထက်ပိုင်းမှာရှိတဲ့ ဇောင်းတူဆည် ရေလွှတ်တာကြောင့် အများစုဖြစ်ပြီး လက်ရှိမှာ ဇောင်းတူဆည်က ရေဆက်လွှတ်နေဆဲဖြစ်တယ်လို့ ဇောင်းတူရွာအနီးမှာ နေထိုင်သူတစ်ဦးက ပြောပါတယ်။
လက်ရှိမှာတော့ ပြည်သူတွေပိတ်မိနေတဲ့ ပုဏ္ဏားစု၊ မှော်ကန်၊ ဆိုရှယ်လစ်အပိုင်းတွေထဲ ကယ်ဆယ်ရေးအဖွဲ့ပေါင်းစုံ သွားရောက်ကယ်ဆယ်နေတယ်လို့ သိရပါတယ်။
Photo – Credit
MK – 004
#MeKongNews
#ပဲခူးမြို့
#ရေကြီး
#MPT
