မဲခေါင်၊ ဒီဇင်ဘာ ၁
ရန်ကုန်တွင် စက်သုံးဆီဈေးနှုန်းများတစ်လီတာကို ၃၀၀ ကျော် မြင့်တက်လာပြီး ဆီဆိုင်အချို့ ဆီပြတ်လပ်မှုတွေဖြစ်ပေါ်နေတယ်လို့ ဈေးကွက်အတွင်း သတင်းအရသိရပါတယ်။
ဒီနေ့ စက်သုံးဆီဈေးနှုန်းမှာ 92 တစ်လီတာ ငွေကျပ် ၂၅၁၀ ကျပ်ရှိပြီး ယမန်နေ့က 92 တစ်လီတာ ၂၁၇၀ ကျပ်သာရှိပြီး တစ်ရက်အတွင်းတစ်လီတာကို ငွေကျပ် ၃၄၀ ကျပ် မြင့်တက်သွားတာပါ။
မနေ့ 95 တစ်လီတာ ၂၃၀၀ ကျပ်သာရှိခဲ့ပြီး ဒီနေ့မှာတော့ တစ်လီတာ ၂၆၄၀ ကျပ်အထိမြင့်တက်သွားတယ်လို့ သိရပါတယ်။
“ဆီဈေးက တစ်ရက်အတွင်းမြင့်တက်လာတာ၊ တစ်ချို့ ဆီဆိုင်တွေက ဆီမရဘူး ပြတ်လပ်တယ်တော့ မဟုတ်ဘူး၊ အခုမူဝါဒက အမျိုးမျိုးထုတ်နေတော့ လုပ်ငန်းရှင်တွေက ကုန်လှောင်ပြီး စောင့်ကြည့်နေတဲ့သဘော၊ စက်မှုဇုံသမားတွေကို အစိုးရကထုတ်မပေးဘူး၊ ကိုယ်တိုင်တင်သွင်းရမယ်ဆိုတော့ အဆင်မပြေမှုတွေက ကြုံလာတော့မယ်” လို့ စက်မှုလုပ်ငန်းရှင် တစ်ဦးကပြောပါတယ်။
ဒီဇင်ဘာ ၅ ရက်မှစတင်ကာ စက်မှုဇုန်များသို့ နိုင်ငံတော်အစီအစဉ်ဖြင့် စက်သုံးဆီ မရောင်းချပေးတော့ဘဲ လုပ်ငန်းရှင်များ မိမိကိုယ်တိုင် တင်သွင်းဖို့ အကြောင်းကြားလာတာကြောင့် စက်မှုဇုန်လုပ်ငန်းများ အခက်အခဲတွေဖြစ်ပေါ် နေတယ်လို့ ဆိုပါတယ်။
စက်သုံးဆီတင်သွင်းဖို့ လိုအပ်တဲ့ အမေရိကန်ဒေါ်လာကို တစ်ဒေါ်လာ ၂၁၀၀ ကျပ်နဲ့ စစ်ကောင်စီက ရောင်းမပေးတော့ဘဲ ဓာတ်ဆီဈေး တစ်လီတာ ၃၄၀ ကျော်မြင့်တက်တာလို့ ဆီလုပ်ငန်းရှင်အသိုင်းအဝိုင်းက လူမှုကွန်ယက်စာမျက်နှာပေါ်မှာ သတင်းဖော်ပြချက်တွေအရသိရပါတယ်။
၂၀၂၃- ဘဏ္ဍာရေးနှစ်အတွက် ဖြည့်စွက်ငွေစာရင်းတင်ပြတဲ့ ညှိနှိုင်းအစည်းအဝေးပွဲမှာ စက်သုံးဆီနဲ့ စားသုံးဆီကို အမြတ်တင်ရောင်းချခဲ့တဲ့ ကုမ္ပဏီ ၈ ခုနဲ့ စစ်ကောင်စီအဖွဲ့ဝင်တွေထဲက တာဝန်ရှိတဲ့သူတွေကို သတ်မှတ်ဥပဒေတွေအတိုင်း အရေးယူခဲ့တယ်လို့စစ်ကောင်စီရဲ့ ဒုတိယဗိုလ်ချုပ်မှူးကြီးစိုးဝင်းက ပြောဆိုထားပါတယ်။
MK-006
#MeKongNews
#စက်သုံးဆီ
#ဈေးမြင့်
#ပြတ်လပ်
#ဆီဆိုင်
#ရန်ကုန်