မဲခေါင်၊ အောက်တိုဘာ ၂၂
ရှမ်းပြည်တောင်ပိုင်း၊ ညောင်ရွှေမြို့နယ်၊ အင်လေးဒေသထွက် ခရမ်းချဉ်သီးတွေဟာ ၃ ဆနီးပါး ဈေးတက်လာပြီး ဈေးကွက်မှာ ရောင်းမလောက် အနေအထား ဖြစ်လာတယ်လို့ ပွဲရုံလုပ်ငန်းရှင်တွေက ပြောပါတယ်။
ရေကြီးရေလျှံမှု ကာလအတွင်း ခရမ်းချဉ်သီး ပျက်စီးဆုံးရှုံးမှုများကြောင့် ဈေးကွက်မှာ ပစ္စည်းရှားပါးလာပြီး ၈ ထောင်ကျပ်အထိ ဈေးတက်လာတယ်လို့ ဒေသတွင်း စိုက်ပျိုးတောင်သူ တစ်ဦးက ပြောပါတယ်။
“မနေ့ကတောင် ၆ ထောင်ပဲ။ ဒီနေ့တော့ ၂ ထောင်တက်တယ်။ တချို့နေရာတွေ တစ်သောင်း ဖြစ်ပြီလို့ ပြောတယ်။ အခုက အသီးကို မရှိတာ။ ကုန်းပေါ်သီးကတော့ ကြိုက်ရောင်း ကြိုက်ဝယ်ပဲ။ ၆ ထောင်လည်း ခေါ်နေတယ်” လို့ ဒေသတွင်း စိုက်ပျိုးတောင်သူ တစ်ဦးက ပြောပါတယ်။
စက်တင်ဘာလ အစပိုင်းက ခရမ်းချဉ်သီး တစ်ပိဿာကို ၂ ရာကျပ်သာ ရရှိတာကြောင့် တောင်သူတွေ စွန့်ပစ်ခဲ့ရပေမယ့် အောက်တိုဘာလအတွင်းမှာ ၃ ထောင်ကျပ်ကနေ တဖြည်းဖြည်း ခုန်တက်လာပြီး လက်ရှိ ဈေးကွက်အတွင်း ၈ ထောင်ကျပ်အထိ ရောင်းချနေကြတယ်လို့ သူက ဆက်ပြောပါတယ်။
အင်းလေးဒေသတွင်း ရေမမြုပ်ဘဲ တင်ကျန်ခဲ့တဲ့ စိုက်ခင်းတွေမှာလည်း မိုးများတာကြောင့် ခရမ်းချဉ်သီး ပျက်စီးခဲ့ရသလို ခရမ်းချဉ်သီးတွေ ရာသီဥတုဒဏ် မဖြစ်စေဖို့အတွက် ဆေးဖြန်းရတာကြောင့်လည်း ကုန်ကျစရိတ်များပြီး ဈေးတက်ရတာလို့ တောင်သူတွေက ဆိုပါတယ်။
“အတက်ကြမ်းဦးမယ်လို့ ခန့်မှန်းရတာပေါ့။ တစ်သောင်းကျော်ရင်တော့ အဝယ်မလိုက်တော့ရင် ဈေးကငြိမ်ပြီး တဖြည်းဖြည်း ပြန်ကျလာမှာပါ။ အခုက တချို့ဒေသတွေက သယ်ဖို့ဘာဖို့ အဆင်မပြေသေးတော့ အသီးကိုင်ထားတဲ့ သူတွေက ကြိုက်ဈေး ခေါ်ကြတာ” လို့ ပွဲရုံလုပ်ငန်းရှင် တစ်ဦးက သုံးသပ်ပါတယ်။
ညောင်ရွှေမြို့နယ်အတွင်း ရေကြီးရေလျှံမှုများကြောင့် ပွဲရုံအားလုံးနီးပါး ခရမ်းချဉ်သီးတွေ ရေထဲမျှောပါ ပျက်စီးခဲ့ရပြီး အင်းလေးဒေသမှာလည်း ခရမ်းချဉ်သီး ကျွန်ူးမျောဧကပေါင်းသောင်းချီ ရေမြုပ်ပျက်စီးခဲ့ရတယ်လို့ ဒေသတွင်း တောင်သူတွေဆီက သိရပါတယ်။
အင်းလေးဒေသမှာ ခရမ်းချဉ်သီးကို သပြေပင်၊ ပျားပင်၊ လယ်သစ်၊ မိုင်းသောက်အင်း၊ သလဲဦးအင်း၊ လင်းကင်း၊ ကေလာ၊ ဇရပ်ကြီး စတဲ့ ကျေးရွာတွေ အပါအဝင် ကျေးရွာပေါင်း ၅၀ ကျော်ခန့်မှာ စိုက်ပျိုးကြပြီး စိုက်ပျိုးမြေ ကျွန်းမျောဧကပေါင်း ၂ သိန်းနီးပါးခန့် ရှိနိုင်တယ်လို့ တောင်သူတွေက ခန့်မှန်းထားပါတယ်။
MK-014
