မဲခေါင်၊ ဖေဖော်ဝါရီ ၂၀
စစ်ကောင်စီတပ်ရဲ့ စစ်ရာဇဝတ်မှုကျူးလွန်မှုတွေဟာ အာဆီယံနိုင်ငံတွေအတွင်း “အယုတ်မာဆုံး ဖက်ဆက်စစ်တပ်” လို့ မြောက်ပိုင်းညီနောင်မဟာမိတ် ၃ ဖွဲ့က ဒီနေ့ ဖေဖော်ဝါရီ ၂၀ ရက်မှာ အပြင်းအထန်ဝေဖန် ထုတ်ပြန်ပါတယ်။
စစ်ကောင်စီတပ်ဟာ အရပ်သားပြည်သူတွေကို ပစ်မှတ်ထားတိုက်ခိုက်ခြင်း၊ သတ်ဖြတ်ခြင်း၊ စိတ်ပိုင်းဆိုင်ရာ ဒုက္ခမျိုးစုံတို့ကို တစ်နေ့တစ်မျို့ပေးနေတဲ့ လုပ်ရပ်တွေ မြန်မာနိုင်ငံတစ်ဝန်း ဖြစ်ပေါ်နေတယ်လို့ ညီနောက်မဟာမိတ် ၃ ဖွဲ့က ထုတ်ပြန်ပါတယ်။
အဲ့ဒါကြောင့်လည်း မြန်မာနိုင်ငံတစ်ဝန်းမှာ စစ်ကောင်စီတပ်ကို ခုခံတော်လှန် ဆန့်ကျင်တော်လှန်မှု အရှိန်လည်း မြင့်တက်နေတယ်လို့ ဆိုပါတယ်။
မြန်မာပြည်သူတစ်ရပ်လုံး လိုလားချက်နီးစပ်တဲ့ ရည်မှန်းချက်များကို “၁၀၂၇ စစ်ဆင်ရေး” ၄ လတာအတွင်း အပြည့်အဝမဟုတ်သည့်တိုင် အတိုင်းအတာစိတ်ကျေနပ်တဲ့ အောင်မြင်မှု၊ ရလာဒ်တို့ကို ရယူနိုင်ခဲ့တယ်လို့ ညီနောင် ၃ ဖွဲ့ရဲ့ ထုတ်ပြန်ချက်က ဆိုပါတယ်။
ရှမ်းမြောက်မှာ ၁၀၂၇ စစ်ဆင်ရေးကို အခြေအနေတစ်ခုကြောင့် ရပ်တန့်နေခဲ့သော်လည်း ရက္ခိုင့်တပ်တော်ဟာ ရခိုင်ပြည်နယ်အတွင်းမှာ တိုက်ပွဲများဆက်လက်ဖော်ဆောင်နေတယ်လို့ ဆိုပါတယ်။
မြောက်ပိုင်းမဟာမိတ် ၃ ဖွဲ့မှာ ကိုးကန့်တပ် MNDAA၊ တအာင်း(ပလောင်)တပ် TNLA နဲ့ ရခိုင်တပ် AA တို့ပါဝင်ပါတယ်။
၁၀၂၇ စစ်ဆင်ရေးမှာတော့ အဆိုပါတိုင်းရင်းသား လက်နက်ကိုင်သုံးဖွဲ့အပြင် NUG လက်အောက်မှာရှိတဲ့ PDF နဲ့ တော်လှန်ရေးတပ်ပေါင်းစုတွေဟာ ရှမ်းပြည်နယ်မြောက်ပိုင်းက စစ်ကောင်စီစခန်းနဲ့တွေကို တိုက်ခိုက် သိမ်းပိုက်နိုင်ခဲ့ပါတယ်။
