မဲခေါင်၊ ဒီဇင်ဘာ ၂၂
ရှမ်းပြည်နယ် ကွတ်ခိုင်ဗျူဟာလက်အောက်ခံ ခလရ-၄၅ တပ်မှ စစ်ကောင်စီရဲ့ တပ်ကြပ် ၁ ဦးဟာ စစ်မတိုက်လိုတာကြောင့် ဒီဇင်ဘာ ၂၁ ရက်နေ့မှာ တအာင်း(ပလောင်)အမျိုးသားလွတ်မြောက်ရေးတပ်မတော် (TNLA) ထံ လက်နက်ချအလင်းဝင်ခဲ့ပါတယ်။
TNLA ရဲ့ တပ်မဟာ ၅ နယ်မြေဖြစ်တဲ့ ကွတ်ခိုင်မြို့နယ်မှာ လက်နက်ချအလင်းဝင်ခဲ့တာဖြစ်ပြီး သေနတ် ၁ လက်၊ RPG ၁ လက်နဲ့ ခဲယမ်းတွေပါ ယူဆောင်လာတယ်လို့ TNLA က သတင်းထုတ်ပြန်ပါတယ်။
အလင်းဝင်လာတဲ့ စစ်ကောင်စီတပ်ကြပ်နဲ့ပတ်သက်ပြီး နောက်ဆက်တွဲအခြေအနေကို မသိရသေးပါဘူး။ ကွတ်ခိုင်မြို့နယ်အတွင်းမှာတော့ စစ်ကောင်စီတပ်နဲ့ TNLA တို့ တိုက်ပွဲတွေဖြစ်ပွားနေပြီး ရွာ ၉ ရွာက ဒေသခံတွေ ထွက်ပြေးနေရပါတယ်။
ဒီဇင်ဘာ ၁၇ ရက်နေ့မှာ နမ္မတူမြို့နယ်၊ မန်စံကျေးရွာ စစ်ကောင်စီနဲ့ TNLA တို့ တိုက်ပွဲဖြစ်ပွားခဲ့ပြီး အဲ့ဒီ့တိုက်ပွဲမှာ လက်နက်ခဲယမ်းတွေ သိမ်းမိခဲ့တယ်လို့ TNLA က ထုတ်ပြန်ထားပါတယ်။
“၁၀၂၇ စစ်ဆင်ရေး” အတွင်း တအာင်း(ပလောင်)ဒေသတွင်းက စစ်ကောင်စီစခန်းတွေကို TNLA က တိုက်ခိုက်ခဲ့ပြီး ဒီဇင်ဘာလအထိ စစ်ကောင်စီစခန်း ၆၀ နီးပါးကို သိမ်းယူထားကာ မြို့နှစ်မြို့ကို အလုံးစုံထိန်းချုပ်ထားပါတယ်။
#MeKongNews
#တပ်ကြပ်
#စစ်ကောင်စီ
#အာပီဂျီ
#အလင်းဝင်
#လက်နက်ချ
