မဲခေါင်၊ ဖေဖော်ဝါရီ ၂၆
ရှမ်းပြည်တောင်ပိုင်း၊ ဟိုပုံးမြို့နယ်ရဲ့အရှေ့ဘက်ခြမ်းမှာ စစ်ကောင်စီတပ်နဲ့တိုက်ပွဲတွေ ယမန်နေ့ ဖေဖော်ဝါရီ ၂၅ ရက်က ဖြစ်ပွားခဲ့ပြီး စစ်ကောင်စီတပ်ဘက်က ဗိုလ်မှူးအဆင့် ၂ ဦးအပါ အလောင်း ၁၆ လောင်းနဲ့ လက်နက်မျိုးစုံသိမ်းဆည်းရမိတယ်လို့ PNLA က ဒီနေ့ ဖေဖော်ဝါရီ ၂၆ ရက်မှာ ထုတ်ပြန်ပါတယ်။
ယင်းတိုက်ပွဲဟာ ဟိုပုံးမြို့အရှေ့ဘက်ခြမ်း ၁ နေရာမှာ ယမန်နေ့ မနက် ၁၀ နာရီကနေ ညနေ ၃နာရီ မိနစ် ၄၀ အထိ ဖြစ်ပွားခဲ့တာဖြစ်ပြီး တိုက်ပွဲပြီးနောက် နယ်မြေရှင်းလင်းရာမှာ အလောင်း ၁၆ လောင်း တွေ့ရှိရာမှာ စစ်ကောင်စီရဲ့ အရာရှိ ၅ ဦးပါဝင်နေတာဖြစ်တယ်လို့ PNLA ထုတ်ပြန်ချက်က ဆိုပါတယ်။
အဆိုပါတိုက်ပွဲကနေ စစ်ကောင်စီတပ်တွေဆီက MA လက်နက်ငယ် ၁၅ လက်၊ ဒရုန်းပစ် လက်နက်၁ လက်၊ ပစ္စတို ၁ လက်နဲ့ လက်နက်ခဲယမ်းတွေ သိမ်းဆည်းရမိခဲ့တယ်လို့ သတင်းမှာ ဖော်ပြထားပါတယ်။
စစ်ကောင်စီတပ်ဟာ ထမ်ဆမ်းရွှေတိဂုံပုံတူစေတီတော်ကုန်းမှာ အင်အားအလုံးအရင်းနဲ့ လက်နက်ကြီးတွေ တပ်စွဲထားပြီး မဲနယ်တောင်ဒေသနဲ့လွယ်ဝိုးတုတ်ကျေးရွာတွေဘက်ကို လက်နက်ကြီးတွေနဲ့ မနေ့က တနေကုန် ပစ်ခတ်တိုက်ခိုက်ခဲ့တယ်လို့ ဆိုပါတယ်။
ဆီဆိုင်မြို့ကိုလည်း လက်နက်ကြီးနဲ့ ၁၀ ကြိမ်ထက်မနည်း ပစ်ခတ်တိုက်ခိုက်ခဲ့တယ်လို့ ပြောပါတယ်။ စစ်ကောင်စီနဲ့အပေါင်းပါတွေဟာ ဘာသာရေးဆိုင်ရာ မြင့်မြတ်နေရာတွေမှာ အကာအကွယ်ယူပြီး တိုက်ခိုက်ဖျက်ဆီးနေတာ ဟာ ပအိုဝမ်းလူမျိုးတွေရဲ့ နှလုံးသည်းအူကို မီးရှို့နေတဲ့ လုပ်ရပ်အပြင် ဘာသာရေးလွတ်လပ်ခွင့်ကိုပါ ထိပါးဖျက်ဆီးနေတယ်လို့ ပြောပါတယ်။
စစ်ကောင်စီလက်အောက်ခံ ပအိုဝ်းပြည်သူ့စစ်တွေအနေနဲ့ အာဏာရှင်စနစ် အောက်ကအမြန်ဆုံးရုန်းထွက်ပြီး အမျိုးသားလွတ်မြောက်ရေး လမ်းကြောင်းပေါ်ကို ကူးပြောင်းဖို့ လက်နက်ခဲယမ်းတွေနဲ့အတူ နီးစပ်ရာ PNLA တပ်ဖွဲ့တွေထံ ကူးပြောင်းလာပါက ထိုက်တန်တဲ့ဆုတွေ ချီးမြင့်သွားမယ်လို့ ထုတ်ပြန်ထားပါတယ်။
MK-012
