မဲခေါင်၊ နိုဝင်ဘာ ၂၄
စစ်ကိုင်းတိုင်း၊ ရေဦးမြို့နယ်က ပျူစောထီးရွာကို တော်လှန်ရေး မဟာမိတ်တပ်ပေါင်းစု ဝင်ရောက် တိုက်ခိုက်ရာ စစ်ကောင်စီဘက်က ၁၀ ဦးထက်မနည်း သေဆုံးပြီး ၁၅ ဦးထက်မနည်း ဒဏ်ရာရကာ စစ်သုံ့ပန်း ၇ ဦး လက်ရ ဖမ်းဆီးနိုင်ခဲ့တယ်လို့ ပြည်သူ့လွတ်မြောက်ရေး တပ်မတော်-PLA က ဒီကနေ့ ထုတ်ပြန်ပါတယ်။
ဒီကနေ့၊ နိုဝင်ဘာ ၂၄ ရက်၊ မနက်ပိုင်းက ကာဘိုး အနောက်ဘက်မှာရှိတဲ့ စစ်ကောင်စီနဲ့ ပျူစောထီး အခြေစိုက်ရာ အောင်သာယာကျေးရွာကို PLA နဲ့ မဟာမိတ် တပ်ပေါင်းစု ဝင်ရောက် တိုက်ခိုက်ခဲ့တာပါ။
အဆိုပါ တိုက်ပွဲမှာ အောင်သာယာကျေးရွာကို သိမ်းယူဖို့ ရည်ရွယ်ပေမယ့် စစ်ကောင်စီဘက်က လက်နက်ကြီးပစ်ကူ၊ ခြေလျင်စစ်ကူတွေအပြင် Mi-35 ရဟတ်ယဥ်နဲ့ပါ ပစ်ကူတာကြောင့် သုံ့ပန်းတွေနဲ့ စစ်ဘက်ဆိုင်ရာ ပစ္စည်းတွေ သိမ်းယူပြီး ပြန်လည် ဆုတ်ခွာခဲ့ရတယ်လို့ PLA က ဆိုပါတယ်။
ဒီတိုက်ပွဲအတွင်း တော်လှန်ရေးပူးပေါင်းတပ် ဘက်က ရဲဘော် ၅ ဦး မစိုးရိမ်ရတဲ့ ဒဏ်ရာ ရခဲ့တယ်လို့ သိရပါတယ်။
PLA တပ်ဖွဲ့အနေနဲ့ ဖမ်းဆီးရမိထားတဲ့ စစ်သုံ့ပန်းတွေကို အမှတ် (၁) စစ်ဒေသ လက်အောက်မှာ ဗမာပြည်ကွန်မြူနစ်ပါတီရဲ့ သုံ့ပန်း ပေါ်လစီနဲ့အညီ ထိန်းသိမ်းထားတယ်လို့ ထုတ်ပြန်ပါတယ်။
ဒီတိုက်ခိုက်မှုကို PLA အမှတ် (၁) စစ်ဒေသရဲ့ စစ်ရေးဦးဆောင်မှုနဲ့ မဟာမိတ်တပ်ပေါင်းစု တပ်ဖွဲံတွေဖြစ်တဲ့ ဗမာအမျိုးသား တော်လှန်ရေး တပ်မတော်-BNRA၊ 96 Soldiers PDF-အညာတပ်ခွဲ၊ စိန်ဗေဒါ KBU-ပကဖ၊ မိုးကြိုးမုန်တိုင်း-LPDF၊ ဝံသပါလ-LPDF၊ TCRF-PLA၊ ရွှေဘိုဓူဝံ-PLA၊ GZ LPDF တို့ ပူးပေါင်းဆောင်ရွက်ခဲ့တာလို့ သိရပါတယ်။
လက်ရှိ ရေဦးမြို့နယ် အတွင်းမှာ အင်တာနက်လိုင်း ပြတ်တောက်မှုတွေကြောင့် မြေပြင်တပ်ဖွဲ့တွေနဲ့ ဆက်သွယ်ဖို့ ခက်ခဲနေပြီး တိုက်ပွဲဖြစ်စဉ်နဲ့ အခြေအနေ အသေးစိတ်ကို မဲခေါင်သတင်းဌာနက စုံစမ်းနေဆဲ ဖြစ်ပါတယ်။
MK-009
#MeKongNews
#ရေဦးမြို့နယ်
#ပျူစောထီး
