မဲခေါင်၊ ဒီဇင်ဘာ ၂၈
၁၀၂၇ စစ်ဆင်ရေးအတွင်း ညီနောင်မဟာမိတ် ၃ဖွဲ့ရဲ့ ဒေသတွေမှာ စစ်ကောင်စီတပ်တွေဟာ ရုပ်ပျက်ဆင်းပျက်ကျရှုံးနေပြီး ပြည်သူလူထုတစ်ရပ်လုံးရဲ့ ဆန္ဒပြည်ဝဖို့နီးစပ်လာပြီဖြစ်တဲ့အတွက် လာမယ့်နှစ်သစ်မှာ တော်လှန်ရေးကို ပိုမိုအားစိုက်ကြိုးပမ်းကြဖို့ ညီနောင်မဟာမိတ် ၃ဖွဲ့က တိုက်တွန်းလိုက်ပါတယ်။
၁၀၂၇ စစ်ဆင်ရေး ၂လပြည့်မြောက်တဲ့ ဒီဇင်လာလ ၂၇ရက် ညပိုင်း စစ်ရေးထုတ်ပြန်ချက်မှာ ထည့်သွင်းတိုက်တွန်းထားတာ ဖြစ်ပါတယ်။
ဘုံရန်သူစစ်ကောင်စီကို တော်လှန်တိုက်ခိုက်တဲ့အဖွဲအစည်းတွေ တစ်ရက်ထက်တစ်ရက် များပြားလာနေခြင်းဟာ မြန်မာပြည်သူလူထုတစ်ရပ်လုံး လိုလားသောဆန္ဒ ပြည့်ဝဖို့ နီးစပ်လာတာဖြစ်ပြီး တစ်နိုင်ငံလုံးစစ်ဆင်ရေး အသွင်ပုံစံမျိုးနဲ့ ဖက်ဆစ်စစ်အာဏာရှင်ကို တော်လှန်တိုက်ခိုက်နေတာဟာ လွတ်လပ်ရေးကြိုးပမ်းမှုကာလဖြစ်တဲ့ ၁၉၄၅ခုနှစ်၊ မတ်လအတွင်းက ဖက်ဆစ်တို့ကို မောင်းထုတ်တဲ့ အသွင်သဏ္ဍာန်နဲ့တူတယ်လို့ ညီနောင်မဟာမိတ် ၃ဖွဲ့က ဆိုပါတယ်။
ညီနောင်မဟာမိတ် ၃ဖွဲ့အနေနဲ့ ၁၀၂၇ စစ်ဆင်ရေးကို ဆင်နွှဲခဲ့တာ ၆၂ရက် ရှိပြီဖြစ်ပြီး ဒီကာလအတွင်း ရန်သူ့စစ်စခန်းနဲ့ မြို့ကြီးအမြောက်အများကို သိမ်းပိုက်ရယူနိုင်ခဲ့ကာ စစ်ဆင်းရေးပစ်မှတ်တွေကို ချေမှုန်းတိုက်ခိုက်နိုင်ခဲ့တယ်လို့ သူတို့ရဲ့ ထုတ်ပြန်ချက်မှာ ဖော်ပြထားပါတယ်။
စစ်ဆင်ရေးနယ်မြေနဲ့ ဆက်စပ်တဲ့ မြို့ကြီးအချို့ကို တော်လှန်ရေးတပ်တွေက ထိန်းချုပ်ထားပြီး အုပ်ချုပ်ရေးယန္တရား ပုံမှန်လည်ပတ်နိုင်ရေး ကြိုးပမ်းဆောင်ရွက်နေတယ်လို့ ညီနောင်မဟာမိတ် ၃ဖွဲ့က ဆိုပါတယ်။
အထိနာနေတဲ့ စစ်ကောင်စီတပ်ဟာ တိုက်ပွဲပြင်းထန်တဲ့ဒေသတွေဖြစ်တဲ့ ရှမ်းမြောက်နဲ့ ရခိုင်ပြည်နယ်က ပြည်သူတွေကို ပစ်မှတ်ထားပြီး မတရားဖမ်းဆီးတာ၊ ပစ်မှတ်ထားတိုက်ခိုက်တာ၊ အိုးအိမ်တွေကို တိုက်ခိုက်ဖျက်ဆီးတာ၊ ခိုးယူလုယက်တာတွေ လုပ်နေတယ်လို့ အဲဒီထုတ်ပြန်ချက်မှာ ဖော်ပြထားပါတယ်။
#MeKongNews
#Operation1027
#MNDAA
#TNLA
#AA
