မဲခေါင်၊ ဧပြီ ၂၃
ရှမ်းပြည်မြောက်ပိုင်း၊ အထူးဒေသ(၁)နယ်မြေအတွင်း ပုဂ္ဂလိကဆေးရုံတွေ ဖွင့်ခွင့်မပြုဘူးလို့ MNDAA က မနေ့ ဧပြီလ ၂၂ ရက်က ကြေညာချက် ထုတ်ပြန်ပါတယ်။
အထူးဒေသ(၁)ရဲ့ ပြန်လည်ထူထောင်ရေး လုပ်ငန်းစဉ်မှာ အထူးဒေသ(၁) ကျန်းမာရေးဌာန ဖွဲ့စည်းတည်ဆောက်ကာ အထူးဒေသဆေးရုံတွေ ဖွင့်လှစ်ထားတယ်လို့ ဆိုပါတယ်။
လက်ရှိ ဖွင့်လှစ်ထားတဲ့ အထူးဒေသ (၁) အမှတ်(၁)ပြည်သူ့ဆေးရုံ(အိုက်မင်ဆေးရုံ)၊ လောက်ကိုင်ဆေးရုံ၊ ချင်းရွှေဟော်ဆေးရုံ၊ မူပန်(သိန္နီ)ခရိုင်ဆေးရုံ၊ ကွမ်းလုံ၊ မုံးကိုးနဲ့ တာမိုးညဲတိုက်နယ်ဆေးရုံ တွေဟာ နိုင်ငံတော်အဆင့် ကုသနိုင်စွမ်းရှိတယ်လို့ ဆိုပါတယ်။
အထူးဒေသ(၁)အုပ်ချုပ်ရေးကော်မတီက ဆေးကုသမှုနဲ့ စီးပွားရေးအကျိုးအမြတ်ရယူတဲ့လုပ်ငန်းရပ်တွေနဲ့ ဆေးရုံကိုစီးပွားရေး လမ်းကြောင်းအဖြစ် လုပ်ဆောင်လုပ်ရပ်ကို တားမြစ်တယ်လို့ အသိပေးကြေညာထုတ်ပြန်တာပါ။
လာမယ့် ဇွန် ၁ ရက်က စပြီး အထူးဒေသ(၁)နယ်မြေအတွင်း ပုဂ္ဂလိကဆေးရုံ၊ ဆေးခန်းအသစ်တွေ ဖွင့်လှစ်တာခွင့်မပြုကြောင်းနဲ့ အထူးဒေသ(၁) ကျန်းမာရေးလက်ငင်းမလွှမ်းမိုးနိုင်တဲ့နေရာတွေမှာတော့ မူလ ဆေးရုံ၊ဆေးခန်းတွေ ဆက်လက်ဖွင့်လှစ်နိုင်သော်လည်း မူလထက်မတိုးရ ဟု ဆိုပါတယ်။
မူလဆေးရုံ၊ ဆေးခန်းတွေ ဆက်လက်ဖွင့်လှစ်လိုပါက အထူးဒေသရဲ့ ကျန်းမာရေးဌာနကို လျှောက်လွှာတင်ပြီး ကျန်းမာရေးဌာနရဲ့ဆေးပညာအရည်အချင်းနဲ့ စက်ကိရိယာတွေကို စုံစမ်းစစ်ဆေးပြီးမှ ခွင့်ပြုမယ်လို့ ဆိုပါတယ်။
နယ်မြေအတွင်းက ဆေးရုံ၊ ဆေးခန်း၊ ဆရာဝန်နဲ့ သူနာပြုတွေဟာ အထူးဒေသကျန်းမာရေးဌာနရဲ့ အုပ်ချုပ်မှုနဲ့ နေရာပြောင်းရွှေ့မှုကို လိုက်နာရန်နဲ့ ကျန်းမာရေးဌာနရဲ့ ကုသရေးပိုင်းဆိုင်ရာ ကြီးကြပ်ကိုင်တွယ်မှုကို လက်ခံရမယ်လို့ ဆိုပါတယ်။
MK-012