မဲခေါင်၊ မတ် ၁၄
ကချင်ပြည်နယ်၊ မိုးမောက်မြို့နယ်၊ မြို့သစ်ကျေးရွာအုပ်စုရှိ ဒါဆိုင်း ခလရ ၂၃၇ စစ်ကောင်စီစခန်း တနေရာကို ဒီနေ့ မတ်လ ၁၄ ရက်မနက် ၈ နာရီ ဝန်းကျင်ခန့်က KIA နဲ့ ပူးပေါင်း မဟာမိတ် တပ်ဖွဲ့ က သိမ်းပိုက်လိုက်ကြောင်း ရှေ့တန်း နဲ့ နီးစပ်တဲ့ သတင်းရင်းမြစ်တွေဆီက သိရပါတယ်။
“ မြို့သစ် ဒါဆိုင်းက စစ်ကောင်စီ တပ်ကို သိမ်းလိုက်ပြီး။ ရှင်းနေတုန်းပဲ။ ပစ္စည်းတွေသယ်နေတယ်” လို့ ရှေ့တန်း နဲ့ နီးစပ်တဲ့ သတင်းရင်းမြစ် တစ်ဦးက ပြောပါတယ်။
ဒီမနက် အစောပိုင်းမှာ အဲဒီ ဒါဆိုင်း စစ်ကောင်စီ စခန်းကို KIA တပ်မဟာ ၃၊ တပ်ရင် ၁၅ နဲ့ ပူးပေါင်း မဟာမိတ်တပ်ဖွဲ့တွေက နောက်တကျော့ ထပ်မံ ထိုးစစ်ဆင်ရာ မနက် ၈ နာရီကျော်ခန့်က သိမ်းနိုင်ခဲ့တာလို့ သူက ပြောပါတယ်။
“ စခန်းက အကျယ်ကြီးပဲ။ အကုန်လုံး သိမ်းလို့ မပြီးသေးဘူးလို့ ပြောတယ်။ ဧက အရမ်းများလို့လေ” လို့ သူက ဒေသခံ အမျိုးသမီး တစ်ဦးက ပြောပါတယ်။
သိမ်းဆည်းရရှိထားတဲ့ လက်နက်ခဲယမ်းပစ္စည်းတွေနဲ့ ထိခိုက်မှု အခြေအနေကိုတော့ မသိရသေးဘူးလို့ ဆိုပါတယ်။
ယမန်နေ့ မတ်လ ၁၃ ရက်နေ့မှာလည်း KIA နဲ့ ပူးပေါင်းတယ်ဖွဲ့တွေ ဖားကန့် နမ့်မှော်နားက တန် ၃၀၀၀ စစ်ကောင်စီစခန်းကို သိမ်းပိုက်ခဲ့ပါသေးတယ်။
ယခု မတ်လ အတွင်း KIA နဲ့ ပူးပေါင်း တပ်ဖွဲတွေက လိုင်ဇာအနီးဝန်းကျင်နဲ့ မိုးမောက်မြို့နယ်၊ ဝိုင်းမော်မြို့နယ်၊ ဖားကန့်မို့နယ်၊ ဆွမ်ပရာဘွမ် မြို့နယ်တွေမှာ ရှိတဲ့ စစ်ကောင်စီ စခန်း ၂၀ ကျော်ကို သိမ်းပိုက်ရရှိထားတာ ဖြစ်ပါတယ်။
CJ-008
