မဲခေါင်၊ ဒီဇင်ဘာ ၁၃
ရှမ်းပြည်မြောက်ပိုင်း၊ နမ့်ခမ်းမြို့ရှိ စစ်ကောင်စီ စခန်းသစ်မကျဆုံးရေးအတွက် စစ်ကောင်စီတပ်မှ ရဟတ်ယာဉ်ဖြင့် ပို့ဆောင်လိုက်သော စစ်ကူကို တအာင်း(ပလောင်) အမျိုးသားလွတ်မြောက်ရေးတပ်မတော်- PSLF/TNLA က မနေ့ ဒီဇင်ဘာ ၁၂ ရက်မှာ ချေမှုန်းလိုက်တယ်လို့ ထုတ်ပြန်ပါတယ်။
စစ်ကောင်စီတပ်မှ စခန်းသစ်ကုန်းဘက်သို့ စစ်ကူပေးရန် နမ့်ခမ်းမြို့နယ်၊ နောင်ကောင်ကျေးရွာ သချိုင်းကုန်းနဲ့ ကွန်လုံကျေးရွာဘောလုံးကွင်းဘက်တွင် ရဟတ်ယာဉ်နဲ့ စစ်ကူလူအင်အား (၁၀၀)နီးပါး (၃)ကြိမ် လာရောက်ပို့ချခဲ့တာပါ။
စစ်ကောင်စီတပ်မှ ပို့ဆောင်လိုက်သော စစ်ကူလူအင်အားများကို တအာင်းတပ်မတော် TNLA က လိုက်လံရှင်းလင်းချေမှုန်းရာတွင် စစ်ကောင်စီတပ်မှ ဖယိုဖရဲဖြစ်ပြီး အကျအဆုံးများခဲ့ပါတယ်။
ချေမှုန်းခံလိုက်ရတဲ့ စစ်ကောင်စီတပ်ထံမှ လက်နက်မျိုးစုံ (၁၉)လက်၊ ကျည်ဆံ (၄)သေတ္တာ၊ ဆက်သွယ်ရေးစက်၊ ဆေးဝါးများနှင့် စစ်သုံးဆောင်ပစ္စည်းများ သိမ်းဆည်းရမိခဲ့တယ်လို့ TNLA ထုတ်ပြန်ချက်က ဆိုပါတယ်။
စခန်းသစ်မကျဆုံးရေးအတွက် စစ်ကူလူအင်အားများ ပို့ဆောင်ပြီး လက်နက်ကြီးများ၊ လေကြောင်းတိုက်ခိုက်မှုများနဲ့ နေ့စဉ်ရာချီ အသုံးပြုကာကွယ်နေပါတယ်။
အဲ့ဒီအပြင် စစ်ရေးပစ်မှတ်မဟုတ်သော နမ့်ခမ်းမြို့နယ်ရှိ ကျေးရွာများကိုလည်း စစ်ကောင်စီတပ်က နေ့စဉ်ဦးတည်ပစ်ခတ်တိုက်ခိုက်နေတယ်လို့ TNLA က ထုတ်ပြန်ပါတယ်။
#MeKongNews
#စစ်ကောင်စီ
#စစ်ကူ
#TNLA
#ဖြတ်တိုက်
#တပ်ပျက်