မဲခေါင်၊ ဖေဖော်ဝါရီ ၆
ရှမ်းပြည်တောင်ပိုင်း၊ ဆီဆိုင်မြို့နဲ့ ၁၆ မိုင်ခန့်ဝေးတဲ့ လွယ်ပွတ်နဲ့ တွေပူးကျေးရွာတွေမှာ PNLO နဲ့ စစ်ကောင်စီ၊ ပြည်သူ့စစ် PNO တို့နဲ့ ဒီနေံ ဖေဖော်ဝါရီ ၆ ရက် မနက်ပိုင်းကမှာ တိုက်ပွဲများ ပြင်းထန်နေတယ်လို့ သိရပါတယ်။
စစ်ကောင်စီတပ်က လေကြောင်းက ဗုံးကြဲပြီး ၆၀ မမ စိန်ပြောင်းကျည်လုံးရေ ၅၀ ခန့် ပစ်ခတ်ခဲ့ကာမြေပြင်ထိုးစစ်ကို PNLA က တန်ပြန်တိုက်ခိုက်နေတယ်လို့ မြေပြင်သတင်းတွေအရ သိရှိရပါတယ်။
မနက် ၁၁ နာရီ၀န်းကျင်ခန့်မှာ စစ်ကောင်စီက လေယာဉ်နဲ့ ဗုံး ၃ခါ ကြဲပြီးတဲ့နောက် စိန်ပြောင်းများနဲ့ ပစ်ခတ် စစ်ကြောင်းတက်လာတာပြီး PNLA တွေနဲ့ တိုက်ပွဲဖြစ်တာလို့ သိရပါတယ်။
ရွာလေးငါးရွာက အားထားရတဲ့ သောက်ရေ ချိုးရေကန်ထဲ လက်နက်ကြီးကျတော့ ဘယ်ရေသွားသောက်ရပါ့
လို့ လွယ်ပွတ်ရွာခံတစ်ဦးက မှတ်ချက်ပြုပါတယ်။
တိုက်ပွဲဖြစ်မယ့် ကြိုတင်သတင်းအရ ဒေသခံတွေကို ဘေးလွတ်ရာ ရှောင်ခိုင်းထားပေမယ့် အချို့ရွာခံတွေ ပိတ်မိနေဆဲဖြစ်နေလို့ PNLA က လုံခြုံရေး တာ၀န်ယူပေးနေတယ်လို့သိရပါတယ်။
စစ်ကောင်စီလက်နက်ကြီးနဲ့ လေယာဉ်ဒဏ်ကြောင့် ရွာတွင်းအိမ်အချို့ မီးလောင်ပျက်စီးမှုတွေ ရှိနေတယ်လို့ သိရပါတယ်။
မနေ့ည ၈ နာရီခန့်တွင် ဆီဆိုင်မြို့နယ်၊ တွေပူးရွာမှာ PNLA တပ်ဖွဲ့တွေနဲ့ PNA ပြည်သူ့စစ် အင်အား ၁၀၀ ခန့် တိုက်ပွဲဖြစ်ပွားခဲ့တယ်လို့သိရပြီး နှစ်ဖက် ထိခိုက်ဒဏ်ရာရရှိမှုကိုတော့ မသိရသေးပါဘူး။
လွယ်ပွတ်နဲ့တွေးပူရွာ တိုက်ပွဲတွေ ဖြစ်ပွားလာနေတာက ဒေသတွင်း စစ်ဘောင်ချဲ့လာတဲ့ အနေအထားဖြစ်လို့ ဟိုပုံးမြို့၊ ဘန်းယဉ်၊ နောင်မွန်၊ ဆိုက်ခေါင်ဘက် ပြည်သူတွေလဲ စစ်မီးကူးလာမှာကို စိုးရိမ်မှုတွေ ရှိနေတယ်လို့ သိရပါတယ်။
စစ်ကောင်စီက ဆီဆိုင်မြို့က ၁၄ မိုင်ေ၀းတဲ့ ဆိုက်ခေါင်ကို အခြေပြထားတဲ့ အမြောက်တပ်နဲ့ ဆီဆိုင်၊ လွယ်ပွတ်၊ တွေပူး ရွာတွေဘက်ကို လက်နက်ကြီးပစ်ခတ်နေသလို အခု တိုက်ပွဲဖြစ်တဲ့ လွယ်ပွတ်ရွာက ဆိုက်ခေါင်ဘက်ပိုနီးတာသိရပြီး ဆိုက်ခေါင်မှာတော့ ဈေးတွေဖွင့်ပြီး လူတွေပြန်လာနေကြတယ်လို့ သိရပါတယ်။
လက်ရှိ ပအို၀်းလူမျိုးတွေ အဓိကနေတဲ့ မြို့ ၃ မြို့မှာ ဆီဆိုင်နဲ့ ပင်လောင်ဘက်တွင် တိုက်ပွဲတွေ ပြင်းထန်လာနေပြီး ဟိုပုံးမြို့သာ ကျန်ရှိနေတာဖြစ်ပါတယ်။ ဟိုပုံးမြို့ကို စစ်မီးကူးစက်ရင် အနီးဆုံးတောင်ကြီးမြို့အတွက် လုံခြုံမှု မရှိတော့တဲ့အနေအထားရှိနေတယ်လို့ ဒေသခံတွေက စိုးရိမ်စိတ်နဲ့ ပြောဆိုနေကြပါတယ်။
ပုံ-ပုံဟောင်း
#MeKongNews
#ဆီဆိုင်
#PNLO
#PNO
#PNA
#တိုက်ပွဲ
#ပြင်းထန်