မဲခေါင်၊ ဒီဇင်ဘာ ၂
ကရင်ပြည်နယ်၊ ကော့ကရိတ်မြို့နဲ့ အနီးတဝိုက်မှာ ဒီကနေ့ မနက်ပိုင်းကစပြီး KNLA ပူးပေါင်းတပ်တွေနဲ့ စစ်ကောင်စီတပ် တိုက်ပွဲ ဖြစ်နေတယ်လို့ ဒေသခံတွေက ပြောပါတယ်။
ဒီနေ့ ဒီဇင်ဘာ ၁ ရက်၊ မနက် ၅ နာရီခွဲမှာ ကော့ကရိတ်မြို့ ပတ်လည်က တံတားဦး၊ ခင်နိမ်းမူ၊ ဝင်းကြီး၊ သပြေကုန်း၊ မြို့တော်ဦး၊ ချောင်းတောင်၊ အောက်ရွာ၊ မွေးမြူရေးဇုံ စတဲ့နေရာတွေမှာ လက်နက်ကြီး၊ လက်နက်ငယ်သံတွေနဲ့ တိုက်ပွဲသံတွေ ဆက်တိုက် ကြားနေရတယ်လို့ ဆိုပါတယ်။
“မနက်အာရုဏ်ဦးကတည်းက တိုက်ပွဲဖြစ်နေတာပါ။ အကြမ်းဖျင်းကတော့ စကစ တပ်စွဲထားတဲ့ နေရာတိုင်းကို ဝန်းရံပတ်ဆို့ပြီး တိုက်နေတာပါ” လို့ စစ်ရေးသတင်းရင်းမြစ် တစ်ဦးက မဲခေါင်သတင်းဌာနကို ပြောပါတယ်။
မနက် အစောပိုင်း စတင်ခဲ့တဲ့ တိုက်ပွဲကြောင့် ကော့ကရိတ်-မြဝတီ အာရှလမ်းပိုင်းနဲ့ ကော့ကရိတ်-ကျုံဒိုးလမ်း ပိတ်နေသလို ခရီးသွား ပြည်သူတွေနဲ့ ခရီးသွားကားတွေ လမ်းမှာ ရပ်တန့်နေရတယ်လို့ သိရပါတယ်။
ကော့ကရိတ်မြို့ပေါ်မှာ စစ်တပ်က လက်နက်ကြီး ပစ်ခတ်မှုတွေနဲ့ တိုက်ပွဲသတင်းတွေကြောင့် မြို့ခံတွေ နေရပ်စွန့်ခွာခဲ့ကြပြီး လက်ရှိအချိန်မှာ မြို့တွင်း ကျန်နေတဲ့သူတွေကတော့ ကျင်းပုန်းတွေထဲမှာ ခိုလှုံပြီး ပိတ်မိနေကြတယ်လို့ သိရပါတယ်။
KNU အနေနဲ့ ကော့ကရိတ်မြို့နယ် အပါအဝင် ကျိုက်ဒုံ၊ ကော့ကရိတ်၊ ဝေါလေ၊ စုကလိ မြို့တွေက စစ်ကောင်စီ အုပ်ချုပ်ရေးမှာ ပါဝင်နေသူတွေ တစ်ပတ် အတွင်း မြို့ထဲက ထွက်ခွာဖို့ နိုဝင်ဘာ ၁၇ ရက်နေ့က နောက်ဆုံး သတိပေးချက် ထုတ်ပြန်အပြီး ၂ ပတ်ကျော်မှာ KNLA ဘက်က အခုလို တိုက်ပွဲ စတင်လာတာ ဖြစ်ပါတယ်။
လက်ရှိအချိန်မှာ စစ်ကောင်စီ အထိုင်စခန်းတွေဘက်က ကော့ကရိတ်မြို့ပတ်လည်ကို လက်နက်ကြီးတွေနဲ့ ဆက်တိုက် ပစ်ခတ်နေသလို ဒီနေ့ တမနက်တည်းမှာ လေကြောင်းကနေ ၂ ကြိမ် ပစ်ကူပေးခဲ့တယ်လို့ ဒေသခံတွေထံက သိရပါတယ်။
MK-009
#MeKongNews
#ကော့ကရိတ်မြို့နယ်
#KNU
#လက်နက်ကြီး
