မဲခေါင်၊ မတ် ၂၂

ရှမ်းပြည်နယ် မြောက်ပိုင်း၊ တအာင်း ပြည်နယ်အတွင်း လက်ဖက် ရောင်းဝယ်ရေး လုပ်ငန်း လုပ်ကိုင်သူတွေ လိုက်နာရမဲ့ စည်းကမ်းချက်ကို ပလောင်ပြည်နယ် လွတ်မြောက်ရေးတပ်ဦး PSLF/TNLA က ထုတ်ပြန်လိုက်တယ်လို့ Ta’ang TV က ဒီကနေ့ ကြေညာလိုက်ပါတယ်။

လက်ဖက် လုပ်ငန်းတွေ အနေနဲ့ လက်ဖက်အတု ပြုလုပ်တာ၊ ကျန်းမာရေးနဲ့ မညီညွတ်တဲ့ ဓာတုဆေးဝါးတွေ ထည့်တာ၊ လက်ဖက် ကုန်ကြမ်း လာရောင်းတဲ့ လက်ဖက်စိုက် တောင်သူတွေ အပေါ် အကြွေးစနစ်နဲ့ ဝယ်တာ၊ ကုန်ပစ္စည်းချင်း အတင်းအကြပ် ရောင်းဝယ်တာတွေ မပြုလုပ်ရဘူးလို့ ထုတ်ပြန်ချက်က ဆိုပါတယ်။

ဒါ့အပြင် လက်ဖက်အစို၊ လက်ဖက်ခြောက် ၁ ပိဿာကို ၃ ဒသမ ၆ ပေါင် တစ်သမတ်ထဲ ထုတ်ပိုး ရောင်းချဖို့နဲ့ လက်ဖက်စိုနဲ့ လက်ဖက်စိမ်းတွေမှာ ရေမထည့်ရဘူးလို့ ဖော်ပြထားပါတယ်။

ဒီသတ်မှတ်ချက်တွေနဲ့ ပတ်သက်ပြီး လက်ဖက် လုပ်ငန်းရှင် တစ်ဦးကတော့ လိုက်နာသင့်တဲ့ အချက်တွေ ဖြစ်တယ်လို့ မှတ်ချက်ပြု ပါတယ်။

“ဒီအချက်တွေ ကတော့ လိုက်နာသင့်တဲ့ အချက်တွေလို့ပဲ ထင်တယ်။ အရမ်းကြီးလည်း တင်းကြပ်ထားတာ မဟုတ်တော့ ဒါက သိပ်ပြဿနာ မရှိပါဘူး’’ လို့ သူကပြောပါတယ်။

ထုတ်ပြန်ချက်မှာပါတဲ့ အချက်တွေကို လိုက်မနာရင် ပထမ အကြိမ် ပစ္စည်းတန်ဖိုး ၁၀ ရာခိုင်နှုန်း ဒဏ်ကြေးနဲ့ ခံဝန်၊ ဒုတိယ အကြိမ် ပစ္စည်း တန်ဖိုး ၅၀ ရာခိုင်နှုန်းနဲ့ ခံဝန် ရေးထိုးရမှာဖြစ်ပြီး တတိယအကြိမ် ထပ်ဖြစ်ပါက လက်ဖက်လုပ်ငန်း လုပ်ကိုင်ခွင့် ပိတ်သိမ်းမယ်လို့ ထုတ်ပြန်ချက်မှာ သတိပေးထားပါတယ်။

TNLA ဟာ မန်တုံနဲ့ နမ့်ဆန်မြို့နယ်အတွင်း အခြေစိုက်တဲ့ တိုင်းရင်းသား တော်လှန်ရေး အဖွဲ့ဖြစ်ပြီး ဒေသတွင်း လက်ဖက်စိုက်ဧက အများအပြား ရှိနေတာ ဖြစ်ပါတယ်။

MK-007

#MeKongNews

#ရှမ်းပြည်နယ်မြောက်ပိုင်း

#PSLF/TNLA

#လက်ဖက်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)