မဲခေါင်၊ ဖေဖော်ဝါရီ ၁၆
ရှမ်းပြည်မြောက်ပိုင်း၊ မူဆယ်ခရိုင်၊ မုံးကိုးမြို့မှာ MNDAA အဖွဲ့က ဖေဖော်ဝါရီ ၁၅ ရက်နေ့မှာ နေအိမ်တွေထဲ လက်နက်ရှိမရှိ တစ်အိမ်ဝင် တစ်အိမ်ထွက် လိုက်လံစစ်ဆေးနေကြောင်း ဒေသခံတွေဆီက သိရပါတယ်။
“ အရမ်း စစ်နေတယ်။ ကျနော်တို့ ဒီဘက် တအိမ်ဝင်၊ တအိမ်ထွက် စစ်နေတယ်” လို့ ဒေသခံ အမျိုးသား တစ်ဦးက ပြောပါတယ်။
ယခုလိုမျိုး နေအိမ်တွေမှာ လက်နက်တွေ ရှိမရှိ လိုက်လံ စစ်ဆေးတာမျိုး အရင်တုန်းက တခါမှ မရှိဖူးဘူးလို့ ဆိုပါတယ်။
“ စစ်နေကြတယ်။ ကျနော့်အိမ်တော့ မစစ်သေးဘူး။ တခြားအိမ်တွေမှာ လိုက်စစ်နေတယ်။ စစ်ပြီး တွေ့တယ်လို့လည်း မကြားဘူး။ သူတို့ အခိုင်အမာ အုပ်ချုပ်တယ် ဆိုတဲ့ အကြောင်း ပြချင်တာပါ။ လက်နက်တွေ ရှိ၊မရှိ နေအိမ်တွေမှာ လိုက်စစ်တာ မှန်ပါတယ်” လို့ နောက်ထပ် ဒေသခံတစ်ဦးက ပြောပါတယ်။
တရုတ်နှစ်သစ်ကူး ကာလအတွင်းဖြစ်တဲ့တဲ့ ပြီးခဲ့တဲ့ ဖေဖော်ဝါရီ ၁၁ ရက်နေ့က မုံးကိုးမြို့ ရပ်ကွက် ၅ ဥက္ကဌ ရဲ့ နေအိမ်မှာ ဗုံး ပစ်ထည့်ခံရကာ ပေါက်ကွဲမှု ဖြစ်ပွားတယ်လို့ ကြားရပြီး လူအထိအခိုက်တော့ မကြားရဘူးလို့ သူက ပြောပါတယ်။
“ အဲဒီ ရပ်ကွက် ၅ ဥက္ကဌ နေအိမ်မှာ ဗုံးလာပစ်ထည့်တယ်ဆိုတာ မှန်တယ်။ အဲဒါ သူတို့ အကွက်ဆင်တာလား တော့မသိဘူး။ သူတို့ အကြောင်းပြချက် ခေါင်းစဉ်တပ်ပြီးမှပဲ သူတို့ လိုက်စစ်လို့ ရတာလေ။ သူတို့ လူလည်း ဖြစ်နိုင်တယ်။ လူမထိမယ့်နေရာ၊ ရပ်ကွက် ၅ ဆိုတော့ တော်တော် ဝေးတော့ လူနေကျဲတော့ သူတို့ ပစ်ထည့်လိုက်ပြီး အဲဒါကို ခေါင်းစဉ်တပ် လိုက်လံ စစ်ဆေးရှာဖွေ တာလည်း ဖြစ်နိုင်တယ်။ ဗုံးကွဲ တာတော့ မှန်တယ်။” လို့ သူက ရှင်းပြပါတယ်။
အခြေအနေက ဘယ်နေရာဖြစ်ဖြစ် သိပ်မကွာပဲ သူ့တို့ အစီအစဉ် ရှိလို့ လုပ်စရာရှိတဲ့ အလုပ် လုပ်ကာ သူတို့ တပ်ဖွဲ့ ခိုင်မာကြောင်း လုပ်ဆောင် ပြသတဲ့ သဘောရှိတယ်လို့ ဆိုပါတယ်။
ပြီးခဲ့တဲ့ ဖေဖော်ဝါရီလ ၁၁ ရက် နေ့က MNDAA က ပန်ဆိုင်းဒေသခံတွေကို အစည်းအဝေး ခေါ်ပြီး အစည်းအဝေးမှာ ဖြစ်ဖြစ်၊ ကိုးကန့်တပ်ဖွဲ့တွေရဲ့ သွားလာလှုပ်ရှားမှုတွေကို ဖြစ်ဖြစ် မှတ်တမ်းယူပြီး အွန်လိုင်းပေါ် မတင်ဖို့၊ KIA နဲ့ SSPP တပ်သားတွေကို စစ်ဝတ်စုံနဲ့ လက်နက်ကိုင်ဆောင်လာပါက မြို့ထဲ ပေးမဝင်ဖို့၊ မိမိနေအိမ်ရှိ သေနတ်ေတွကို အမြန်ဆုံး အပ်နှံဖို့၊ တစ်အိမ်တစ်ယောက် MNDAA မှာ စစ်မှုထမ်းဖို့၊ မြို့အဝင်အထွက် နဲ့ အုပ်ချုပ်ရေးရုံးတွေမှာ ကင်းစောင့်ပေးဖို့ ပြောဆိုသွားကြောင်း ဒေသခံတွေဆီက သိရပါတယ်။
CJ-008
