မဲခေါင်၊ ဧပြီ ၅
ရှမ်းပြည် တောင်ပိုင်း၊ ညောင်ရွှေမြို့နယ်၊ လင်လမ်တောင် ကျေးရွာအုပ်စု၊ ထီရီးကျေးရွာ တောင်ဘက်မှာ တိုက်ပွဲ ပြင်းထန်နေတာကြောင့် ကျေးရွာနေပြည်သူတွေဟာ ထွက်ပြေး တိမ်းရှောင်နေရတယ်လို့ စုံစမ်း သိရပါတယ်။
ဧပြီလ ၄ ရက်နေ့ကတည်းကစပြီး စစ်ကောင်စီ၊ ပအိုဝ်းပြည်သူ့စစ် (PNA) ပူးပေါင်းတပ်တွေနဲ့ ကရင်နီတော်လှန်ရေး အင်အားစုတွေအကြား ပြင်းထန်တိုက်ပွဲ ဖြစ်ပွားနေတာပါ။
ထီရီးကျေးရွာခံ တစ်ဦးက “အကုန်လုံးနီးပါး ပြေးနေရပြီ။ အဝေးလည်း မပြေးနိုင်ဘူး။ ပိုက်ဆံက လိုတယ်လေ။ တောထဲ၊ တောင်ထဲပဲ ပြေးရတာပေါ့။ နည်းနည်းငြိမ်ပြီဆို ပြန်လာကြပေါ့။ အကုန်လုံးက သတိနဲ့ သွားလာ၊ လှုပ်ရှားရတာပေါ့” လို့ ပြောပါတယ်။
ပြီးခဲ့တဲ့ မတ်လ အလယ်ပိုင်းကတည်းက ထီရီးကျေးရွာအနီး တိုက်ပွဲတွေကြောင့် ဒေသခံတွေဟာ ထွက်ပြေးတိန်းရှောင်နေရပြီး ဒီလထဲမှာ တိုက်ပွဲငြိမ်သက်နေတာကြောင့် ၃၀ ရာခိုင်နှုန်းလောက်က အိမ်ပြန်နေကြပေမယ့် လက်ရှိမှာတော့ အားလုံးနီးပါး ပြန်လည် တိန်းရှောင်နေရတယ်လို့ ဆိုပါတယ်။
အလားတူ ညောင်ရွှေမြို့နယ်၊ နန်းတုတ်နဲ့ ညောင်လေးပင် ကျေးရွာအနီးမှာလည်း ဧပြီလ ၂ ရက်နေ့ကတည်းက တိုက်ပွဲ ပြင်းထန်နေတာကြောင့် ဒေသခံအားလုံးနီးပါး တိမ်းရှောင်နေရတယ်လို့ နီစပ်တဲ့ သတင်းအရင်းအမြစ်တွေဆီက သိရပါတယ်။
ဒေသခံတွေ အနေနဲ့ ဘယ်အချိန်မှာ တိုက်ပွဲပြီးမလဲဆိုတာ မသိနိုင်တာကြောင့် စစ်ဘေးရှောင်ကာလ ကြာလာတာနဲ့အမျှ စားဝတ်နေရေး ခက်ခဲလာမှာကို စိုးရိမ်ပူပန်နေကြပါတယ်။
လင်လမ်တောင် ကျေးရွာအုပ်စုမှာ စစ်ကောင်စီတပ်က စစ်မှုထမ်းဖို့အတွက်လည်း လူငယ်ပိုင်းတွေကို ခေါ်ယူနေပြီး ကျေးရွာနေပြည်သူတွေ အနေနဲ့ ကိုယ်စားငှားဖို့ မတတ်နိုင်တာကြောင့် ကိုယ်တိုင်ကိုယ်ကျ လိုက်သွားနေရတယ်လို့ ဆိုပါတယ်။
MK-014
