မဲခေါင်၊ ဒီဇင်ဘာ ၁၄
ရှမ်းပြည်နယ်မြောက်ပိုင်း၊ နမ့်ခမ်းမြို့၊ ပေါက်တိုက်မရပ်ကွက်ရှိ စစ်ရှောင် ၂၆၂ ကျော်ခိုလှုံနေတဲ့ ဇေယျသုခဘုန်းကြီးကျောင်းကို စစ်ကောင်စီက မနေ့ ဒီဇင်ဘာ ၁၃ ရက်နေ့မှာ လေကြောင်းကနေဗုံးကြဲခဲ့တယ်လို့ TNLA က ထုတ်ပြန်ပါတယ်။
စစ်ကောင်စီလေယာဉ်နဲ့ ဗုံးကြဲခဲ့တာကြောင့် ဘုန်းကြီးကျောင်းနေရာအများအပြား ပျက်စီးသွားခဲ့ပြီး ကိုရင်တစ်ပါးထိခိုက် ဒဏ်ရာတွေရရှိခဲ့တယ်လို့ ဆိုပါတယ်။
နမ့်ခမ်းမြို့ကို တအာင်း(ပလောင်)အမျိုးသားလွတ်မြောက်ရေးတပ်ဦး (TNLA) က ထိန်းချုပ်ထားပြီး မြို့နဲ့ ၁ မိုင်ခန့်အကွာမှာရှိတဲ့ စခန်းသစ်ကုန်း စစ်ကောင်စီစခန်းတစ်ခုသာ ကျန်ပါတော့တယ်။
အဲ့ဒီ့စခန်းသစ်ကုန်းကို သိမ်းပိုက်ဖို့ TNLA တိုက်ခိုက်နေတာ ၁ လခန့်ကြာမြင့်နေပြီး စစ်ကောင်စီကလည်း လေကြောင်းပစ်ကူ၊ လက်နက်ကြီးပစ်ကူတွေအပြင်၊ ရဟတ်ယာဉ်နဲ့ စစ်ကူတွေပို့ အပြင်းအထန်ခုခံနေပါတယ်။
စခန်းသစ်ကုန်းကို ရဟတ်ယာဉ်နဲ့စစ်ကူလာချပေးတဲ့ စစ်ကောင်စီတပ်သား ၁၀၀ ခန့်ကို ဒီဇင်ဘာ ၁၂ ရက်နေ့မှာ TNLA က ကြားဖြတ်တိုက်ခိုက်ခဲ့တာကြောင့် စစ်ကောင်စီဘက်က အများအပြားသေပြီး လက်နက်တွေလည်း ရရှိခဲ့ပါတယ်။
နမ့်ခမ်းမြို့ကို TNLA က ပြီးခဲ့တဲ့နိုဝင်ဘာ ၃ ရက်နေ့မှာ စတင်တိုက်ခိုက်ခဲ့ပြီး နိုဝင်ဘာ ၇ ရက်နေ့မှာ တစ်မြို့လုံးနီးပါး ထိန်းချုပ်ထားနိုင်ပြီလို့ TNLA က ကြေညာပါတယ်။
အုပ်ချုပ်ရေးရုံး၊ လဝက၊ စည်ပင်၊ ဥပဒေရုံး၊ တရားရုံးနဲ့ မြို့မစခန်းတွေကို TNLA က တိုက်ခိုက်သိမ်းပိုက်ခဲ့တာဖြစ်ပြီး လက်နက်ခဲယမ်းအများအပြားကိုလည်း သိမ်းမိခဲ့ပါတယ်။
တအာင်း(ပလောင်)ဒေသတွင်းမှာ “၁၀၂၇ စစ်ဆင်ရေး” စတင်ခဲ့တဲ့ ကာလအတွင်း စစ်ကောင်စီစခန်း ၆၀ ခန့်ကို TNLA က သိမ်းပိုက်ထားပြီး စစ်ကောင်စီတပ်ကလည်း လေကြောင်းကနေ ဗုံးကြဲမှုတွေ နေ့စဉ်ပြုလုပ်နေပါတယ်။
#MeKongNews
#နမ့်ခမ်း
#စစ်ကောင်စီ
#TNLA
#တအာင်း
#ပလောင်