မဲခေါင်၊ ဇန်နဝါရီ ၂၉

စစ်ကောင်စီလက်အောက်ခံ ရှမ်းပြည်နယ်ဝန်ကြီးချုပ် ဦးအောင်ဇော်အေးက တောင်ကြီးမြို့နယ်က စစ်ကောင်စီလက်အောက်ခံ ဝန်ထမ်းတွေကို တောင်ကြီးမြို့ကို တိုက်ပွဲကူးစက်လာရင် အသင့်ရှောင်နိုင်အောင် ပြင်ဆင်ခိုင်းထားတယ်လို့ သိရပါတယ်။

တောင်ကြီးမြို့နယ် ဌာနဆိုင်ရာအသီးသီးက ဝန်ထမ်းတွေကို လစာ ၃ လစာ ကြိုထုတ်ပေးဖို့ ဝန်ကြီးချုပ်က ညွှန်ကြားထားတယ်လို့ ဆိုပါတယ်။

တောင်ကြီးမြို့က CDM ဆရာမ တစ်ဦးက “တောင်ကြီးက ဝန်ထမ်းတွေကို လစာ ၃ လစာကြိုထုတ်ပြီး ရှောင်ဖို့ပြင်ဆင်ခိုင်းနေတယ်။ လစာတော့ ကြိုမထုတ်ပေးသေးဘူး။ ပြင်ဆင်ခိုင်းတာပဲရှိသေးတယ်“ လို့ ပြောပါတယ်။

ဒါ့အပြင် ဇန်နဝါရီ ၂၇ ရက် ညနေပိုင်းမှာ စစ်ကောင်စီတပ်က တောင်ကြီးမြို့ အထက်တန်းကျောင်းတွေက စာရွက်စာတမ်းအချို့ကို လာသိမ်းပြီးနောက် ဝန်ထမ်းတွေကို အထုပ်အပိုးတွေ အသင့်ပြင်ထားဖို့နဲ့ သတင်းမပေါက်ကြားစေဖို့ မှာသွားတယ်လို့ သတင်းရင်းမြစ်တွေက ပြောပါတယ်။

တောင်ကြီးမြို့ အမှတ်(၂) အထက်တန်းကျောင်းက ဆရာတွေကို အခြားမြို့ကိုပြောင်းရွှေ့တာဝန်ထမ်းဆောင် ချင်သူတွေ ကိုယ့်သဘောနဲ့ကိုယ် အလွယ်တကူ ပြောင်းနိုင်အောင် ဆားဗစ်ဘုတ် (Service Book )တွေ ထုတ်ပေးခဲ့တယ်လို့ သိရပါတယ်။

CDM ကျောင်းဆရာမတစ်ဦးက “ ဆားဗစ်ဘုတ် (Service Book )ဆိုတာ အလုပ်စဝင်တဲ့အချိန်ကနေ အခုလက်ရှိ လုပ်နေတဲ့ဟာတွေ မှတ်တမ်းတင်ထားတာ။ အပြောင်းအရွှေ့သွားရင် အဲ့ကျောင်းနာမည်တွေကော ထည့်ရေးပြီးမှတ်ထားတာပေါ့။ လစာ လည်း ၂ နှစ်ခြား တစ်ခါ နှစ်ထောင်တိုးတာတွေ မှတ်တမ်းထားတဲ့ စာအုပ်။ သူက အရေးကြီးတယ်။ မူလရင်းမြစ်ဟာမျိုးပေါ့။ သက်ဆိုင်ရာ မြို့နယ်၊ ခရိုင်၊ ပြည်နယ်/တိုင်း ပညာရေးရုံးတွေကပဲ သိမ်းထားရတာ။ ဆရာမတွေလက်ထဲ ထည့်ပေးလေ့မရှိဘူး” လို့ ရှင်းပြပါတယ်။

တောင်ကြီးမြို့နယ်၊ ကျောက်တလုံးကြီးကျေးရွာ အထက်တန်းကျောင်းကတော့ ပြီးခဲ့တဲ့ သောကြာနေ့(ဇန်နဝါရီ ၂၆) ကစပြီး တပတ်တိတိကျောင်းပိတ်ထားတယ်လို့ သိရပါတယ်။

လက်ရှိ တောင်ကြီးမြို့မှာ စစ်မဖြစ်ခင်ကတည်းက တိမ်းရှောင်လာတဲ့ ဆီဆိုင်မြို့နဲ့ ဟိုပုံးမြို့က ဝန်ထမ်းတွေဟာ တောင်ကြီးက သက်ဆိုင်ရာရုံးတွေမှာ စုပြုံရောက်နေပြီး ဆီဆိုင်ရဲစခန်းက ရဲနဲ့မိသားစုတွေကို တောင်ကြီးမြို့၊ ပလီလင်းဘုန်းကြီးကျောင်းက နေစရာပေးထားတယ်လို့လည်း သိရပါတယ်။

CJ-001

#MeKongNews

#တောင်ကြီး

#စစ်ကောင်စီ

#ဝန်ထမ်း

#စစ်မီး

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)