မဲခေါင်၊ ဖေဖော်ဝါရီ ၁
ကရင်နီပြည်နယ်၊ ဒီးမော့ဆိုမြို့နယ် အနောက်ဘက်ခြမ်းမှာရှိတဲ့ စာသင်ကျောင်းတကျောင်းမှာ စာသင်ကြားပေးနေတဲ့ဆရာ /မ လိုအပ်နေတယ်လို့ အထက်တန်းကိုသင်ကြားပေးနေတဲ့ဆရာ/မ တွေက ဖေဖော်ဝါရီလ ၁ ရက်နေ့က ပြောပါတယ်။
စာသင်ကျောင်းမှာ စနစ်သစ်နဲ့ KG တန်းကနေ Grade 11အထိ ဖွင့်လှစ်ထားပြီး ကျောင်းသားအရေအတွက် ၁၃၀ ကျော်ကို ဒေသခံနဲ့ စစ်ရှောင် ဆရာ/မ ၁၄ ယောက်က ပညာသင်ကြားပေးနေတယ်လို့သိရပါတယ်။
“ ခုလက်ရှိအထက်တန်းမှာဆိုရင် ဆရာတယောက်ကို သုံးဘာသာကိုင်ရတယ်ပေါ့နော်။ အထက်တန်းနှစ်တန်းမှာ ဆရာ/မ ၄ ယောက်ပဲရှိတယ်။ အဲ့ပုံစံပေါ့။လုံးဝအဆင်မပြေဘူးပေါ့နော်။ အလယ်တန်းမှာလည်းအဲ့လိုပဲ ဆရာတွေက နားချိန်လုံးဝမရှိဘူး။သူတို့အတွက်လည်း အရမ်းဖိအားများစေတယ်” လို့ အထက်တန်းကိုသင်ကြားပေးနေတဲ့ဆရာမတဦးက ပြောပါတယ်။
ဒါ့အပြင် စာသင်ကျောင်းအနီးကို နိုဝင်ဘာလအတွင်းက ဗုံးကြဲခံရမှုကြောင့် ကျောင်းသား အယောက် ၂၀၀ ကျော်ရှိရာကနေ ခုလက်ရှိမှာတော့ ၁၃၀ ကျော်ပဲရှိတော့တယ်လို့ သိရပါတယ်။
“ ဆရာ/မ တွေ ကိုယ်တိုင်ကလည်း ကိုယ့်မှာရှိတဲ့အရည်အချင်းတွေကို ကလေးတွေဘက် ကူးစက်သွားနိုင်အောင်လို့ ကိုယ်တိုင် ပြည့်အောင် ဖြည့်ရတာမျိုးလည်းရှိပါတယ်။ စာမသင်ခင် အစစအရာရာပြင်ဆင်ရတာလည်းရှိပါတယ်” လို့ ဆရာမော်ကွန်းက ပြောပါတယ်။
သင်ထောက်ကူပစ္စည်းတွေအနေနဲ့လည်း လိုအပ်နေပြီး လက်တွေ့အနေနဲ့ ပြုလုပ်ပေးဖို့အတွက် အခက်အခဲရှိနေပေမယ့် ကျောင်းသူ ကျောင်းသားတွေအပေါ် စေတနာအဓိကထား သင်ကြားပေးနေပြီး စာသင်ကြားပေးလိုတဲ့ ဆရာ/မ တွေ ကိုလည်း ဖိတ်ခေါ်ပါတယ်လို့ဆိုပါတယ်။
စာသင်နှစ် တနှစ်ကိုတော့ ၂၀၂၃ ခုနှစ် ဇူလိုင်လကစဖွင့်ထားခဲ့ပြီး ၂၀၂၄ ခုနှစ် မတ်လမှာ အတန်းတင်စာမေးပွဲတွေနဲ့ စာသင်နှစ်တနှစ်ပြီးဆုံးမယ်လို့ သိရပြီး ဖေဖော်ဝါရီလ ၁ ရက်နေ့ကိုတော့ ကျောင်းပိတ်ထားတယ်လို့ သိရပါတယ်။
CJ004
#MeKongNews
#ဒီမော့ဆို
#စစ်ရှောင်
#ဆရာမ
#လိုအပ်